३.६९ प्रतिशतले घट्यो नेप्से, सबै सूचक ओरालो लाग्दा कारोबार रकम भने घटेन

A+ A A-

आइतबार नेप्से सूचकमा ठूलो गिरावट आएको छ । सूचक आज १०८.१४ अंकले घटेर २८१८.३५ मा पुगेको हो ।

बजारका सबै सूचक घटेसँगै नेप्से ओरालो लागेको छ । पछिल्लो केही दिनदेखि निरन्तर गिरावट आइरहेको बजारमा यसले आइतबार पनि निरन्तरता पायो ।

आइतबार सबैभन्दा धेरै गिरावट फाइनान्स समूहमा आयो । कुल ८.०१ प्रतिशत घटेको यो क्षेत्रबाहेक डेभलपमेन्ट बैंक (७.२१ प्रतिशत) र हाइड्रोपावर (६.०५ प्रतिशत) को सूचकमा समेत उच्च गिरावट आयो ।

बजारका सबै सूचक राताम्मे हुँदा जम्मा छवटा कम्पनीको शेयर मूल्य मात्र उकालो लाग्यो । सानिमा लाइफ इन्स्योरेन्स (९.९७ प्रतिशत) , मनकामना स्मार्ट लघुवित्त (४.०२ प्रतिशत), गुराँस लघुवित्त (१.९४ प्रतिशत), प्रोगेसिभ फाइनान्स (१.७६ प्रतिशत), माउन्टेन इनर्जी नेपाल (०.७५ प्रतिशत) र आईएमई जनरल इन्स्योरेन्स (०.१७ प्रतिशत) को सूचक मात्र बढ्यो ।

आज कुल २२३ कम्पनीको शेयर कारोबार हुँदा कुल ११ अर्ब २४ करोडभन्दा बढी रकमको कारोबारसमेत भयो ।

गुडविल फाइनान्स, जानकी फाइनान्स, अरुण काबेली हाइड्रो, आईसीएफसी फाइनान्स, युनिभर्सल पावर, समृद्धि फाइनान्स, रियायन्स फाइनान्स, सीएचडीसी हाइड्रो, रुरु जलविद्युत, नारायणी डेभलपमेन्ट बैंक, नेपाल फाइनान्स, हिमालय ऊर्जा र बेस्ट फाइनान्सको नकारात्मक सर्किट नै लाग्यो ।

दुई दिनपछि सुरु भएको कारोबार बिहान बजार खुल्ला प्रि–ओपन मार्केटमा बढे पनि नियमित कारोबार सुरु भएपछि भने ओरालो लागेको थियो । निरन्तर सूचक ओरालो लागेर ५ प्रतिशतको सीमा नाघेपछि कारोबार नै ४० मिनेटका लागि रोकिएको थियो ।

४० मिनेटपछि खुलेको बजारमा केही सुधार आयो । सूचक विस्तारै माथि उकालो लागे पनि अन्तिम कारोबार समयमा भने सूचक फेरि ओरालो लागेर कुल ३.६९ प्रतिशत अर्थात् १०८.१४ अंक ओरालो लागेको हो ।