दार्चुलाको छाङरु र तिंकर गाउँमा जनगणना गर्न भारतको अवरोध

फाइल तस्वीर ।

A+ A A-

देशभर जनगणना सुरु भए पनि दार्चुलाको ब्यास गाउँपालिका-१ को छाङरु र तिंकर गाउँमा आइतबारसम्म जनगणना सुरु भएको छैन । जनगणनाका लागि छाङरु र तिंकर गाउँमा गणक पठाउन समस्या भएकाले जनगणना गर्न नसकिएको जिल्ला जनगणना कार्यालय दार्चुलाले जनाएको छ ।

ब्यास क्षेत्र जाँदा भारतको बाटो प्रयोग गर्नुपर्ने हुन्छ । सो क्षेत्र जान भारतीय अनुमति चाहिन्छ । अतिक्रमित क्षेत्रमा समेत जनगणना गर्ने दाबी गरिरहेको सरकारले नेपालकै भोगचलन र स्वामित्वमा रहेका गाउँमा समेत जनगणना गर्न कठिन भएको छ । भारतले गुञ्जी, नाभी र कुटीलगायतका माथिल्लो क्षेत्र नोटिफाइड एरिया घोषित गरिएकाले उक्त क्षेत्रमा प्रवेश गर्दा अनिवार्य पास माग्ने गरेको छ । ब्यास गाउँपालिकाको वडा नम्बर १ मा पर्ने पाँच गाउँहरु कुटी, नाभी, गुञ्जी, तिंकर र छाङरु गाउँमध्ये कुटी, नाभी र गुञ्जी गाउँ भारतले अतिक्रमण गरेको छ ।

भारतले अनुमति नदिँदा गणकलाई फिल्डमा पठाउन नसकिएको दार्चुलाका जिल्लाका सहायक जनगणना अधिकृत खगेन्द्र कार्कीले बताए । उनले भने, ‘तिंकर र छाङरुका अधिकांश परिवार जाडो छल्न सदरमुकाम खलंगा झरेका छन् । हामी अनुमतिका लागि समन्वय गरिरहेका छौँ । घरपरिवार सूचीकरणका लागि जाँदा पनि अनुमति नै मागेर गाएका थियौं । अहिले अनुमति दिन मानेको छैन ।’

दार्चुलामा जनणनाका लागि १८३ गणक खटाइएको छ । गाउँपालिकाका अन्य वडामा समयमै गणकहरु पुगे पनि वडा नम्बर १ मा जान भारतले अवरोध गर्दा अझ पनि पुग्न नसकेको कार्कीको भनाइ छ । भारतले अतिक्रमण गरेका गुञ्जी, नाभी र कुटीबाहेक तिंकर र छाङरु गाउँमा नेपाल सरकारको प्रशासनिक अधिकार कायम भए पनि गाउँसम्म जाने बाटो नहुँदा जनगणना गर्न समस्या भएकोे छ । चिसो बढ्न थालेपछि ब्याँस गाउँपालिकाको तिंकरमा रहेको नेपाल प्रहरी छांगरु झरेपछि सुरक्षाविहीन बनेको छ ।

प्रकाशित मिति: आइतबार, कात्तिक २८, २०७८ १६:०५