मधेशका मुख्यमन्त्री यादवलाई अशाेक राईतर्फ ढल्काउन समर्थन फिर्ताकाे हल्ला !

मधेशका मुख्यमन्त्री यादवलाई अशाेक राईतर्फ ढल्काउन समर्थन फिर्ताकाे हल्ला !

A+ A A-

प्रमुख सत्ता साझेदार नेकपा एमाले र माओवादी केन्द्रले समर्थन फिर्ता लिने हल्लाले जनता समाजवादी पार्टी, नेपालका सरोजकुमार यादव नेतृत्वको मधेश प्रदेश सरकारकाे कुर्सी हल्लाएकाे छ । जसपा विभाजन भएसँगै मुख्यमन्त्री यादव दबाबमा परेका हुन् ।

बिहीबार एक कार्यक्रममा सहभागी हुन सर्लाही पुगेका एमाले प्रदेश संसदीय दलका नेता सरोज यादव अध्यक्ष ओलीको निर्देशनमा कार्यक्रम छोट्याएर जनकपुर फर्केका थिए । जनकपुर फर्केलगत्तै उनले माओवादी केन्द्र संसदीय दलका नेता भरतप्रसाद साहसँग विकसित राजनीतिक घटनाक्रम तथा नयाँ सत्ता समीकरणको विषयमा छलफल गरेका थिए । तर, नयाँ सत्ता समीकरणका लागि अहिलेसम्म विपक्षी दल जनमत र लोसपाका नेताहरूसँग छलफल भएकाे छैन ।

आफैँ सहभागी रहेको सरकारलाई ढाल्न जसपा अध्यक्ष उपेन्द्र यादवले अमेरिका भ्रमणमा जानुअघि एकीकृत समाजवादीका अध्यक्ष माधवकुमार नेपाल र नेपाली कांग्रेसका सभापति शेरबहादुर देउवासँग गोप्य छलफल गरेको एमाले र माओवादी केन्द्रको आरोप छ । त्यसपछि प्रधानमन्त्री प्रचण्ड र एमाले अध्यक्ष केपी शर्मा ओलीले मिलेर जसपा फुटाइदिएकाे चर्चा छ । यद्पि यो विषयमा यादवले अहिलेसम्म सार्वजनिक रूपमा अभिव्यक्ति दिएका छैनन् ।

श्रोतका अनुसार प्रचण्ड, ओली र जसपा अध्यक्ष अशाेक राईबीच केन्द्रदेखि प्रदेशसम्म सत्ता सहकार्य गर्ने र उपेन्द्र यादव नेतृत्वको पार्टीलाई सत्ताबाट अलग राख्ने सहमति भएको थियो । एमालेका एक नेताका अनुसार, जसपा विभाजित भएपछि अमेरिका भ्रमणबाट फर्केलगत्तै यादवले सरकार छाेड्ने अनुमान थियाे । तर, अध्यक्ष यादवले आफू वर्तमान गठबन्धनकै पक्षमा रहेको बताइरहेका छन् ।

अहिले जसपा नेपाललाई सत्ताबाट नहटाएको खण्डमा मधेश प्रदेशमा अशोक राईको जसपालाई समस्या हुने देखिएकाे छ । अर्थात् मधेश प्रदेशमा जसपा नेपाललाई विभाजन गर्न राईलाई कठिन हुनेछ । त्यसकारण राईले सहमति अनुसार जसपा नेपाललाई सरकारबाट निकाल्न प्रचण्डलाई दबाब दिइरहेका छन् ।

तर, उपेन्द्रले सरकार छोड्न नचाहिरहेको अवस्थामा मुख्यमन्त्री सरोजकुमार यादवलाई अशोक राई नेतृत्वको पार्टीतर्फ लाग्न दबाब दिने उद्देश्यले बिहीबार एमाले र माओवादी केन्द्रले समर्थन फिर्ता लिने र जनमत र लोसपासँग मिलेर सरकार बनाउने हल्ला फैलाइएको माओवादीका एक प्रदेश सांसदले बताए ।

मुख्यमन्त्री यादवलाई मधेशमा आफ्नो नेतृत्वको सरकार सुरक्षित राख्न राई नेतृत्वको जसपातर्फ लाग्न माओवादी र एमालेले दबाब दिएका हुन् । मुख्यमन्त्री यादव सत्ता जोगाउन राईतर्फ जानसक्ने आँकलन एमाले र माओवादीकाे रहेकाे ती माओवादी नेताले बताए ।

विगतमा मुख्यमन्त्री यादवले प्रदेश सभामुख रहेका बेला आफ्नाे पद जोगाउन तत्कालीन जसपा विभाजित हुँदा लोसपातर्फ नलागी जसपामै बसेका थिए । तत्कालीन राष्ट्रिय जनता पार्टी (राजपा) र संघीय समाजवादी मिलेर जसपा निर्माण गरिएको थियो । तत्तकालीन जसपाबाट लोसपा अलग हुँदा उनी जसपातर्फ नै लागेका थिए । तत्कालीन लोसपाका वरिष्ठ नेता राजेन्द्र महतोनिकट यादवले आफ्नाे सभामुख पद जोगाउन महतोको साथ छोडेर उपेन्द्र यादवलाई सहयोग गरेका थिए ।

संसदीय दलमा मुख्यमन्त्री यादवको पकड राम्रो नभए पनि पदमा रहेकोले केही सांसद आफूसँग लिएर जानसक्ने राई पक्षको बुझाई छ । मुख्यमन्त्री यादवले उपेन्द्र यादवको साथ नछोडेको खण्डमा पूर्वमुख्यमन्त्री लालबाबु राउतलाई मुख्यमन्त्रीको प्रलोभन दिएर राई पक्षमा तान्ने सम्भावना छ । तर, पटक–पटक पार्टी विभाजन हुँदा राउतले उपेन्द्रलाई साथ दिएकोले त्यो सम्भावना न्यून रहेको एमालेकै सांसदहरू बताउँछन् । जनमतले नयाँ सत्ता समीकरणको लागि आफ्नो नेतृत्वको सरकार गठन हुनुपर्ने पहिलो सर्त राखेकोले एमाले र माओवादी तत्काल त्याे पक्षमा नरहेको एमालेका एक सांसदले बताए ।

प्रकाशित मिति: बिहीबार, वैशाख २७, २०८१ २१:४३