काेशीमा एमाले–माओवादीले एसलाई वास्ता गरेनन्, सुदूरपश्चिममा के हाेला ?

A+ A A-

कोशी प्रदेश सरकार गठनको नयाँ प्रक्रियामा एमाले र माओवादी केन्द्रले एकीकृत समाजवादीलाई साथमा लिएनन् । एमाले र माओवादीले मुख्यमन्त्रीसहित आफ्नो कोटाबाट दुई जना मन्त्री नियुक्त गर्दासम्म एकीकृत समाजवादीसँग सामान्य छलफलसमेत गरेका छैनन् । त्यसले केन्द्रदेखि प्रदेशसम्म एमाले र माओवादी केन्द्रसँग एकीकृत समाजवादीको दूरी बढेको संकेत गर्छ ।

पछिल्लो गठबन्धनप्रति एकीकृत समाजवादीका नेताहरूले असन्तुिष्ट जनाउने गरेका थिए । त्यही क्रममा बढ्दो दूरीको प्रभाव कोशी प्रदेशमा देखिएको हो । कोशी प्रदेशमा नयाँ सरकार बनाउने क्रममा एमाले र माओवादीले चार सीट रहेकाे एकीकृत समाजवादीलाई साथ नलिएपछि संसदीय दलका नेता राजेन्द्र राईले सार्वजनिक रूपमा असन्तुष्टि पनि जनाएका छन् ।

एकीकृत समाजवादीसँग कोशीमात्र होइन, सुदूरपश्चिम प्रदेशमा समेत समस्या रहेको छ । एसले एमाले र माओवादी केन्द्रसँग बार्गेनिङ गरेर सुदूरपश्चिम प्रदेशमा मुख्यमन्त्री लिएकाे छ । त्यही मागले गर्दा एमालेसँग असन्तुष्टि बढेको छ । एमाले अहिले सहजै विश्वासको मत दिने लाइनमा देखिएको छैन । जसले गर्दा, मुख्यमन्त्री दीर्घ सोडारीको विश्वासको मत लिने दुईपटकको प्रयास असफल भइसकेको छ ।

५ जेठभित्र सोडारीले विश्वासको मत लिनुपर्नेछ । एमालेसँग एकीकृत समाजवादीको त्यो असन्तुष्टि र बढ्दो दूरीको प्रभाव कोशीमा परेको देखिन्छ । एमाले र माओवादीले एकीकृत समाजवादीलाई कोशीमा साथ नलिनुको संकेत चाहिँ सुदूरपश्चिमका मुख्यमन्त्री सोडारीलाई विश्वासको मत नदिने लाइनसँग जोडेर हेर्न थालिएको छ ।

साथै, केन्द्रीय गठबन्धनबाट पनि बिस्तारै हटाउने रणनीति रहेको पनि विश्लेषण भइरहेको छ । मधेश प्रदेशमा सरकार हेरफेर गरी जनमतलाई भित्र्याउने खेल भइरहेको छ । त्यो खेलमा जनमतले मुख्यमन्त्री पाउने सम्भावना रहेको र जनमत केन्द्रीय गठबन्धनमा सहभागी हुने बताइन्छ ।

जनमतलाई साथ लिँदा उपेन्द्र यादव नेतृत्वको जसपालाई पनि प्रदेश र संघबाट एकसाथ हटाउने रणनीति पनि एमाले र माओवादीमा देखिएको छ । त्यहीबेला एस पनि बाहिरिने सम्भावना रहेको छ । जनमत र विभाजित जसपाले साथ दिएमा प्रचण्ड नेतृत्वको सरकारले निरन्तरता पाउँछ । त्यसैले , अहिले एकीकृत समाजवादी कोशी प्रदेशमा बाइपासमा परेको चर्चा भइरहेको छ ।

प्रकाशित मिति: बिहीबार, वैशाख २७, २०८१ २०:३७