निजामती कर्मचारीले मागे टेलिकम र वाणिज्य बैंकको १०/१० प्रतिशत सेयर

A+ A A-

निजामती कर्मचारीले सरकारी स्वामित्वको नेपाल टेलिकम र राष्ट्रिय वाणिज्य बैंकमा १०/१० प्रतिशत सेयर मागेका छन् । सरकारी स्वामित्वका संस्थानलाई सबल र सक्षम बनाई प्रोत्साहित गर्न कर्मचारीलाई सेयर दिनुपर्ने उनीहरुको माग छ ।

सरकारलाई आगामी आर्थिक वर्षको बजेटका लागि सुझाव दिँदै निजामती कर्मचारीको आधिकारिक ट्रेड युनियनले यस्तो माग गरेको हो । युनियनले सरकारलाई बुझाएको सुझावमा टेलिकम र राष्ट्रिय वाणिज्य बैंकको १०/१० प्रतिशत सेयर दिनुपर्ने उल्लेख छ ।

त्यस्तै, युनियनले सुझावमा टेलिकमलाई व्यवस्थित रूपमा सञ्चालन गरी वडा तहसम्म भरपर्दाे सेवा विस्तार गर्नुपर्ने सुझाव पनि दिएको छ । सरकारी लगानीसमेत रहेको नेपाल बैंकसहित राष्ट्रिय वाणिज्य बैंकको शाखा सबै स्थानीय तहमा खोल्नुपर्ने युनियनको सुझाव छ ।

‘नेपाल सरकारको स्वामित्वमा सञ्चालित नेपाल टेलिकमलाई व्यवस्थित रूपमा सञ्चालन गरी वडा तहसम्म भरपर्दो सेवा विस्तार गर्न र सरकारी संस्थानलाई सबल र सक्षम बनाई प्रोत्साहित गर्न निजामती कर्मचारीका लागि १० प्रतिशत सेयर सुनिश्चित गर्नुपर्ने,’ सुझावमा उल्लेख छ ।

नेपाल बैंक र राष्ट्रिय वाणिज्य बैंकको सन्दर्भमा युनियनले बेग्लै बुँदामा सुझाव दिएको छ । सुझावमा नेपाल बैंक र राष्ट्रिय वाणिज्य बैंकको शाखा सबै स्थानीय तहमा स्थापना गर्नुपर्ने भनिएको छ ।

राष्ट्रिय वाणिज्य बैंकले अहिलेसम्म सर्वसाधारणलाई पनि सेयर दिएको छैन । बैंक तथा वित्तीय संस्थासम्बन्धी ऐनमा बैंकले कम्तीमा ३० प्रतिशत सेयर सर्वसाधारणलाई दिनैपर्ने व्यवस्था गरेको छ । तर, शतप्रतिशत सरकारी लगानीको बैंकले सेयर जारी नगर्दा पनि हुने भन्ने आशय ऐनमा छ । ऐनको सोही व्यवस्थामा टेकेर राष्ट्रिय वाणिज्य बैंकले अहिलेसम्म सर्वसाधारणमा सेयर जारी गरेको छैन । युनियनले सो बैंकको १० प्रतिशत सेयर निजामती कर्मचारीलाई र २० प्रतिशत सर्वसाधारणलाई दिन माग गरेको छ ।

‘नेपाल सरकारको स्वामित्वमा सञ्चालित नेपाल बैंक र राष्ट्रिय वाणिज्य बैंकको शाखा सबै स्थानीय तहमा स्थापना गरिनुपर्छ । साथै राष्ट्रिय वाणिज्य बैंकलाई थप सबल र सक्षम बनाउन १० प्रतिशत निजामती र २० प्रतिशत आमजनताको सेयर सुनिश्चित गनुपर्ने’ सुझावमा लेखिएको छ ।

सम्बन्धित सामाग्री