कांग्रेस महाधिवेशन: टिम परिचालन गर्दै देउवा, विभाजित हुँदै पौडेल समूह

A+ A A-

कांग्रेस सभापति शेरबहादुर देउवाबारे वरिष्ठ नेता रामचन्द्र पौडेलको टिप्पणी थियो, 'नेपाल विद्यार्थी संघको अध्यक्षबाट त हट्‍न नमानेका देउवाले पार्टी सभापति सहजै छोड्दैनन् ।'

१४औँ महाधिवेशनमा सभापति उठ्ने तयारी गरेका देउवाले आफ्नो पक्षमा वातावरण निर्माणका लागि समूह परिचालन गरिसकेका छन् । यता, देउवालाई महाधिवेशनमा हराउनका निम्ति संस्थापनइतर पक्षबाट साझा उम्मेदवार बनाउनुपर्ने निष्कर्ष निकालेको पौडेल समूह भने विभाजित हुन थालेको छ । उनीहरू सार्वजनिक मञ्चमै एकअर्काप्रति आरोप प्रत्यारोपमा उत्रिन थालेका छन् ।

सभापतिमा दाबी नछोड्ने भएपछि देउवाले प्रदेश-प्रदेशमा संयोजनका निम्‍ति नौ नेतालाई जिम्मेवारी दिएका छन् । देउवाले प्रदेश १ मा ज्ञानेन्द्रबहादुर कार्की, प्रदेश २ मा रमेश रिजाल र बागमतीमा प्रकाशशरण महतलाई समन्वयको जिम्मेवारी दिएका छन् ।

उता गण्डकी प्रदेशमा गोपालमान श्रेष्ठ, लुम्बिनीमा बालकृष्ण खाँण, कर्णालीमा पूर्णबहादुर खड्का र जीवनबहादुर शाही र सुदूरपश्चिममा समन्वयको जिम्मेवारी रमेश लेखक र एनपी साउदले पाएका छन् । 'सभापतिले प्रदेश अधिवेशनमा समन्वयका लागि टिम परिचालन गर्नुभएको छ । हाम्रो काम भनेको प्रदेश अधिवेशन विवादरहित बनाउने र सबै पक्षलाई समेट्ने हो,' २ नम्बर प्रदेशमा समन्वयको जिम्मेवारी पाएका नेता रमेश रिजालले भने ।

नौ नेताको काम महाधिवेशनका लागि माहौल सिर्जना गर्ने रहेको नेता रिजालले बताए । 'गुटकै पक्षमा माहौल त भन्न सुहाउँदैन तर सबैको भावनालाई कदर गर्दै समग्र अधिवेशनको पक्षमा माहौल सिर्जना गर्ने जिम्मेवारी हाम्रो हुनेछ,' उनले भने । आफ्नो जिम्मेवारी निर्वाहका लागि रिजाल कार्यक्षेत्रमा खटिएका छन् । अन्य नेताहरू पनि आफ्नो कार्यक्षेत्र जाने तयारी गरिरहेका छन् ।

यता विगत तीन वर्षदेखि देउवालाई नेतृत्वबाट विस्थापन गर्नुपर्ने एजेण्डा बनाउँदै आएका पौडेल पक्षका नेताहरू भने तितरबितर भएका छन् । प्रतिनिधिसभा र प्रदेशसभाको निर्वाचनपछि देउवालाई हटाउनका लागि विशेष महाधिवेशन र अर्ली महाधिवेशनको माग गर्दै आएको यो समूहभित्रका नेताहरू सार्वजनिक कार्यक्रममा एकअर्काप्रति आक्रोश पोख्दै आएका छन् ।

नेता प्रकाशमान सिंहले बारम्बार वरिष्ठ नेता रामचन्द्र पौडेलले पार्टी चलाउन नसक्ने बताउँदै आएका छन् । उनले छुट्टै प्यानल बनाएर उम्मेदवारी दिन सक्ने उनीनिकट नेता राजन केसी बताउँछन् ।' पार्टीको महामन्त्री र उपप्रधानमन्त्री भइसक्नुभएकाले उहाँले सभापतिमा हचुवाका भरमा दाबी गरिरहनुभएको छैन । उहाँले प्यानल बनाएर उम्मेदवारी दिन सक्नुहुन्छ,' केसीले भने ।

