कांग्रेस अधिवेशन: बुटवल र तुलसीपुर उपमहानगरमा पौडेल समूह विजयी, घोराहीमा देउवा पक्ष हावी

कांग्रेस अधिवेशन: बुटवल र तुलसीपुर उपमहानगरमा पौडेल समूह विजयी, घोराहीमा देउवा पक्ष हावी

A+ A A-

लुम्बिनी प्रदेशका तीन उपमहानगरपालिकामा कांग्रेसको अधिवेशन सकिएको छ ।

लुम्बिनी प्रदेशमा शनिबार भएको अधिवेशनबाट बुटवल र तुलसीपुर उपमहानगरपालिकामा वरिष्ठ नेता रामचन्द्र पौडेल समूह विजयी भएको छ । यस्तै घोराही उपमहानगरपालिकामा भने सभापति शेरबहादुर देउवा समूह विजयी भएको छ ।

पौडेल समूहबाट रूपन्देहीको बुटवल उपमहानगरपालिकाको सभापतिमा खेलराज पाण्डे र दाङको तुलसीपुर उपमहानगरपालिकामा सुरेश हमाल निर्वाचित भएका छन् । यस्तै, दाङको घोराही उपमहानगरपालिकाको सभापतिमा भने सभापति शेरबहादुर देउवानिकट तिलक रावल निर्वाचित भएका छन् ।

बुटवलमा पाण्डे तेस्रो कार्यकालका लागि निर्वाचित

कांग्रेसको बुटवल उपमहानगरपालिकाको सभापतिमा खेलराज पाण्डे निर्वाचित भएका छन् । सभापति देउवा समूहकी उम्मेदवार रिता केसीलाई पराजित गर्दै पौडेल समूहका पाण्डे सभापतिमा तेस्रो पटक निर्वाचित भएका हुन् । सभापतिमा निर्वाचित पाण्डेले ४१२ मत प्राप्त गर्दा केसीले १२४ मत पाइन् ।

उपसभापतिमा पाण्डे समूहकै ज्योति भण्डारी र हितमान पुन निर्वाचित भएका छन् । उनीहरूले नरबहादुर रजाली र हरिलाल सुनारलाई पराजित गरे । यस्तै सचिवमा सचिवमा गंगा पन्थी र छाया पोखरेल, सहसचिवमा देवलाल अर्गली र गणेश घिमिरे निर्वाचित भएका छन् । उनीहरू सबै पाण्डे समूहकै हुन् ।

तुलसीपुरमा हमाल निर्वाचित

कांग्रेसको तुलसीपुर उपमहानगरपालिकाको सभापतिमा सुरेश हमाल निर्वाचित भएका छन् ।

सभापति शेरबहादुर देउवा समूहबाट सभापतिमा उम्मेदवारी दिएका अनिल कार्कीलाई पराजित गर्दै हमाल सभापतिमा निर्वाचित भएका हुन् । सभापतिमा निर्वाचित हमाल वरिष्ठ रामचन्द्र पौडेल समूहका हुन् । सभापतिमा निर्वाचित हमालले २६८ मत प्राप्त गर्दा उनका निकटत प्रतिद्वन्द्वी कार्कीले २०८ मत पाए ।

नगर समितिको पदाधिकारीमा एक जना उपसभापतिबाहेक सबै हमाल प्यानलबाटै निर्वाचित भएका छन् । यस्तै उपसभापतिमा हमाल समूहका विनिल केसी र कार्की समूहका गौरव सुवेदी विजयी भए । केसीले ३५९ मत र सुवेदीले २८५ मत प्राप्त गरे । हमाल समूहबाट उपसभापतिका उम्मेदवार रहेका पिमलाल डाँगीले २५३ र कार्की समूहका अशोककुमार श्रेष्ठले १८९ मत पाएका थिए ।

यसैगरी दुई सचिवमा हमाल समूहकै विमल पौडेल र सुशील वली निर्वाचित भए । पौडेलले ३२९ र वलीले २७५ मत प्राप्त गरे । कार्की समूहबाट सचिवमा लडेका भोजराज न्यौपानेले २१७ र परशुराम चौधरीले १७६ मत पाए भने स्वतन्त्र उम्मेदवार तिलकबहादुर बस्नेतको ६९ मत प्राप्त गरे ।

सहसचिवमा हमाल समूहकै शेषमणि भण्डारी ३५१ मत र झनकबहादुर बस्नेतले ३३० मतका साथ निर्वाचित भए । कार्की समूहबाट सहसचिवमा उम्मेदवारी अशोक भण्डारीले २१० र तिलसरा वलीले १७६ मत पाएका छन् । तुलसीपुर उपमहानगरपालिकामा रहेका कूल ५९३ मतदाता रहेकोमा ५९१ मत खसेको थियो ।

घोराहीमा देउवा समूहका रावल निर्वाचित

कांग्रेस घोराही उपमहानगरपालिकाको सभापतिमा तिलक रावत निर्वाचित भएका छन् ।

शनिबार राति सकिएको निर्वाचनबाट सभापतिका प्रत्यासी निरज गिरीलाई पराजित गर्दै रावल सभापतिमा निर्वाचित भएका हुन् । सभापतिमा निर्वाचित रावलले २८६ मत प्राप्त गर्दा उनका प्रतिद्वन्द्वी गिरीले १६२ मत मात्रै पाए ।

त्यस्तै उपसभापतिमा दुर्लभ केसी २९४ र प्रदीप सुवेदी २३५ मत प्राप्त गरी विजयी भए । उपसभापतिका प्रत्यासी श्रीधर महराले २०० र बेदबहादुर लामिछानेले १२५ मत प्राप्त गरे ।

सचिवमा भिमकान्त चौधरी २९१ मत र पुष्पराज आचार्य २६० मत प्राप्त गरी विजयी भए भने सचिवमा प्रत्यासीहरू किरण पौडेलले १४९ र मनोज केसीले १७१ मत पाए ।

यसैगरी सहसचिवमा चेतन बस्नेत २९५ मत र राजकुमार बस्नेत २८२ मतका साथ विजयी हुँदा प्रत्यासीहरू सतिश शर्माले १३६ र भरत धितालले १४९ मत पाए । घोराही उपमहानगरपालिकाका रहेको कूल ४६८ मतमध्ये ४६२ मत खसेको थियो ।

प्रकाशित मिति: आइतबार, असोज १०, २०७८ १३:४०