तलबमा काटेको कर अवकाशपछि फिर्ता होला ?

A+ A A-

बैंकहरूले आफ्ना कर्मचारीले जागिर खाँदा तिरेको करबाट निश्चित प्रतिशत रकम अवकाशपछि फिर्ता गर्ने व्यवस्था मिलाउन माग गरेका छन् ।

जागिर खाएको समयमा धेरै कर तिरेकाले जागिरपछि त्यस्तो करबाट निश्चित रकम सम्बन्धित व्यक्तिलाई फिर्ता गर्ने नीतिगत व्यवस्था मिलाउन सरकारसँग माग गरेका हुन् ।

नेपाल बैंकर्स एसोसिएसनले आगामी आर्थिक वर्षको बजेटका लागि अर्थ मन्त्रालयलाई बुझाएको सुझावमा यस्तो व्यवस्था गर्न माग गरिएको हो । अन्य देशमा पनि कर तिर्ने कर्मचारीलाई अवकाशपछि त्यस्तो कर रकमबाट निश्चित प्रतिशत फिर्ता गर्ने व्यवस्था रहेको एसोसिएसनको दाबी छ ।

‘विभिन्न मुलुकमा झैं कर्मचारीले सेवा अवधिभर भुक्तानी गरेको करको निश्चित प्रतिशत रकम कर्मचारीले अवकाश पाइसकेपछि सुविधाका रूपमा फिर्ता गर्ने व्यवस्था रहेको परिप्रेक्ष्यमा नेपालमा समेत उक्त व्यवस्था सुरुवात गर्न अनुरोध गर्दछौं,’ एसोसिएसनले अर्थ मन्त्रालयमा बुझाएको सुझावमा भनिएको छ ।

यस्तै, दुर्गम स्थानमा खोलिएका बैंकका शाखामा काम गर्ने कर्मचारीलाई दुर्गम भत्ता बढाउन पाइने र गैरस्थानीय कर्मचारीलाई दिइने आर्थिक सुविधामा आंशिक कर छुट दिन पनि संघले मागेको छ । राष्ट्र बैंकले सबै बैंकलाई अनिवार्य रुपमा सबै स्थानीय तहमा पुग्नै पर्ने नीतिगत व्यवस्था गरेको छ । स्थानीय तहमा कर्मचारी पठाउन प्रोत्साहित गर्नुपर्ने अवस्था रहेकाले यस्तो व्यवस्था गर्न एसोसिएसनले माग गरेको हो ।

बैंकरले आयकरको सीमा बढाउन पनि माग गरेका छन् । उनीहरूले रोजगारीबाट भएको करयोग्य आयको दायर बढाउन माग गरेका हुन् । हालको एक व्यक्ति/परिवारको आधारभूत आवश्यकता (कम्तीमा दुईजना सन्तानसमेतको शिक्षा, स्वास्थ्य लगायत) अनुरूपको लागत बढेकाले रोजगारीबाट भएको करयोग्य आयको दायरा बढाउन पनि एसोसिएसनले भनेको छ ।

एसोसिएसनले कर्मचारीका लागि उच्च शिक्षा अध्ययन गर्न प्रदान गरिने शैक्षिक कर्जाको ब्याज भुक्तानी रकम आयकर गणना गर्ने प्रयोजनका लागि खर्च कट्टी गर्न पाउने व्यवस्था गर्न माग गरेको छ । भारतलगायतका देशमा यस्तो व्यवस्था रहेको पाइएको एसोसिएसनको भनाइ छ ।

एसोसिएसनले कर्मचारीका छोराछारीको शिक्षादीक्षाका लागि विभिन्न स्कुल, कलेज, विश्वविद्यालय वा अन्य शैक्षिक संस्थालाई भुक्तानी गरिने भर्ना शुल्क, मासिक शुल्क, वार्षिक शुल्कलगायतका शैक्षिक शुल्क अभिभावकको आयकर गणना गर्दा खर्च कट्टी गर्न पाउने व्यवस्था गर्न भनेको छ ।