कति बढ्ला कर्मचारीको तलब ?

A+ A A-

नयाँ संविधानअनुसार सरकारले १५ जेठमा आगामी आर्थिक वर्षको बजेट ल्याउँदै छ । बजेटमा सामाजिक सुरक्षा भत्ता र कर्मचारीको तलब बढाउने तयारी सरकारको छ । नेपाल कम्युनिस्ट पार्टी (नेकपा)लाई चुनावी घोषणापत्रअनुसार सामाजिक सुरक्षा भत्ता बढाउनुपर्ने दबाब छ भने तीन वर्षदेखि तलब नबढेको भन्दै कर्मचारीको ‘गनगन’ पनि सुन्नुपरेको छ ।

तत्कालीन अर्थमन्त्री विष्णु पौडेलले २०७३ सालमा तल्लो तहका कर्मचारीको तलब २५ प्रतिशतसम्म बढाएयता कर्मचारीको तलब बढेको छैन । तीन वर्षको बीचमा कर्मचारीका लागि दुई हजार रुपैयाँ महँगी भत्ता बढाइएको छ । यसैगरी, लत्ताकपडामा दिइने भत्ता साढे सात हजारबाट बढाएर १० हजार रुपैयाँ बनाइएको छ ।

अर्थमन्त्री डा. युवराज खतिवडा कर्मचारीको तलब बढाउने कुरामा ‘कन्भिन्स’ भइसकेका अर्थ मन्त्रालयका एक अधिकारीले बताए । उनका अनुसार तलब बढाउने/नबढाउने विषयमा चरणबद्ध छलफल गरेपछि अर्थमन्त्री तलब बढाउने निष्कर्षमा पुगेका छन् ।

यद्यपि, कर्मचारीले अपेक्षा गरे जति तलब नबढ्ने ती अधिकारीले बताए । सबैलाई एकमुस्ट रकम बढाउने, एउटै प्रतिशतले बढाउने वा तहअनुसार प्रतिशत मिलाएर बढाउने भन्नेमा टुंगो लाग्न बाँकी रहेको बताइएको छ ।

‘राजस्व वृद्धिदरको लक्ष्यमा त्यति राम्रो प्रगति भएन,’ ती अधिकारीले भने, ‘अबको वर्ष पनि २५ प्रतिशतभन्दा माथि जान सक्ने स्थिति छैन त्यसैले बजेट बनाउन स्रोतको उच्च चाप छ ।’

मन्त्रालयका ती अधिकारीका अनुसार अहिलेको तलबमा माथिल्लो तहका कर्मचारीको १० प्रतिशत र तल्लो तहका कर्मचारीको २० प्रतिशतसम्म वृद्धि हुन सक्छ । ‘जुनै विधि अपनाइए पनि योभन्दा बढ्ने सम्भावना छैन,’ उनले भने ।

बजेटका स्रोतको हिसाबकिताब भइरहेकाले १४ जेठअघि यसबारे टुंगो नलाग्ने ती अधिकारीले बताए ।

सरकारले यसपटक भने सामाजिक सुरक्षा भत्ता पनि बढाउने तयारी गरेको छ । ‘कम्तीमा पाँच सय रुपैयाँ भए पनि बढाउने तयारी छ,’ अर्थका ती अधिकारीले भने, ‘तर, कति र कुन विधिबाट बढाउने भन्ने अन्तिम निर्णय भने भइसकेको छैन ।’