अर्थमन्त्रीको मुडः कर धेरै नबढाउने, तलब भत्ता सकिने जति बढाउने

A+ A A-

अर्थमन्त्री डा. युवराज खतिवडाले आगामी आर्थिक वर्षको बजेट करिब तयार गरिसकेका छन् । चालू आर्थिक वर्षको बजेट तयार पार्दा अनुदार अर्थमन्त्रीको उपमा पाएका डा. खतिवडाले यसपटक भने जस लिने मनस्थितिमा रहेकाे उनी निकट स्रोत बताउँछ ।

‘चालू आर्थिक वर्षको बजेट तयार पार्दा अर्थमन्त्रीज्यूलाई अनुदार अर्थमन्त्रीको आरोप लगाइयो । सरकारले यो वर्षलाई आधार वर्षका रुपमा घोषणा गरेकोले बजेटले आर्थिक विकासका आधारशिला निर्माणलाई जोड दिएको थियो । आगामी आर्थिक वर्षको बजेटले यो वर्ष तयार भएको आधारशिलामा टेकेर आर्थिक वृद्धि गर्ने लक्ष्य लिनेछ,’ डा. खतिवडा निकट स्रोतले शिलापत्रसँग भन्यो ।

अर्थमन्त्री डा. खतिवडाले आगामी आवकाे बजेट निर्माणमा गत वर्षको तुलनामा निकै धेरै परामर्श पनि गरेका छन् । डा. खतिवडाले उद्योगी व्यवसायी, पेसाकर्मी, कर्मचारी युनियन, अर्थशास्त्रीलगायतसँग यो वर्ष बढी परामर्श गरेकाे उनी निकट स्रोत बताउँछ ।

फेरि यो सरकारको अर्थमन्त्रीको हैसियतमा डा. खतिवडाको यो बजेट नै अन्तिम पनि हुन सक्छ । डा. खतिवडा राष्ट्रिय सभामा दुई वर्षका लागि सांसद भएका हुन् । आगामी चैतमा उनको कार्यकाल सकिँदै छ । सत्तारुढ नेकपाले डा. खतिवडालाई अर्काे कार्यकालका लागि राष्ट्रिय सभामा लगेन भने उनले अर्काे बजेट ल्याउन पाउनेछैनन् ।

यसकारण, आगामी आवकाे बजेटमार्फत सबैको चित्त बुझाउने मनस्थितिमा डा. खतिवडा छन् । बजेट निर्माणका क्रममा गत वर्षभन्दा यस वर्ष बढी परामर्श गर्नुको कारण पनि सबैको चित्त बुझाउने उनको रणनीतिकै रूपमा व्याख्या गरिँदै छ ।

डा. खतिवडाले करिब तयार पारेको बजेटमा लोकप्रिय कार्यक्रम धेरै रहेको उनी निकट स्रोत बताउँछ । उद्यमशीलता विकासका लागि नगद अनुदान, ब्याज अनुदान दिने ऋण कार्यक्रम, विभिन्न प्रकारका छुट तथा प्रोत्साहनका कार्यक्रम समावेश गरिने स्रोतको भनाइ छ ।

यस्तै, आगामी आवकाे बजेटमा करका दर धेरै परिवर्तन नहुने स्रोतको दाबी छ । गत वर्ष नै करका दर बढाइएकोले यस वर्ष दरमा खासै परिवर्तन नगर्ने मुडमा अर्थमन्त्री डा. खतिवडा रहेको मन्त्रालय स्रोतले बतायो ।

‘गत वर्षको बजेटले करका दरमा निकै परिवर्तन गरेको थियो, लगानी आकर्षित गर्न पनि करकाे दर छिटो छिटो परिवर्तन गर्नुहुन्न भन्ने अर्थमन्त्रीज्यूको धारणा छ । कर्मचारीको तलब नबढाएको, वृद्धभत्तासहितका सामाजिक सुरक्षा रकम यथावत् राखेर चुनावी घोषणपत्रविपरीतको बजेट बनाइएको जस्ता आरोप पार्टीभित्रै लागेकोले यस वर्ष यी सबै आरोपबाट मुक्त हुने गरी बजेट बनाउने अर्थमन्त्रीको योजना देखिन्छ,’ अर्थ मन्त्रालय स्रोतले भन्यो ।

तर, केही वस्तुमा कर भने बढ्ने स्रोतको दाबी छ । बजार मूल्यअनुसार केही वस्तुको कर समायोजन गर्नुपर्ने बाध्यताको कारण मात्रै केही वस्तुमा कर बढ्ने बताइएको छ ।

‘एक किलोको यति, एक लिटरमा यति वा प्रतिक्विन्टलमा यति भन्ने प्रकारका करलाई ती वस्तुको बजार मूल्यअनुसार पनि समायोजन गर्नुपर्छ । बाँकी वस्तुमा धेरै कर बढ्दैन होला । करकाे दर बढ्ने प्रकारले आन्तरिक छलफल भएको छैन,’ स्रोतले भन्यो ।

आय करको सीमा बढ्ने

करकाे दर नबढाए पनि सरकारले आयकरको सीमा भने बढाउने भएको छ । अहिले अविवाहित व्यक्तिको वार्षिक ३ लाख ५० हजार रुपैयाँसम्मको आम्दानीमा १ प्रतिशत कर लाग्छ । विवाहित व्यक्तिको वार्षिक ४ लाख रुपैयाँसम्मको आम्दानीमा १ प्रतिशत मात्रै कर लाग्छ । सोभन्दा माथिको करमा वार्षिक आम्दानी अनुसार १० देखि ३६ प्रतिशतसम्म आय कर तिर्नुपर्छ ।

सरकारी कर्मचारीको तलब बढेको वर्ष आयकरको सीमा पनि बढ्ने गरेको छ । यस वर्ष सरकारले कर्मचारीको तलब बढाउने भएकोले आयकरको सीमा बढ्ने करिब निश्चित भएको अर्थका अधिकारीहरु बताउँछन् ।

सम्बन्धित सामग्री

सांसद कोष, कर्मचारीको तलब र वृद्धभत्ता बढ्ने

कति बढ्ला कर्मचारीको तलब ?

कर्मचारी युनियनको मागः पियनको तलब ५० हजार

खान लाउनै नपुग्ने आम्दानीमा केको कर ?

अर्थमन्त्रीज्यू ! ठूलो बजेट ल्याउनुअघि यी साना काम गर्ने कि ?

अर्थशास्त्रीको बजेट सुझावः लगानी प्रवर्द्धन र पूर्वाधार विकासमा जोड

अनि राजाले भने, ‘गो अहेड’

शिक्षा, स्वास्थ्य र सामाजिक सुरक्षाको जिम्मा राज्यले लिनुपर्छ

कर्मचारीको मागः पियनको तलब ३५ हजार, मुख्य सचिवको १ लाख ७५ हजार

निजामती कर्मचारीले मागे टेलिकम र वाणिज्य बैंकको १०/१० प्रतिशत सेयर

बजेटमा निजी क्षेत्रका सुझावः ऋणको ब्याज कम गरिदेऊ, कर्पाेरेट कर घटाऊ