हर्पन खोलामा निर्माण भएको सिल्टेसन ड्यामको विषयमा कानुनी उपचार खोजिने

A+ A A-

फेवातालको शिर हर्पन खोलामा निर्माण भएको सिल्टेसन ड्याममा वर्षाका कारण गम्भीर क्षति पुगेको विषयमा सामाजिक सञ्जाल तथा सञ्चार माध्यममा आएका टीकाटिप्पणीप्रति पोखरा महानगरपालिकाले गम्भीर ध्यानाकर्षण भएको जनाएको छ ।

फेवाताल संरक्षणको उद्देश्य राखेर गण्डकी प्रदेश सरकारसँगको सहकार्यमा महानगरले चार वटा खोलामा निर्माण गरेका सिल्टेसन ड्याममध्ये हपर्न खोलामा बनाइएको डयाममा क्षति पुगेको बारेमा आएका प्रतिक्रियामा महानगरपालिकाका प्रवक्ता धनबहादुर नेपालीले आइतबार एक विज्ञप्ति प्रकाशित गरी ध्यानाकर्षण भएको जनाएका हुन् ।

'क्षतिग्रस्त उक्त सिल्टेसन डयामको गुणस्तर तथा निर्माणका क्रममा तयार गरिएको डिजाइनको विषयमा केन्द्रित भई प्रतिक्रिया आएको पाइएको छ,' विज्ञप्तिमा भनिएको छ, 'डिजाइनमा भएको त्रुटिका कारणले यस्तो घटना भएको हो वा होइन भनी सो ड्यामको डिजाइन तयार गर्ने परामर्शदातालाई यस कार्यालयको तर्फबाट स्पष्टीकरण सोधिएको छ ।'

अघिल्लो बर्सातमा ड्याममा भएको क्षतिपश्चात गरिएको मर्मतको विषयमा प्रश्न उठाई उक्त निर्माण कार्यमा संलग्न निर्माण व्यवसायीलाई पुनः मर्मतसम्भार गर्न पत्राचार गरिएको भन्दै डिजाइनकर्ता तथा निर्माण व्यवसायीका तर्फबाट कुनै जवाफ प्राप्त नभएकाले महानगरपालिकाले ताकेता गरेको विज्ञप्तिमा उल्लेख गरिएको छ ।

'आयोजनाको त्रुटि सच्याउने अवधि तथा बीमालगायतका विषयमा महानगरपालिकाले थप स्पष्ट हुने प्रयास गरेको छ,' जारी विज्ञप्तिमा भनिएको छ, 'सम्बन्धित पक्षले कानुनी दायित्वबाट कुनै उन्मुक्ति नपाउने तथा कार्यालयले कानुनी रूपमा आफ्नो हित रक्षाका लागि चाल्नुपर्ने सम्पूर्ण कदम चाल्ने र उक्त प्रकरणलाई सार्वजनिक खरिदसम्बन्धी विद्यमान नेपाल कानूनबमोजिम निष्कर्षमा पुर्‍याउने छ ।'

सोही चरणमा निर्माण गरिएका अन्य तीन वटा ड्याम महानगरपालिकाको सार्वजनिक निजी साझेदारी ऐनबमोजिम मर्मत सुधार तथा पुनःनिर्माणका लागि अर्को कम्पनी फेवा सिल्टेसन प्रालिसँग हालै सम्झौता भई संरक्षणको कार्य आरम्भ भएको जानकारी गराउँदै उक्त सम्झौताबमोजिम सो प्रालिसँग वार्ता गरी स्थानीयवासीले उठाएका विषय तथा हाल ड्याममा पुगेको क्षतिलगायत उत्पन्न परिस्थितिको समाधान खोजिने विज्ञप्तिमार्फत स्पष्ट पारिएको छ ।

फेवाताल संरक्षणका लागि पोखरा– २३ स्थित हर्पनखोला घाँटीछिनामा सात करोड ८८ लाख ६२ हजारको लागतमा १०० मिटर लम्बाइ, १०० मिटर चौडाइ एवं चार मिटर उचाइ रहेको चेक ड्याम तथा सिल्ट पोखरीको निर्माण गरिएको थियो ।

प्रकाशित मिति: सोमबार, असार २८, २०७८ ०९:१२