एमाले पालिका अधिवेशन : यी हुन् लुम्बिनीका चार उपमहानगरका कमाण्डर

A+ A A-

नेकपा एमालेको १०औँ महाधिवेशन अन्तर्गत मंगलबार नगर अधिवेशन सम्पन्न भएको छ । लुम्बिनी प्रदेशका अधिकांश पालिकामा पनि अधिवेशन भएसँगै नयाँ नेतृत्व आएको छ । यहाँका चार उपमहानगरमा सर्वसम्मत रूपमा नयाँ नेतृत्व आएको पार्टीले जनाएको छ ।

नेतृत्व सर्वसम्मत गराउन केन्द्रीय नेताहरू नै गृहजिल्लामा आएका छन् । रुपन्देहीमा पूर्वमन्त्री विष्णु पौडेल आएर सर्वसम्मत गराएका छन् । नेतृत्वको लागि सर्वसम्मत भए पनि केही पदमा भने निर्वाचन हुने जनाइएको छ । यस्तै लुम्बिनी प्रदेशका निवर्तमान मुख्यमन्त्री शंकर पोखरेलले पनि आफ्नो गृहजिल्ला दाङमा सबै पालिकामा सर्वसम्मत नेतृत्व चयन गराएका छन् ।

बुटवलमा किशन ज्ञवाली सर्वसम्मत

बुटवल उपमहानगरको अध्यक्ष र उपाध्यक्ष पदसहित रुपन्देहीका १२ पालिकाहरूमा सर्वसहमतिमा नेतृत्व चयन भएको छ । तीनवटा नगरपालिका र एउटा गाउँपालिकाबाहेक सबैमा सर्वसम्मत रूपमा नेतृत्व चयन भएको एमालेले जनाएको छ ।

छ जनाले आकांक्षा देखाएको बुटवलकाे अध्यक्षमा किशन ज्ञवाली सर्वसम्मत चयन भएका छन् । शोभाकर पोखरेल उपाध्यक्ष भएका छन् । सचिव र उपसचिव भने कसलाई बनाउने भन्ने विषयमा छलफल भइरहेको छ ।

तुलसीपुर अध्यक्षमा माधव ओली

एमालेकाे तुलसीपुर नगर कमिटीको अध्यक्षमा माधव ओली सर्वसम्मत चयन भएका छन् । तुलसीपुरमा सम्पन्न प्रथम नगर अधिवेशनले ओलीको अध्यक्षतामा ८५ सदस्य नगर कमिटी गठन गरेको हो ।

यहाँ उपाध्यक्षमा लक्ष्मण चौधरी, सचिवमा रुपबहादुर खत्री, सहसचिवमा युवा करारा, छवि खरेल, र आर्थिक विभाग प्रमुखमा टोपेन्द्र केसी चयन भएका निर्वाचन समितिका सदस्य गोकर्ण वलीले जानकारी दिए ।

त्यसैगरी प्रत्येक वडाबाट ३/३ जना र दलित, जनजाति, अल्पसंख्यक, महिला र खुल्लाबाट समेटिएको छ ।

घोराही अध्यक्षमा भुवन चौधरी

घोराही उपमहानगरपालिकामा भुवन चौधरीको अध्यक्षतामा ७३ सदस्यीय नगर कमिटी गठन गरिएको छ । उपाध्यक्षमा तारा पुरी, सचिव ईन्द्र बुढाथोकी, उपसचिव काशीराम खनाल र कुलबहादुर गोतामे चयन भएका छन् ।

नेपालगञ्जकाे अध्यक्षमा दत्तप्रसाद आचार्य

नेपालगञ्जमा दत्तप्रसाद आचार्यको नेतृत्वमा ७५ सदस्यीय पालिका कमिटी चयन भएकाे छ । उपाध्यक्षमा हाजी अब्दुल हकिम, सचिवमा मोहित शाह, उपसचिव दिग्वीजय ढुंगाना र उषा थापा भण्डारी रहेकाे कमिटी चयन भएकाे हाे ।

प्रकाशित मिति: बुधबार, कात्तिक १०, २०७८ १३:२२