एकतालाई पूर्णता दिन माधव नेपाल नेतृत्वको १२ सदस्यीय कार्यदल, अरु दलसँग मिलेर संघर्ष गर्ने निर्णय

एकतालाई पूर्णता दिन माधव नेपाल नेतृत्वको १२ सदस्यीय कार्यदल, अरु दलसँग मिलेर संघर्ष गर्ने निर्णय

A+ A A-

नेकपा पुष्पकमल दाहाल 'प्रचण्ड'-माधवकुमार नेपाल पक्षको स्थायी कमिटी बैठकले पार्टी एकीकरणका बाँकी काम पूरा गर्न सुझावका लागि गृहकार्य टोली गठन गरेको छ । सोमबार पार्टी कार्यालय पेरिसडाँडामा बसेको स्थायी कमिटी बैठकले पार्टी संगठनको एकीकरणको बाँकी काम पूरा गर्न सुझाव दिन अध्यक्ष माधवकुमार नेपालको नेतृत्वमा गृहकार्य टोली गठन गरेको हो ।

टोलीमा स्थायी कमिटी सदस्यहरू अष्टलक्ष्मी शाक्य, गिरिराजमणि पोखरेल, गोकर्ण विष्ट, घनश्याम भुसाल, जनार्दन शर्मा, पम्फा भुसाल, वर्षमान पुन, बेदुराम भुसाल, भीम रावल, मातृका यादव, लिलामणि पोखरेल, सुरेन्द्र पाण्डे रहेको प्रवक्ता नारायणकाजी श्रेष्ठले जानकारी दिए ।

टोलीले प्रदेश कमिटी, जिल्ला कमिटी, जनवर्गीय संगठन र मोर्चा संगठनको पदाधिकारीका बारेमा तथा पार्टी संगठनको एकीकरणका बाँकी रहेको काम पूरा गर्ने सम्बन्धमा ७ दिनभित्र सुझाव दिई कार्यान्वयनको प्रक्रियामा लगिने उनले बताए ।

त्यसैगरी बैठकले सरकारको प्रतिनिधिसभा विघटनको असंवैधानिक कदमविरुद्ध गरिएको पहिलो चरणको संघर्षका कार्यक्रम उत्साहपूर्वक सफल भएको समीक्षा गर्दै १८ पुसमा घोषणा गरेको दोस्रो चरणको संघर्षको कार्यक्रम सफल पार्न पार्टी पंक्तिलाई पूर्णरूपमा परिचालन गर्ने निर्णय गरेको प्रवक्ता श्रेष्ठले जानकारी दिए ।

बैठकले असंवैधानिक कदमविरुद्ध अन्य राजनीतिक पार्टीसँग पनि वार्ता गरी संयुक्त संघर्ष गर्ने पहललाई जारी राख्ने निर्णय पनि गरेको छ । पार्टीको केन्द्रीय संघर्षको अतिरिक्त प्रदेश, जिल्ला, पालिकास्तर तथा वडास्तरसम्म संघर्ष समिति गठन गर्ने निर्णय भएको प्रवक्ता श्रेष्ठले जानकारी दिए ।

प्रवक्ता नारायणकाजी श्रेष्ठको संयोजकत्वमा रहेको केन्द्रीय संघर्ष समितिको सचिवालयर कार्यालय गठन गरिएको र सह–संयोजकको जिम्मेवारी स्थायी कमिटी सदस्यहरू योगेश भट्टराई, पम्फा भुसाल र गणेश शाहलाई दिइएको उनले बताए ।

आइतबारदेखि सुरु भएको स्थायी कमिटी बैठकमा पार्टी अध्यक्षद्वय प्रचण्ड र नेपालले प्रतिनिधिसभा विघटनको असंवैधानिक कदमविरुद्धको संघर्ष सफल पार्न र पार्टी एवं कम्युनिस्ट आन्दोलन विरोधीलाई परास्त पार्न दृढतापूर्वक अघि बढ्न आव्हान गरेको प्रवक्ता श्रेष्ठले बताए ।

प्रकाशित मिति: सोमबार, पुस २०, २०७७ १९:००