बझाङमा युवक हत्या प्रकरण : दोषीलाई कारबाहीको माग गर्दै कांग्रेसको प्रदर्शन

बझाङमा युवक हत्या प्रकरण : दोषीलाई कारबाहीको माग गर्दै कांग्रेसको प्रदर्शन

A+ A A-

छबिसपाथीभेरा घटनाका दोषीलाई कारबाहीको माग गर्दै नेपाली कांग्रेस बझाङले जिल्ला सदरमुकाम चैनपुरमा प्रदर्शन गरेको छ । बुधबार नेविसंघ र तरुण दलले सदरमुकाम चैनपुरमा आफ्ना कार्यकर्ताको हत्यारालाई कारबाहीको माग गर्दै प्रदर्शन गर्नुका साथै सदरमुकाम चैनपुर बजार बन्द गरेको छ ।

प्रदर्शनकारीले नाराजुलुस गर्दै सदरमुकाम बजारका साथै जयपृथ्वी राजमार्ग बन्द गरेका छन् । जयपृथ्वी राजमार्ग बन्द हुँदा जिल्ला भित्रने र बाहिरिने तथा स्थानीय रूटमा चल्ने यातायातका साधन रोकिएका छन् । प्रदर्शनकारीले बुधबार बिहान जिल्ला प्रशासन कार्यालयको मूल गेटमा टायर बालेर हत्यारालाई कडा कारबाही हुनुपर्ने माग गरेका छन् ।

बान्नीचौर माविको विद्यालय व्यवस्थापन समिति निर्वाचनमा कांग्रेस समर्थक उम्मेदवार विजयी भएको झोकमा नेकपा समर्थकले नेपाल तरुण दल छबिसपाथीभेरा गाउँपालिकाका सदस्य लखन भनिने अमृत सिंहलाई खुँडा प्रहार गरी हत्या गरेका थिए । सिंहमाथि साँझ ७ बजेतिर पाटागाँउमा खुँडा प्रहार भएको हो ।

कांग्रेस बझाङका पूर्वसभापति पृथ्वीबहादुर सिंहले सत्ता र शक्ति प्रयोग गरेर अपराधीलाई उम्काउने प्रयास हुने भएकाले आफूहरू निरन्तर खबरदारी गरिरहने बताए । उनले भने 'घटनामा सरकारी मोटरसाइकलसमेत प्रयोग हुनु र वडाध्यक्ष पनि मुछिनुले घटना पूर्ण राजनीतिक आवरणमा भएकोमा दुईमत छैन् ।' घटना राजनीतिक आवरणमा भएको भन्दै हत्यामा संलग्नलाई उम्काउन प्रयास हुन सक्ने उनको भनाइ छ ।

हत्या गरेको आरोपमा सोही गाउँपालिका २ का ३२ वर्षीय ज्ञानबहादुर कडायतलाई स्थानीयले मंगलबार नै घटनास्थलबाट नियन्त्रणमा लिएर प्रहरीमा बुझाएका थिए । वडाध्यक्ष विकास ऐडीलाई सदरमुकाम चैनपुरको एक होटलबाट नियन्त्रणमा लिएको थियो । अर्का दुई आरोपी ३५ वर्षीय केदार ऐडी र ३२ वर्षीय प्रकाश ऐडीलाई थलारा गाउँपालिका–३, को जाम्बाँझ गाउँबाट बुधबार बिहान पक्राउ गरिएको छ ।

घटनामा वडाध्यक्ष चढ्ने से १ प ७६१ नम्बरको सरकारी मोटरसाइकलसमेत प्रयोग भएको प्रहरीले जनाएको छ । हत्यामा संलग्न रहेको आशंका गरिएका सबै पक्राउ परिसकेको जनाउँदै बझाङ प्रहरी प्रमुख प्रहरी नायव उपरीक्षक रूपक खड्काले थप अनुसन्धान भइरहेको बताए । मृतक सिंहको शव अहिले जिल्ला अस्पताल सिमखेतमा राखिएको छ ।