कर्णाली सरकारले भन्यो– प्रतिपक्षको अवरोधले अध्यादेशमार्फत बजेट ल्याउनु पर्‍यो

कर्णाली सरकारले भन्यो– प्रतिपक्षको अवरोधले अध्यादेशमार्फत बजेट ल्याउनु पर्‍यो

A+ A A-

कर्णाली प्रदेश सरकारले प्रतिपक्षी दल एमालेको अवरोधका कारण अध्यादेशमार्फत बजेट ल्याउनु परेको बताएको छ ।

शुक्रबार पत्रकार सम्मेलन गरी आर्थिक मामिला तथा योजनामन्त्री गोपाल शर्माले आफूहरुले संसदबाटै बजेट ल्याउन खोजे पनि प्रतिपक्षी दल एमालेका कारण अध्यादेशमार्फत ल्याउनु परेका बताएका हुन् ।

उनले अवरोधका कारण अध्यादेशमार्फत बिडम्बनापूर्ण भएको बताए । ‘अध्यादेशमार्फत बजेट ल्याउनु पर्ला भनेर हामीले कल्पना पनि गरेका थिएनौं । प्रदेशसभामा टेबुल भएको बजेट अध्यादेशमार्फत ल्याउनु परेको छ,’ उनले भने, ‘प्रतिपक्षको निरन्तर अवरोधका कारण हामीले वैकल्पिक बाटो रोजेका हौं । यो बिडम्बनाको विषय हो ।’

पेश्की बजेट ल्याउँदा चालुतर्फको खर्च मात्र गर्न पाइने भएकाले अध्यादेशमार्फत बजेट ल्याएको मन्त्री शर्माले बताए । ‘कर्णालीमा भौगोलिक कठिनाइका कारणले विकास निर्माणमा असर पर्ने भएकाले अध्यादेशमार्फत बजेट ल्याएका हौं,’ उनले भने, ‘प्रतिपक्षले बजेटको कार्यसूचीमा प्रवेश गर्न दिएन ।’

एमाले कानुनी प्रक्रियामा जाने

प्रदेशसभाबाट पास हुनुपर्ने बजेट अध्यादेशमार्फत ल्याएको भन्दै प्रमुख प्रतिपक्ष दल एमालेले कानुनी प्रक्रियामा जाने बताएको छ ।

वतर्मान सरकार संवैधानिक रुपमा गठन नभएकाले अध्यादेशमार्फत बजेट ल्याउने कुनै संवैधानिक अधिकार नभएको एमालेको दाबी छ । संसद हुँदाहुँदै अध्यादेशमार्फत बजेट ल्याएकाले कानुनी प्रक्रियामा जाने एमाले कर्णाली प्रदेशसभाका सचेतक गुलावजंग शाहले बताए ।

‘वर्तमान सरकारको बजेट ल्याउने कुनै हैसियत छैन,’ उनले भने, ‘गलत प्रक्रियाबाट बजेट आएकाले कानुनी प्रक्रियामा जान्छौँ ।’

प्रकाशित मिति: शुक्रबार, साउन १, २०७८ १७:५५