ग्लोबल आईएमई बैंकको 'ग्लोबल आईएमई धनवृष्टि मुद्दती योजना' : दुई वर्षमै मुद्दती बचत दोब्बर हुने

ग्लोबल आईएमई बैंकको 'ग्लोबल आईएमई धनवृष्टि मुद्दती योजना' : दुई वर्षमै मुद्दती बचत दोब्बर हुने

A+ A A-

'बचत गरौँ' भन्ने मूल उद्देश्यका साथ विगतदेखि नै ग्लोबल आईएमई बैंकले अभियान सञ्चालन गर्दै आएको छ । यसैलाई निरन्तरता दिँदै बैंकले दुई वर्षमै दुई गुणा हुने 'ग्लोबल आईएमई धनवृष्टि मुद्दती योजना' सार्वजनिक गरेको छ ।

बैंकले सार्वजनिक गरेको यस योजनाअन्तर्गत ग्राहकको निरन्तर बचत गर्ने बानीलाई प्रोत्साहन गर्दै प्रारम्भिक रकमको १० प्रतिशत त्रैमासिक रूपमा (अन्तिम त्रैमासबाहेक) जम्मा गर्दा प्रारम्भिक रकमको दुई गुणा दुई वर्षमै प्राप्त गर्न सकिनेछ ।

यस योजनामा सहभागिताका लागि न्यूनतम मौज्दात रु. १०,००० हुनुपर्ने बैंकले जनाएको छ ।

कसरी हुन्छ त ग्राहकको रकम दुई वर्षमा दोब्बर ?

उदाहरणका लागि कुनै ग्राहकले १ लाख रुपैयाँ राखी 'ग्लोबल आईएमई धनवृष्टि मुद्दती योजना' अन्तर्गत खाता खोल्दा हरेक तीन महिनामा १०,००० का दरले ७ पटकसम्म रकम थप्दै जानुपर्नेछ । यसरी रकम थप्दा २ वर्षको अवधिमा उक्त रकम दुई गुणा हुनेछ । अन्तिम त्रैमासमा भने रकम थप्न पाइने छैन । मुद्दती निक्षेपको अवधि समाप्तिमा ग्राहकले २ गुणा रकम प्राप्त गर्नेछ ।

यस योजनाले साना व्यवसाय गर्ने, नोकरीे एवं निश्चित आय भएकाहरूलाई निरन्तर बचत गर्ने बानी बस्ने बैंकको विश्वास छ ।

ग्लोबल आईएमई बैंक मुलुकका सतहत्तरै जिल्लामा शाखा सञ्जाल रहेको निजीक्षेत्रको पहिलो वाणिज्य बैंक हो । बैंकले २९० शाखा, २७३ एटीएम, २७५ शाखारहित बैंकिङ सेवा, ५१ एक्सटेन्सन तथा राजस्व संकलन काउन्टर तथा तीनवटा वैदेशिक प्रतिनिधि कार्यालयसमेत गरी ८९० भन्दा बढी सेवा केन्द्रबाट ३० लाखभन्दा बढी ग्राहकहरूलाई वित्तीय सेवा प्रदान गरिरहेको छ ।

त्यसैगरी, बैंकले संयुक्त राज्य अमेरिका, संयुक्त अधिराज्य, क्यानडा, अस्ट्रेलिया, मलेसिया, दक्षिण कोरिया, जापान, साउदी अरेबिया, कतार, यूएई, बहराइन, कुबेत, भारत, जोर्डन, हङकङलगायत मुलुकबाट रेमिट्यान्स भित्र्याउँदै देशको अर्थ व्यवस्थामा महत्त्वपूर्ण योगदान पुर्‍याउँदै आइरहेको छ ।

प्रकाशित मिति: मंगलबार, असोज ११, २०७९ १५:५८