इलाम- २ को उपनिर्वाचनपछि रास्वपा नेतृत्वले बुझाेस्- सधैँसधैँ आँधीहुरी आउँदैन

इलाम- २ को उपनिर्वाचनपछि रास्वपा नेतृत्वले बुझाेस्- सधैँसधैँ आँधीहुरी आउँदैन

A+ A A-

उपनिर्वाचन सकिए पनि त्यसको परिणामले उठाएको छाल भने अहिलेसम्म पनि बस्न सकेको छैन । उपनिर्वाचनको परिणामले राष्ट्रिय स्वतन्त्र पार्टी (रास्वपा)लाई अझै बढी तरङ्गित पार्‍यो । रास्वपाका लागि इलामको निर्वाचन परिणाम अनपेक्षित नै आएको हो । निर्वाचन नजिते पनि घण्टीको भोट पहिलो वा दोस्रो हुन्छ भन्ने आममानिसको आकलन थियो । तर, अनपेक्षित भोटमा रास्वपाले चित्त बुझाउन बाध्य हुनुपर्‍यो । यो परिणामले खास गरी रास्वपाको राजनीतिक र सांगठनिक धरातलमा ठूलै कम्पन ल्याइदिएको छ । यसो भनूँ, रास्वपालाई इलामको निर्वाचन परिणामले स्तब्ध पारिदिएको छ ।

राजनीतिक जीवनको लामो यात्रामा रास्वपा पार्टी अब कसरी अघि बढ्नेछ भन्ने कुरा सोच्न त्यसका नेताहरूलाई बाध्य पारिदिएको छ । यथास्थिति वा अवस्थामा पार्टीको भविष्य अघि नबढ्ने कुरा स्पष्ट भएको छ । अब पार्टीलाई नयाँ सांगठनिक शिराबाट अघि बढाउनुबाहेक रास्वपासँग अर्को विकल्प छैन ।

यसअघि चितवनमा भएको उपनिर्वाचनमा सोही पार्टीका सभापति रवि लामिछानेले पाएको मतले सबैलाई अचम्मित पारिदिएको थियो । सभापति लामिछानेले आममानिसले सोचेभन्दा बढी मत ल्याएका थिए । उनले त्यसरी त्यहाँ मत पाउँछन् भन्ने आमअपेक्षा थिएन । तर, उनले त्यहाँ अपेक्षा गरेभन्दा पनि बढी मत पाए । त्यति धेरै मत आउँछ भन्ने कुरा आममानिसले सोचेका पनि थिएनन् । अर्थात् उनले आश्चर्यजनक मत ल्याएका थिए र सबैलाई अचम्ममा पारेका थिए । त्यसको ठीक उल्टो आममानिसको अपेक्षाभन्दा ज्यादै कम मत रास्वपाले इलाममा पायो ।

इलाममा रास्वपाको मत किन कम आयो ? यसका पछाडि विभिन्त्र कारणहरू पक्कै पनि छन् । रास्वपा पार्टीले ती कारणहरूको अवश्य पनि गहिराइमा पुगेर खोजी गर्ने नै छ । र, ती कारणहरू पहिलाएर भविष्यको बाटो कोर्नेछ ।

यो वा त्यो कारण जे भए पनि इलामको उपचुनावको परिणामले रास्वपाको राजनीतिक भविष्यको बाटोलाई नै खलबल्याइदिएको छ । रास्वपाले भन्दै आएको मिसन २०८४ को नारालाई फेरि एकपटक सोच्न बाध्य बनाएको छ । किन र कसरी रास्वपाको जमानत जफत भयो इलाममा ? यो प्रश्नको उत्तर रास्वपाको नेतृत्वले आफूलाई होइन, जनतालाई बुझाउन जरुरी छ । रास्वपालाई देशको बलियो राजनीतिक पार्टीका रूपमा स्थापित गराउने उद्देश्यका साथ यसको नेतृत्व लागिपरेको छ । २०८४ मा बहुमत ल्याउने सपनाका साथ लागेको यो नेतृत्वले इलामबाट पाठ सिक्नु जरुरी छ ।

इलामको हारलाई रास्वपाको नेतृत्वले हल्का रूपमा लियो भने यसले भविष्यमा अझै ठूलो नोक्सानी गर्नेछ । इलामको निर्वाचनसँग जोडेर सिङ्गो पार्टी संगठनको सांगठनिक संरचनामा फेरबदल गर्न पनि नेतृत्व तयार हुनुपर्छ । इलाम निर्वाचनको कठोर समीक्षा रास्वपामा हुनु आवश्यक छ । २०८४ आउनुभन्दा अघि नै इलामको यो परिणामले रास्वपाको आगामी यात्रालाई पक्कै पनि सचेत बनाएको छ । अर्थात् पार्टीलाई हरेक कोणबाट बलियो र मजबुत बनाउनका लागि अवसर प्राप्त भएको छ ।

रास्वपाको नेतृत्वले के पनि बुझ्नु आवश्यक छ भने सधैँ-सधैँ आँधीहुरी आउँदैन । आँधीहुरी भनेको एकै क्षण आउँछ, त्यो पनि थोरै समय । त्यसैले पनि पार्टीको संगठनलाई आफ्नो खुट्टामा उभ्याउनु जरुरी छ ।

