अख्तियारमा परेका बझाङका उजुरीमध्ये सबैभन्दा बढी स्थानीय तहका

A+ A A-

बझाङमा आर्थिक अनियमितता गर्नेमा सबैभन्दा बढी स्थानीय तह रहेको पाइएको छ । अख्तियार दुरुपयोग अनुसन्धान आयोगको कार्यालय कञ्चनपुरको तथ्याङक अनुसार बझाङको विवरण हेर्दा सबैभन्दा बढी स्थानीय तहले अनियमितता गरेको उजुरी परेको छ ।

आइतबार जिल्ला सदरमुकाम चैनपुरमा भ्रष्टाचार नियन्त्रण र सुशासन प्रवर्द्धनमा अख्तियार दुरुपयोग अनुसन्धान आयोगको भुमिका विषयक अन्तक्र्रिया कार्यक्रममा भएको छलफलको क्रममा चालु आर्थिक वर्षमा मात्र बझाङबा ११९ वटा उजुरी परेको जनाइएको छ । कतिपय स्थानीय तहको काम राम्रो भए पनि व्यक्तिगत रिसिवीका कारण अख्तियारमा उजुरी हाल्ने गरेको हुँदा आयोगले यसमा स्थलगत अनुगमन गरी छानविन गर्नुपर्नेमा सहभागीले जोड दिएका छन्।

प्रदेशबाट आएका योजनाहरुका बारेमा स्थानीय सरकारलाई कुनै पनि जिम्मेवारी नभएको र सिफारिससमेत दिनुनपर्ने भएकाले कतिपय योजनाहरु प्रदेशबाट ल्याएर प्रदेशमै भुक्तानी लिने तर, उजुरी स्थानीय तहका नाममा आउने गरेको कार्यक्रममा सहभागी जनप्रतिनिधिको भनाइ थियो । जनप्रतिनिधिसँग रिसिवीका कारण बेनामे उजुरी दिई जनप्रतिनिधिको बदनाम गर्न खोजिएको छविसपाथीभेरा गाउँपलिका अध्यक्ष अक्कल बहादुर धामीले बताए ।

चालु आर्थिक वर्ष २०७८–०७९ को माघ मसान्तसम्म मात्र अख्तियार दुरुपयोग अनुसन्धान आयोगको कार्यालय कञ्चनपुरमा बझाङका स्थानीय तहले अनियमितता गरेको भन्दै ५४ वटा उजुरी परेका छन । अख्तियारमा परेका उजुरीमध्ये सबै भन्दा बढी बुङगल नगरपालिकाका २२ वटा छन् । सुर्मा, केदारस्युँ, दुर्गाथली गाँउपालिका र जयपृथ्वी नगरपालिकाका ४–४ वटा, साइपाल र खप्तडछान्ना गाँउपालिकाका ३–३ वटा, छविसपाथीभेरा गाँउपालिकाका ६ वटा, तल्कोट गाँउपालिकामा २ वटा, मष्टा र थलारा गाँउपालिकाका १–१ वटा आर्थिक अनियमितताका उजुरी परेका छन ।

अख्तियार दुरुपयोग अनुसन्धान आयोगको कार्यालय कञ्चनपुरका अनुसार स्थानीय तहबाहेक संघ र प्रदेशतर्फका योजनाहरुमा भएको अनियमितताका ६१ उजुरी परेका छन । भौतिक, खानेपानी र सिचाँईका २६ वटा, शिक्षाका २३ वटा, भुमिका ५ वटा, स्वास्थ्यका १ वटा र अन्य क्षेत्रका ६ वटा उजुरी परेका छन् ।

भौतिक संरचना निर्माण गर्दा प्राविधिकसँग मिलेमतो गरी कम गुणस्तरका संरचना बनाएर गैरकानुनी रूपमा कमाउनु र शैक्षिक प्रमाणपत्र नक्कली भएको भन्दै उजुरी पर्ने गरेको अख्तियार दुरुपयोग अनुसन्धान आयोगको कार्यालय कञ्चनपुरका प्रमुख राम बहादुर कुरुवाङले बताए । उनका अनुसार कार्यालयमा पर्ने उजुरीका प्रकृति हेर्दा स्थानीय तहमा बजेट निर्माण, विनियोजन र कार्यान्वयन, उपभोक्ता समिति गठन, सार्वजनिक खरिद र निर्माण, कर्मचारी नियुक्ति, राजस्व रकम हिनामिना र विषययगत कार्यालयको सेवा प्रभावसम्बन्धी उजुरी आउने गरेका छन ।

नेपाल सबैभन्दा बढी भ्रष्टाचार गर्ने मुलुक भनेर बदनाम भैरहेकाले भ्रष्टाचार रोक्नका लागि आयोगले साना ठूला नभनेर कानुनबोमोजिम आफ्नो जिम्मेवारीका साथ अगाडि बढेको अख्तियार दुरुपयोग अनुसन्धान आयोगका आयुक्त डा. हरि पौडेलले बताए ।