प्रत्यक्ष चुनावी मैदानमा डेब्युको तयारी गर्दै युवानेताहरू

A+ A A-

आउँदो मंसिर ४ मा हुने प्रतिनिधिसभा र प्रदेशसभा चुनावमा युवाहरू अगाडि आउनुपर्ने बहस चलिरहँदा केही युवा पहिलोपटक चुनावी मैदानमा डेब्यु गर्ने तयारीमा छन् । देशका ठूला र पुराना दलहरूमा पहिलो र दोस्रो पुस्ताले संसदीय राजनीतिमा हैकम जमाइरँदा याेपटक युवाहरूले पालाे पाउँछन् कि पाउँदैनन् त्यसका लागि भने केही समय कुर्नैपर्छ । तर केही युवा नेताहरू भने चुनावकाे तयारीमा जुटिसकेका छन् ।

२०६३ सालमा एमालेनिकट अनेरास्ववियुको अध्यक्ष ठाकुर गैरे भए । तर एमालेका केन्द्रीय सदस्य उनले अहिलेसम्म निर्वाचनमा भाग लिएको अनुभव छैन । पाल्पाका गैरे अघिल्लो प्रतिनिधिसभाको निर्वाचनमा मैदानमा उत्रिन खोजेका थिए । तर, उनकै जिल्लाका अर्का नेता सोमप्रसाद पाण्डेका कारण चुनावी मैदानमा उत्रने उनको सपना पूरा हुन पाएन ।

अहिले एमाले विभाजन भएको छ । यस कारण पनि गैरेलाई पाल्पामा टिकट पाउन सहज हुने देखिन्छ । राष्ट्रिय राजनीतिमा चर्चित नेता हुँदा पनि उनले चुनावमा भने उठ्न पाएका छैनन् । योपटकको निर्वाचनमा उनी पाल्पा निर्वाचन क्षेत्र नं.२ बाट चुनावी मैदानमा होमिने सम्भावना छ । उनका लागि यो निर्वाचन पहिलो अनुभव हुनेछ ।

अनेरास्ववियुकै पूर्वअध्यक्ष माधव ढुंगेल पनि प्रतिनिधिसभामा चुनाव लड्ने तयारीमा छन् । पार्टीकाे केन्द्रीय सदस्य रहेका ढुंगेलले यसअघि पनि चुनाव लड्ने चाहना राखेका थिए तर अन्तिममा पहिलो पुस्ताका लागि भन्दै पछाडि हटेका थिए । तर, अहिले युवाको पालो भन्ने अभियान चलाएका छन् । उनी रामेछापबाट प्रतिनिधिसभा सदस्यको उम्मेदवारी दिने तयारीमा छन् । उनको पनि यो पहिलो निर्वाचन हुनेछ ।

एमाले केन्द्रीय सदस्य निरज आचार्य पनि प्रत्यक्ष निर्वाचनमा उम्मेदवार हुने चाहनामा छन् । आचार्य २०५४ सालमा जिल्ला विकास समिति जाजरकाेटकाे सदस्य भएका थिए । उनी बुटवलमा भएको युवा संघको सम्मेलनमा अध्यक्षमा महेश बस्नेतसँग पराजित भएका थिए । अघिल्लो निर्वाचनमा प्रदेशसभाको टिकट पाए पनि अन्तिम समयमा पार्टी अध्यक्ष केपी ओलीले खोसेका थिए । उनको पनि यो निर्वाचनमा उम्मेदवार भएको पहिलो अनुभव हुनेछ ।

लामो समय पत्रकारिता गरेका एमाले पाेलिट ब्युराे सदस्य सूर्य थापा पनि योपटक प्युठानबाट प्रत्यक्ष निर्वाचनको तयारीमा छन् । पछिल्लो समय उनी पार्टीको जिल्ला इन्चार्ज छन् । उनी अहिले प्युठानमा केन्द्रित छन् । उनका लागि पनि यो निर्वाचन डेब्यु हुनेछ ।

नेकपा माओवादी केन्द्रका पोलिटब्युरो सदस्य लेखनाथ न्यौपाने पनि टिकट पाए निर्वाचनमा डेब्यु गर्ने तयारीमा छन् । गोरखा २ का न्यौपाने सिद्धान्त र सिद्धान्तअनुसारको व्यवहार हुनुपर्छ भन्ने मान्यता राख्छन् ।