बिहीबार राजधानीमा सम्पादकहरूसँग कुरा गर्दै उनले सभापति देउवाले पार्टीलाई भद्रगोल बनाएकाले आफूले उम्मेदवारी दिन खोजेको बताए । 'सभापति देउवाले पार्टीलाई भद्रगोल बनाए । त्यसको व्यवस्थापनका निम्ति मैले उम्मेदवारी दिन लागेको हुँ,' उनको भनाइ छ ।

आफूहरूबीचको एकता टुटे देउवालाई पराजित गर्न कठिन रहेको निष्कर्ष यो समूहको छ । २५ कात्तिकमा पौडेल समूहले राखेको आफू पक्षका केन्द्रीय सदस्यहरूको भेलामा महामन्त्री कोइरालाले भनेका थिए, 'हामी एक ढिक्का नहुने हो भने पार्टी फेरि देउवालाई बुझाए हुन्छ ।'

महाधिवेशनमा आफ्नो समूहमा नेतृत्व ल्याउन एक ढिक्का हुनुपर्ने बताएका कोइरालाले गत सोमबार सर्लाही पुगेर प्रकाशमान सिंहलाई काठमाडौंबाहिर कसैले पनि नचिन्ने भनेर चिढ्याए । त्यसको जवाफ बुधबार विराटनगरबाट दिँदै सिंहले कोइरालाले पदमा हुँदा केही काम नगरेको भन्दै १३औँ महाधिवेशनपछि आफू महामन्त्री हुँदाको रेकर्ड हेर्न सुझाए । उनले आफूलाई अपमानित नगर्न पनि चेतावनी दिए । 'कहिले काठमाडौँमा चिन्दैनन् भने अहिले काठमाडौंबाहिर चिन्दैनन् भने । म महामन्त्री हुँदा सभापतिभन्दा बढी भोट ल्याएको हुँ । मेरो रेकर्ड हेर्दा हुन्छ,' उनले भनेका छन् ।

नेतृत्वमा बसेकाहरूले एकअर्काको सह-अस्तित्व स्वीकार गर्न नसक्ने परिस्थिति निर्माण हुनु दु:खद रहेको पौडेल समूहका केन्द्रीय सदस्य गुरुराज घिमिरे बताउँछन् । यसले कार्यकर्ताहरूमाझ पनि नकारात्मक सन्देश पुग्ने भएकाले उनीहरू सच्चिनुपर्ने नेता घिमिरेको भनाइ छ । 'प्रजातान्त्रिक पार्टीमा सह-अस्तित्व निषेध हुनै सक्दैन । कुनै पनि नेताबिना आधार उचाइमा पुगेका छैनन् । कसैलाई कसैले पनि अवमूल्यन गर्ने प्रयास गर्नु हुँदैन । नेताहरू सच्चिनुपर्छ,' उनले भने ।

कार्यकर्ताहरूको माग नेतृत्व परिवर्तन रहेकाले उनीहरूको आकांक्षामा चोट पुग्ने किसिमको गतिविधि नेताहरूले रोक्नुपर्ने र आफ्नो समूहलाई बलियो बनाएर अघि बढ्नुपर्ने नेता घिमिरेको भनाइ छ । 'अर्को समूहको कुरा भएन, हाम्रो समूहमा आफूलाई आन्तरिक रूपमा व्यवस्थित गर्नका निम्ति ढिलाइ भइसक्यो । उहाँहरू एकताबद्ध हुनैपर्छ । कार्यकर्ताहरूको मनोभावनाविपरीत चल्न मिल्दैन ।'

६ गतेभित्र उम्मेदवारी टुंगो लगाउन त्यस समूहका नेताहरूले शीर्ष नेतालाई दबाब दिइरहेका छन् ।

प्रकाशित मिति: बिहीबार, मंसिर २, २०७८ १७:३३