एपीएफ मिल्स गोल्डकपको फाइनलमा

A+ A A-

विराटनगरमा जारी पहिलो मिल्स गोल्डकप प्रतियोगितामा सशस्त्र प्रहरी बल (एपीएफ) पूर्वाञ्चाल फाइनलमा प्रवेश गरेको छ । विराटनगर- १६ स्थित जुट मिल्सको खेलमैदानमा बुधबार भएको पहिलो सेमिफाइनल खेलमा एलेभेन एरोज क्बल दुहबी सुनसरीलाई टाइबे्रकरमा ३–२ गोलले हराउँदै एपिएफ फाइनलमा प्रवेश गरेको हो ।

निर्धारित समयसम्म २/२ गोलको बराबरी भएपछि टाइब्रेकरबाट खेलको छिनोफानो भएको थियो । टाइब्रेकरमा एपीएफका नवीन चन्द्र चौधरी, राजकुमार कन्दङ्बा र विमल तामाङले गोल गर्दै टिमलाई फाइनलको यात्रा सुरक्षित गराएको छ । दुहबीका शंकर चौधरी र उमेश कार्कीले मात्र गोल गरेका थिए । कवीन्द्र चौधरीले टाइब्रेकरमा गरेको प्रहार एपीएफका गोलरक्षक दिलकुमार लिम्बूले उत्कृष्ट बचाउ गरिदिए । टाइब्रेकरमा बिवेक पौडेलको प्रहार बाहिरिँदा दुहबी पराजित भयो ।

खेलको पहिलो हाफमा एपीएफलाई दबाबमा राखेको दुहबीले पहिलो हाफको ११औँ मिनेटमा उमेश कार्कीले गोल गरी टिमलाई अग्रता दिलाए । एफीएफका खेलाडीले डिबक्सभित्र दुहबीका दिनेश राईलाई लडाएपछि रेफ्री बिक्की कार्कीले दुहबीलाई पेनाल्टी हान्न दिए । पेनाल्टी सुटआउटमा दुहबीका उमेशले गोल गरेका थिए ।

पहिलो हाफसम्म १-० गोलले अग्राता कायम गरेको दुहबीलाई दोस्रो हाफदेखि एपीएफले सुधारेको प्रर्दशन गर्‍यो । खेलको ४६औँ मिनेटमा कर्नर साइटबाट एपीएफका खेलाडीले प्रहार गरेको बल दुहबीका अरुण लिम्बुको जिउँमा लागेर आत्मघाती गोल भएको थियो ।

खेलको ६१औँ मिनेटमा एपीएफका उज्जवल चाम्लिङ राईले गोल गरि टिमको अग्रता कायम गर्‍यो । एपीएफले दोस्रो गोल गरेको २० मिनेट बित्न नपाउँदै खेलको अन्त्यमा थप गरिएको अत्तिरिक्त समयमा दुहबीका दिनेश राईले गोल गरि खेल बराबारीमा ल्याएका थिए ।

खेलको म्यान अफ द म्याच एपीएफका उज्जवल चाम्लिङ्ग राई घोषित भए । उनले नगद पाँच हजार प्राप्त गरेका छन् । बिहीबारको दोस्रो सेमिफाइनल खेल साइनो स्पोर्ट्स क्लब रानी र धरान सिटी फुटबल एकाडेमी बीच हुनेछ । साइनोले क्वाटरफाइनलमा गाइघाट फुटबल क्लब उदयपुरलाई ३–१ गोलले हराउँदै सेमिफाइनमा प्रवेश गरेको थियो ।

प्रकाशित मिति: बुधबार, चैत ११, २०७७ २१:१७