कम्युनिस्टहरू विचारअनुसारको व्यवहार नगर्दा समस्यामा परेको बताउँदै आएका न्यौपाने अनेरास्ववियू क्रान्तिकारीको पूर्वअध्यक्षसमेत हुन् । उनी पनि अहिलेसम्म प्रत्यक्ष रूपमा चुनावी मैदानमा उत्रेका छैनन् ।

वाईसीएल नेपालका पूर्वअध्यक्ष तथा माओवादी केन्द्रका केन्द्रीय सदस्य रामप्रसाद सापकोटा पनि योपटक निर्वाचनमा होमिने तयारीमा छन् । नेता सापकोटाले यसपालिको संघीय संसदको चुनावमा भक्तपुर २ बाट चुनावी प्रतिस्पर्धा गर्ने आकांक्षा राखेका छन् । उनका लागि पनि यो निर्वाचन पहिलो अनुभव हुनेछ ।

क्रान्तिकारीका पूर्वअध्यक्ष रञ्जित तामाङ पनि यो प्रतिनिधिसभाको निर्वाचनमा डेब्युको तयारीमा छन् । माओवादीले उनलाई झापाको निर्वाचन क्षेत्र नं. ५ बाट उम्मेदवार बनाउन सक्ने आकलन गरिएको छ । तामाङले पनि पार्टीले टिकट दिए आफू एमाले अध्यक्ष केपी शर्मा ओलीसँग प्रतिस्पर्धा गर्ने बताएका छन् । उनले टिकट पाएमा यो निर्वाचनमा डेब्यु हुनेछ ।

रमेश मल्ल पनि क्रान्तिकारीका पूर्वअध्यक्ष हुन् । उनी अहिले नेकपा माओवादी केन्द्रका अध्यक्ष पुष्पकमल दाहाल प्रचण्डको प्रमुख स्वकीय सचिव हुन् । उनी सल्यानका स्थायी बासिन्दा हुन् । मल्ल माओवादी केन्द्रको पोलिटब्युरो सदस्य हुन् । यो जिल्लाबाट लगातार तीन कार्यकाल टेकबहादुर बस्नेतले विजय हासिल गरेका थिए । यसपटकको चुनावमा टिकट पाए डेब्यु गर्ने तयारीमा मल्ल छन् ।

अनेरास्ववियुकै पूर्वअध्यक्ष एमाले केन्द्रीय सदस्य ऐन महर पनि बझाङ जिल्लाबाट योपटकको निर्वाचनमा प्रतिनिधिसभाका लागि डेब्यु गर्ने तयारीमा छन् । विद्यार्थी राजनीतिबाट बिदा भएसँगै गृहजिल्लामा केन्द्रित छन् ।

एमालेका केन्द्रीय सदस्य तथा प्रचार विभाग उपप्रमुख विष्णु रिजाल पनि यो निर्वाचनमा दैलेख जिल्लाबाट डेब्यु गर्ने तयारीमा छन् । यसपटक दैलेख क्षेत्र नम्बर २ बाट उनी टिकटका लागि प्रबल दाबेदार मानिएका छन् । रिजाल अघिल्लोपटकको निर्वाचनमा प्रदेशसभा सदस्यमा सिफारिस भएका थिए । तर, टिकट पाउन सकेनन् ।

सुदेश पराजुली नेकपा एकीकृत समाजवादीको भ्रातृ संगठन अनेरास्ववियुका अध्यक्ष हुन् । उनले पनि योपटक काठमाडौं क्षेत्र नं.५ बाट उम्मेदवारी दिनका लागि लबिङ सुरु गरेका छन् । सत्ता गठबन्धनमा भागबण्डा गर्दा काठमाडौंको एक क्षेत्र समाजवादीले पाउने अवस्था आउँदा उनले टिकट पाउन सक्ने आकलन गर्न थालिएको छ । उनले टिकट पाएमा डेब्यु हुनेछ ।

