विकाशमा बेथिति : तीन वर्षमा बन्नुपर्ने पुल, नौ वर्ष भयो जग पनि बनेन

प्रतिकात्मक तस्वीर ।

A+ A A-

निर्माण सुरु गरेको नौ वर्षसम्म भेरी नदीमा पुलको जगसम्म निर्माण हुन सकेको छैन । मध्यपहाडी लोकमार्गअन्तर्गतको भेरी नदीको पुल रुकुमपश्चिम र जाजरकोट जोड्नका लागि निर्माण हुन लागेको हो ।

ठेकेदारको लापरबाहीका कारण पुल निर्माण अलपत्र परेपछि लोकमार्गको रुकुम–जाजरकोट खण्ड निर्माणको कामसमेत अधुरो बनेको छ ।

सम्झौता भएको तीन वर्षभित्र काम सक्ने गरी पुल निर्माणको ठेक्का वाइपी कन्स्ट्रक्सन प्रा.लि. ललितपुरले पाएको थियो । कम्पनीले १०० मिटरको पुल निर्माण गर्न वि.सं. २०६९ मा ठेक्का लिए पनि ३० प्रतिशत काम पनि पूरा हुन नसकेको लोकमार्ग आयोजना कार्यालयले जनाएको छ ।

पुल निर्माणका लागि सरकारले १३ करोड ४७ लाख छुट्याएको छ ।

पुल नबन्दा सडक स्तरोन्नतिको काममा समस्या भएको छ । व्यापार/व्यवसाय गर्न कठिन भएको स्थानीय बासिन्दाको गुनासो छ ।

पुल नहुँदा दुवै जिल्लाका बासिन्दा झोलुङ्गे पुलबाट आउजाउ गर्न बाध्य भएको स्थानीय नरबहादुर बस्नेतले बताए । पुलकै कारण चौरजहारी नयाँ शहर निर्माण आयोजनाको काम पनि प्रभावित भएको छ । ठेकेदार राजुप्रसाद श्रेष्ठको चरम लापरबाहीले पुल निर्माण अलपत्र परेको भेरी नगरपालिकाका उपप्रमुख भावना भण्डारीले बताइन् ।

पटकपटक म्याद थप्दा र ठेकेदारलाई ताकेतापत्र लेख्दासमेत पुल निर्माणको काम अघि बढ्न नसकेको मध्यपहाडी लोकमार्ग योजना कार्यालय दैलेखका इञ्जीनियर होमनाथ पौडेलले जानकारी दिए ।

पुलको चौरजहारी खण्डतिर पिलर तथा फउन्डेसन निर्माणको काम भए पनि जाजरकोटतिर कुनै काम भएको छैन । कोरोना महामारीको कारण देखाउँदै ठेकेदारले काममा आलटाल गरिरहेको पौडेलको भनाइ छ । पुल निर्माण तत्काल अघि बढाउन ताकेता गर्दै यस वर्ष दुईपटक पत्राचार गरिसकेको कार्यालयले जनाएको छ ।

इञ्जीनियर पौडेलले भने, 'पुल निर्माणका लागि सुरुका वर्षमा जग बनाउन समस्या थियो तर अहिले कुनै समस्या नभए पनि ठेकेदारले काममा ढिलाइ गरिरहेको छ । भेरी नदीको बहाव सुरु भइसक्यो । त्यसैले सबस्ट्रक्चरको काम गर्न चुनौती छ । ठेकेदारले पुल निर्माणमा चासो नदिएकाले ठेक्का तोडेर कारबाही अगाडि बढाउने प्रक्रिया थालेका छौँ ।'

सडक विभागको पुरानो डिजाइनअनुसार काम गर्न समस्या भएपछि काममा ढिलाइ भएको वाइपी कन्स्ट्रक्सनका प्रोपाइटर श्रेष्ठले बताए । 'पुल निर्माण सुरु भएको दुई वर्षपछि पिलर तथा स्टिलपार्ट भएको पुल डिजाइन रद्द गरी टावरवाला सस्पेन्सन ब्रिज बनाउने डिजाइन बनेको छ । समयमै डिजाइन भएको भए पुलको काम यतिबेला सकिन्थ्यो,' उनले भने ।

प्रकाशित मिति: आइतबार, जेठ २३, २०७८ ०९:१४