सुर्खेतमा १५ अर्ब लगानीमा सिमेन्ट उद्योग सञ्चालन गरिने, मुख्यमन्त्रीसँग छलफल

सुर्खेतमा १५ अर्ब लगानीमा सिमेन्ट उद्योग सञ्चालन गरिने, मुख्यमन्त्रीसँग छलफल

सोमबार उद्योग सञ्चालक र मुख्यमन्त्रीबीच भएको छलफल ।

A+ A A-

सुर्खेतको बराहताल गाउँपालिकामा सिमेन्ट उद्योग स्थापना गरिने भएको छ । करिब १५ अर्ब लगानीमा सूर्यतारा सिमेन्ट उद्योग स्थापना गर्न लागिएको हो । उद्योगले दुई वर्षभित्र सिमेन्ट उत्पादन गर्ने लक्ष्य राखेको छ ।

उद्योग सञ्चालकले सोमबार मुख्यमन्त्री जीवनबहादुर शाहीसँग भेटेर छलफल गरेका छन् । छलफलमा बराहताल गाउँपालिका–७ स्थित लखरपाटामा खानी र चौकुनेमा उद्योग सञ्चालन गर्न लागेको सूर्यताराले आवश्यक सहजीकरण र भावी योजनाका बारेमा प्रदेश सरकारलाई जानकारी गराएको थियो ।

मुख्यमन्त्री शाहीले कर्णालीमा बाह्य लगानी भित्र्याउन प्रदेश सरकारले आवश्यक सहयोग र सहजीकरण गर्ने आश्वान दिएका छन् । उनले खानी र उद्योगसम्म सडक तथा पानी पुर्‍याउन प्रदेश सरकारले तत्कालै काम थाल्ने, उद्योगले प्रदेशलाई गर्ने योगदानका आधारमा कर लगायतका क्षेत्रमा छुटको व्यवस्था गर्ने प्रतिबद्धता जनाएका छन् ।

उद्योगका अध्यक्ष मुकुन्दप्रसाद तिमिल्सेनाले उद्योगका लागि जग्गा प्राप्ती भइसकेको र पहुँचमार्ग निर्माण र संरचना निर्माणको कामको भइरहेको बताएका छन् ।

उद्योग सञ्चालनका लागि लगानी बोर्डले १४ अर्ब २७ करोड ५० लाखको लगानी स्वीकृत गरेको छ । बराहताल गाउँपालिका–७ स्थित लखरपाटामा ९५ हजार हेक्टर जमिनबाट चुनढुंगा उत्खनन् गर्नेछ भने चौकुने गाउँपालिकामा उद्योग स्थापनाका लागि ४२ विघा जमिन खरिद गरेको छ ।

उद्योगले दैनिक ५० देखि ६० हजार बोरा सिमेन्टका साथै तीन हजार टन क्लिङ्कर उत्पादनको लक्ष्य राखेको छ । सिमेन्ट उत्पादनका हिसाबले ठूलो सम्भावना बोकेको सुर्खेतको पश्चिम क्षेत्रमा उद्योग स्थापनाका लागि भएको यो दास्रो प्रयास हो । यसअघि चौकुने सिमेन्ट उद्योग सञ्चालन गर्ने भनिए पनि मूर्त रुप लिन सकेको छैन ।

प्रकाशित मिति: सोमबार, वैशाख ५, २०७९ २०:१८