उषाकिरण भण्डारी पनि काठमाडौंमा उम्मेदवार बन्ने चर्चा सुरु भएको छ । उनी एमालेका पूर्वमहासचिव स्व. मदनकुमार भण्डारी र राष्ट्रपति विद्यादेवी भण्डारीकी छोरी हुन् । उनको पार्टी काममा भन्दा पनि शैक्षिक व्यवसायमा सक्रियता बढी छ । उनफ राजनीतिक परिवारकी सदस्य हुन् । उनको छवि स्वच्छ मानिन्छ ।

गुरु घिमिरे नेविसंघका पूर्वसभापति हुन् । उनी पनि योपटक मोरङ क्षेत्र नं. ४ बाट प्रतिनिधिसभाको निर्वाचनमा डेब्यु गर्ने तयारीमा छन् । ०६२–६३ को जनआन्दोलनमा नेविसंघमा गणतन्त्रको नारा लगाउने उनी पहिलो थिए । त्यसपछि नेपाली कांग्रेसमा गणतन्त्रको नारालाई स्वीकार्न दबाब परेको थियो ।

कांग्रेस केन्द्रीय सदस्य जितजंग बस्नेत पनि योपटक निर्वाचनमा उम्मेदवार हुन चाहन्छन् । उनी तरुण दलको पूर्वअध्यक्ष र नेविसंघको पनि पूर्वमहामन्त्री हुन् । ललितपुर क्षेत्र नम्बर ३ बाट टिकट पाए निर्वाचनमा उम्मेदवार हुने चाहना उनले राखेको बताइन्छ ।

नैनसिंह महर नेविसंघका पूर्वअध्यक्ष हुन् । पार्टी केन्द्रीय सदस्य महर कांग्रेस सभापति तथा प्रधानमन्त्री शेरबहादुर देउवाको गृहजिल्ला डडेल्धुराका हुन् । उनले पनि योपटकको निर्वाचनमा उम्मेदार हुन लबिङ सुरु गरेको बताइन्छ । उनको चाहना कैलाली क्षेत्र नं. ४ हो । ४ नं. क्षेत्र पूर्वमाओवादी नेता लेखराज भट्टले जितेको क्षेत्र हो । अहिले बन्ने गठबन्धनबाट महरले उम्मेदवार हुन चाहेका छन् । उनी देउवानिकट हुन् । त्यस कारण अन्य युवानेताभन्दा उनले टिकट पाउने सम्भावना बढी हुने बताइन्छ ।

कांग्रेस केन्द्रीय कल्याण गुरुङ पनि योपटक प्रतिनिधिसभामा डेब्यु गर्ने चाहनामा छन् । उनी मोहत्तरी निर्वाचन क्षेत्र नं. १ बाट निर्वाचन लड्ने तयारीमा छन् ।

गुरुङ ०६४ सालमा नेपाल विद्यार्थी संघको केन्द्रीय अध्यक्ष भएका थिए । १२औँ महाधिवेशनपछि केन्द्रीय कार्यसमितिमा आमन्त्रित सदस्यका रूपमा मनोनीत भएका थिए ।

उनी १३औँ महाधिवेशनमा आदिवासी जनजातितर्फ केन्द्रीय सदस्य पदमा निर्वाचित भएका थिए । १४औँ महाधिवेशनमा सभापतिमा उम्मेदवारी दिएर चर्चामा आएका थिए ।

नेविसंघका पूर्वअध्यक्ष कांग्रेस केन्द्रीय सदस्य राजीव ढुङ्गाना पनि योपटक निर्वाचनमा उम्मेदवार हुन चाहेका छन् । उनी सुनसरी निर्वाचन क्षेत्र नं.२ बाट उम्मेदवार हुने तयारीमा जुटेका छन् ।

कांग्रेस केन्द्रीय सदस्य अजयबाबु शिवाकोटी पत्रकारिताबाट पार्टी राजनीतिमा प्रवेश गरेका छन् । शिवाकोटीले दोलखाबाट प्रतिनिधिसभा सदस्यको टिकटका लागि लबिङमा लागेका छन् ।

एक मात्र निर्वाचन क्षेत्र रहेको दोलखामा उनी डेब्यु गर्ने तयारीमा छन् । उनी नेपाली कांग्रेसको १४औँ महाधिवेशनबाट केन्द्रीय सदस्यमा निर्वाचित हुन् ।

प्रकाशित मिति: बुधबार, भदौ १, २०७९ २०:३०