नलिने भए कोशीका मुख्यमन्त्री कार्कीले विश्वासको मत, राजीनामाको छैन छनक

A+ A A-

गएको २६ चैतमा कोशीका मुख्यमन्त्री केदार कार्की नेतृत्वको सरकारलाई दिएको समर्थन एमाले र माओवादीले फिर्ता लिएका थिए । त्यही आधारमा हेर्दा मुख्यमन्त्री कार्कीले आज (मंगलबार) सम्म विश्वासको मत लिनुपर्ने हो ।

संवैधानिक हिसाबमा सरकारलाई दिएको समर्थन फिर्ता भएपछि मुख्यमन्त्रीले विश्वासको मत लिनुपर्छ । संविधान र सर्वोच्च अदालतको फैसलालाई 'कोट' गर्दै गएको वैशाख ७ मा प्रदेशसभाले संकल्प प्रस्तावमार्फत कोशी प्रदेशका मुख्यमन्त्री केदार कार्कीलाई विश्वासको मत लिन वा राजीनामा दिन भनेको थियो ।

तर, मुख्यमन्त्री कार्कीले पटकपटक भने जस्तै 'विश्वासको मत नलिने, राजीनामा पनि नदिने' स्थिति देखिएको छ । प्रदेश प्रमुखलाई संकल्प प्रस्ताव कार्यान्वयनका लागि प्रदेशसभा सचिवालयले पत्राचार गरेपछि मुख्यमन्त्री कार्कीले त्यसको वैधानिकतामाथि नै प्रश्न समेत उठाए । मुख्यमन्त्री कार्कीले प्रदेश प्रमुखलाई पत्र लेखेरै संकल्प प्रस्ताव गैरसंवैधानिक भएको दाबी गरेका थिए ।

त्यसकै प्रतिक्रियास्वरुप विश्वासको मत लिनुपर्ने अन्तिम दिन अर्थात् मंगलबार कार्कीले विश्वासको मत लिन सदन आह्वान गरेका छैनन् । नेपाली काङ्ग्रेस संसदीय दलले समेत मुख्यमन्त्रीलाई विश्वासको मत लिन सुझाएको थियो । तर, कार्कीले आफ्नो अडान कायम राखिरहेका छन् ।

विश्वासको मत लिनेसम्बन्धी विषयको 'च्याप्टर क्लोज' भएको कार्कीले बताउँदै आएका छन् । नियुक्ति भएको दुई वर्षसम्म आफ्नो सरकार सुरक्षित रहेको भन्दै कार्कीले विश्वासको मत नलिने बताउँदै आएका छन् । यता, एमाले र माओवादीले भने २५ वैशाख राति १२ बजेसम्म मुख्यमन्त्री कार्कीले राजीनामा नदिए, प्रदेश प्रमुखले नयाँ सरकार गठनको आह्वान गर्नुपर्ने बताउँदै आएका छन् ।

संवैधानिक हिसाबमा ३० दिनभित्र विश्वासको मत नलिएपछि प्रदेश प्रमुख पर्शुराम खापुङ समेत नयाँ सरकार आह्वानमा सकारात्मक देखिएका छन् । 'मुख्यमन्त्रीले आज अब राजीनामा दिनुभएन भने आज राति १२ बजेपछि सरकार स्वत: काम चलाउ हुन्छ,' एमाले संसदीय दलका प्रमुख सचेतक रेवतिरमण भण्डारीले शिलापत्रसँग भने, 'सरकार कामचलाउ भएपछि प्रदेश प्रमुखले नयाँ सरकार गठनको आह्वान गर्नुहुन्छ । त्यसमा कुनै दुविधा छैन ।'

कार्की भने प्रदेश प्रमुखले नयाँ सरकार गठनको प्रक्रिया थाले अदालत जाने तयारीमा छन् । संविधानको धारा १६८ (५) अनुसार कांग्रेस प्रदेशसभा सदस्य कार्की २७ असोज २०८० मा मुख्यमन्त्री बनेका थिए ।

प्रकाशित मिति: मंगलबार, वैशाख २५, २०८१ १०:२३