एमालेमा प्रभु साहको आठबुँदे फरक मत, विधान महाधिवेशन हाेइन एकता महाधिवेशन गर्न माग

एमालेमा प्रभु साहको आठबुँदे फरक मत, विधान महाधिवेशन हाेइन एकता महाधिवेशन गर्न माग

A+ A A-

नेकपा एमालेको जारी केन्द्रीय कमिटीको बैठकमा केन्द्रीय सदस्य प्रभु साह आठबुँदे फरक मतसहित उपस्थित भएका छन् ।

साहले एमालेलाई नेकपाको निरन्तरताका रूपमा व्याख्या गर्दै जनताको जनवादलाई परिस्कृत गर्नुपर्ने प्रस्ताव गरेका छन् । साह एमालेले भनेझैँ जनताकाे बहुदलीय जनवादकाे पक्षमा उभिन नसक्ने बताइरहेका छन् । त्यसबाहेक उनकाे पदीय जिम्मेवारीमा पनि असन्तुष्ट छन् ।

नेकपा विभाजनका समयमा अध्यक्ष केपी ओली पक्षमा लागेका साह अहिले एमालेमा असन्तुष्ट छन् । साह एमालेको विधान महाधिवेशनको पक्षमा पनि छैनन् । साहको भनाइ एमालेले एकताको महाधिवेशन गर्नुपर्ने मत छ । त्यसमा पूर्वमाओवादी नेताहरूले साथ दिएका छैनन् । रामबहादुर थापा बादलसहित साहकाे टाेली नेकपा विभाजनका बेला अध्यक्ष ओलीकाे पक्षमा खुलेको थियो र साह शहरी विकासमन्त्री पनि भएका थिए ।

पछिल्ला समय साहको पूर्वमाओवादी नेताहरूसँग पनि दूरी बढेको छ । त्यसैले उनी फरक मतसहित एमालेको बैठकमा सहभागी भइरहेका छन् । साहले आठबुँदे प्रस्ताव छलफल र सम्बोधन नभए एमालेमा बस्न नसक्ने बताउन थालेका छन् । एमालेले माग सम्बाेधन गर्न नचाहेको स‌ंकेत बुझेर साह नयाँ पार्टी निर्माणमा जुटेका छन् । कतिपयले आईटी आर्मीको ब्यानरमा साहले उपस्थिति जनाउनुको कारण पनि नयाँ पार्टी निर्माणको प्रयासका रूपमा बुझेका छन् ।

एमालेमा साहको माग सम्बोधन गर्ने प्रयास पनि भइरहेको छ । प्रदेश २ को प्रदेश कमिटी बनाउने क्रममा साहलाई अध्यक्ष ओलीले बेवास्ता गरेको भन्दै साह असन्तुष्ट देखिएका हुन् । पूर्वमाओवादी नेताहरू रामबहादुर थापा बादल, टोपबहादुर रायमाझी, लेखराज भट्टसहितका नेताहरूको टोलीमा साह थिए ।

तर, प्रदेश २ मा ओलीले प्रदेश २ को अध्यक्ष बनाउने क्रममा ज्वालाकुमारी साहलाई अगाडि सारेका थिए । त्यसबाहेक एमाले स्थायी कमिटी सदस्य सत्यनारायण मण्डलसँग पनि साहको मत मिलेको छैन । साहको चाहना स्थायी कमिटी सदस्य हुनु पनि हो ।

तर, अध्यक्ष ओली सहजै उनलाई स्थायी कमिटी सदस्य दिन तयार छैनन् । जनमतका हिसाबले प्रदेश २ मा बलियो मानिने साहलाई छुटाउन अध्यक्ष ओलीले पनि चाहिरहेका छैनन् । यद्यपि पछिल्लो समय ओलीसँग साहको दूरी बढ्दै गएको छ ।

प्रकाशित मिति: शुक्रबार, असोज ८, २०७८ १३:१९