रास्वपाको नाम जोडेर घण्टी निर्वाचन चिह्न पाए निर्वाचन जितिन्छ भन्ने जुन मानसिकता थियो, त्यसमा परिवर्तन गर्नुपर्ने देखिएको छ । निर्वाचन जित्नका लागि पार्टी र त्यसको चुनाव चिह्न मात्रै पनि पर्याप्त नहुँदो रहेछ भन्ने कुरा पार्टी नेतृत्वले बुझ्न जरुरी छ ।

रास्वपाका नेताहरूमा जनता लाइन लागेर घण्टीमा भोट हाल्न व्यग्रताका साथ बसेका छन् भन्ने जुन भ्रम थियो, त्यो इलामको निर्वाचनले तोडिदियो । उनीहरू भन्थे– २०८४ मा घण्टीको बहुमत आइहाल्छ । तर, इलामको परिणामले त्यस्तो देखाएन । इलाम परिणामको तितो सत्यलाई रास्वपाका नेताहरूले आत्मसात् गर्नुपर्नेछ ।

रास्वपाले मिसन २०८४ को नारा धेरैअघिदेखि घन्काउँदै आएको छ । रास्वपाले मिसन २०८४ भनिरहँदा कांग्रेस–एमालेका नेताहरूले त्यसको विरोध पनि गर्दै आएका छन् । उनीहरूले 'त्यो रास्वपाको मात्रै नारा होइन, मिसन २०८४ हाम्रो पनि हो' भन्दै पनि आएका छन् । यसको अर्थ रास्वपाको मिसन २०८४ को नाराले ती दलका नेताहरू एक प्रकारले तर्सिएको पनि देखिएको छ ।

रास्वपाको मिसन २०८४ को नाराले आमनेपालीलाई छोएको पनि छ । कांग्रेस-एमालेलाई भोट दिएर देशमा केही भएन । एकचोटि रास्वपालाई जिताउनुपर्छ भन्ने आमजनताको मत नभएको पनि होइन । त्यसैले पनि मिसन २०८४ को रास्वपाको नारा लोकप्रिय बन्दै गएको हो । कतै २०८४ मा रास्वपाले आफूहरूलाई बढार्छ कि भनेर पनि उनीहरूलाई छटपटी बढेको हुन सक्छ । त्यसैले उनीहरू मिसन २०८४ रास्वपाको मात्रै होइन, हाम्रो पार्टीको पनि नारा हो भनिरहेका छन् । र, रास्वपाको विरोधमा कराइरहेका छन् ।

तर, अहिले आएर इलामको निर्वाचनको परिणामसँगै रास्वपाले बोक्दै आएको मिसन २०८४ को नारा रास्वपाकै लागि प्रश्न भएर उभिएको छ । रास्वपाले बोक्दै आएको मिसन २०८४ अभियानमा सफलता पाऊला त भन्ने प्रश्न इलामको निर्वाचनले उठाएको छ । यो प्रश्नको जवाफमा नै रास्वपाको भविष्य अडिएको छ । उक्त पार्टीका नेताहरूले पहिला यो प्रश्नको जवाफ अरुलाई होइन, आफ्नै नेता कार्यकर्ताहरूलाई दिनुपर्नेछ । चितबुझ्दो जवाफ नपाएसम्म रास्वपाको कार्यकर्ता पंक्ति अब चलायमान हुनै सक्दैन । इलामको निर्वाचनसँगै निराश भएका कार्यकर्तालाई उत्साहित र चलायमान बनाउन त्यति सजिलो पनि छैन । रास्वपाका अगाडि फेरि एकपटक इलामको निर्वाचनले चुनौती खडा गरिदिएको छ ।

रास्वपाको नेतृत्वले के पनि बुझ्नु आवश्यक छ भने सधैँ-सधैँ आँधीहुरी आउँदैन । आँधीहुरी भनेको एकै क्षण आउँछ, त्यो पनि थोरै समय । त्यसैले पनि पार्टीको संगठनलाई आफ्नो खुट्टामा उभ्याउनु जरुरी छ । पार्टी संगठनलाई आकर्षक र बलियो नबनाएसम्म राजनीतिको लामो दौडमा सहभागी हुन अवश्य पनि कठिन हुनेछ । पार्टीले भन्दै आएजस्तो जान्नेलाई छान्ने उनीहरूको योग्यता र क्षमताअनुसारको जिम्मेवारी दिने काममा कञ्जुसाइँ गर्नु हुँदैन । घण्टीमा कहिले भोट हाल्न पाइन्छ भनेर आमजनता लाम लागेर त्यत्तिकै बसेका हुँदैनन् । उनीहरूलाई घण्टीमा भोट हाल्नका लागि वातावरण निर्माण गर्न सक्ने नेता-कार्यकर्ताको रहरलाग्दो पंक्ति रास्वपाले उत्पादन गर्नैपर्छ ।

केसी रास्वपा भक्तपुरका नेता हुन् ।

प्रकाशित मिति: बिहीबार, वैशाख २७, २०८१ ०७:३४