चैत १० देखि सुदूरपश्चिम महोत्सव, ४ लाखले अवलोकन गर्ने आयोजकको दाबी

A+ A A-

कोरोना महामारीका कारण दुई वर्षदेखि रोकिएको सुदूरपश्चिम महोत्सव यस वर्ष भने हुने भएको छ । कैलालीको धनगढीमा दुई वर्षपछि महोत्सव आयोजना गरिने भएको हो ।

धनगढीमा मंगलबार पत्रकार सम्मेलन गर्दै महोत्सवबारे जानकारी दिइएको छ । कैलाली उद्योग वाणिज्य संघका अध्यक्ष पुष्पराज कुँवरले चैत १० देखि २० गतेसम्म महोत्सव सञ्चालन हुने बताए । कोरोना महामारीका कारण विगत २ वर्षदेखि रोकिएको महोत्सव यस वर्ष गर्न लागिएको हो ।

महोत्सवले सुदूरपश्चिमको पर्यटन, कृषि, उद्योग र व्यापारको विकास तथा विस्तारका साथै संस्कृति र कलाको प्रवर्द्धनमा सघाउने आयोजकले जनाएको छ । यस क्षेत्रको समग्र विकासका सम्भावनाहरूलाई महोत्सवले उजागर गर्ने अपेक्षा गरिएको छ ।

कोरोना महामारीका कारण सिर्जित आर्थिक, सामाजिक प्रतिकुलता र विषम सामाजिक परिस्थितिबाट गुज्रिरहेको उद्योग व्यवसायलाई आसावादी बनाइ पुनर्स्थापित गर्न महोत्सव उपलब्धिमूलक हुने आयोजकको दाबी छ ।

२०६३ सालदेखि धनगढीमा आयोजना भइरहेको महोत्सवको यो १५ औँ संस्करण हो । महोत्सवमा बृहत् व्यावसायिक कृषि प्रदर्शनी तथा प्रतियोगिता, ताजा तरकारी र कृषिमा आएको प्रविधिसँगै माछा, केरा, पोल्ट्री, दुग्धजन्य पदार्थ, च्याउ आदि व्यवसायलाई प्रदर्शनीमा विशेष जोड दिइने कुँवरले बताए ।

सुदूरपश्चिमको कला संस्कृतिको संरक्षणमा पनि महोत्सव फलदायी हुने आयोजकको दाबी छ । यस क्षेत्रका कला संस्कृतिमा सम्भावना भएका र योगदान दिएका कलाकारहरूलाई स्टेजमा प्राथमिकता दिइने आयोजकले जनाएको छ ।

महोत्सवमा कृषि, जडीबुटी, हस्तकला, फर्निचर, अटोमोबाइल्स, गार्मेन्ट, इलेक्ट्रोनिकल, होटेल र सूचना प्रविधि गरी तीन सय भन्दा बढी स्टलहरू राखिने भएको छ ।

महोत्सवमा स्थानीय उत्पादन र महिला उद्यमीलाई प्रोत्साहन गरिने कुँवरले बताए । महोत्सवको आयोजनामा एक करोडभन्दा बढी खर्च लाग्ने र करिब ४ लाखले अवलोकन गर्ने आयोजकको अनुमान छ । यसअघि माघ १८ देखि सञ्चालन गर्ने भनिएको महोत्सव कोरोना महामारीका कारण स्थगित गरिएको थियो ।

प्रकाशित मिति: मंगलबार, चैत १, २०७८ २१:१२