आज दिनभर : प्रचण्डलाई पूरै कार्यकाल दिने एमालेकाे संकेत, गृहमन्त्रीलाई ऐना हेर्न कांग्रेसकाे सुझाव

आज दिनभर : प्रचण्डलाई पूरै कार्यकाल दिने एमालेकाे संकेत, गृहमन्त्रीलाई ऐना हेर्न कांग्रेसकाे सुझाव

A+ A A-

सरकारले राम्रो काम गरे पूरै कार्यकाल प्रचण्डलाई नै प्रधानमन्त्री बनाउन तयार रहेकाे एमाले महासचिव शंकर पोखरेलले बताएका छन् । कोशीमा एमाले र माओवादी केन्द्रले ल्याएको मुख्यमन्त्री केदार कार्कीलाई विश्वासको मत लिन निर्देशन दिनेलगायतका विषय समावेश संकल्प प्रस्ताव प्रदेशसभाबाट पारित भएकाे छ । कार्कीले भने आफूले राजीनामा नदिने र संविधानको धाराअनुसार अघि बढ्ने बताएका छन् ।

राष्ट्रियगानको धुन सुनाएर गण्डकी प्रदेशसभाको बैठक अनिश्चितकालका लागि स्थगित भएकाे छ । सरकार गठनको विरोधमा सर्वोच्चमा विचाराधीन मुद्दाको फैसला नभएसम्म कांग्रेसले प्रदेशसभाको बैठक बहिस्कार गरेकाे छ । गण्डकी र सुदूरपश्चिममा प्रदेश प्रमुखको भूमिकाप्रति नेपाली कांग्रेसले असन्तुष्टि जनाएकाे छ ।

राजनीतिक दलमा आबद्ध शिक्षकहरूलाई कारबाही गर्ने प्रक्रिया अगाडि बढाएसँगै सत्तारुढ दलका नेताहरू नै शिक्षामन्त्री सुमना श्रेष्ठसँग असन्तुष्ट बनेका छन् । दलको सदस्यता लिन शिक्षा नियमावलीले नछेकेकाले शिक्षकहरूलाई कारबाही गरेर देखाउन शिक्षक महासंघले चुनौती दिएकाे छ ।

प्रतिपक्षमा पुगेपछि कांग्रेस बर्बराउन थालेको रास्वपा सभापति एवं गृहमन्त्री रवि लामिछानेले टिप्पणी गरेका छन् । कांग्रेसमाथि प्रश्न उठाउनुअघि एक पटक आफैँ ऐना हेर्न कांग्रेस प्रवक्ता डा.प्रकाशशरण महतले सुझाएका छन् ।

बुटवलको सुप्रिम सहकारी ठगी प्रकरणमा सहकारीका अध्यक्ष ओमप्रकाश गुरुङलाई थुनामा पठाउन जिल्ला अदालतले आदेश दिएकाे छ । प्रकरणमा पूर्वउपराष्ट्रपति नन्दबहादुर पुनका छोरा दीपेश पुनलाई ४ लाख रुपैयाँ धरौटीमा छाड्न आदेश भएकाे छ ।

इरान र इजरायलबीच प्रत्यक्ष युद्ध सुरु भएसँगै पश्चिम एसिया थप अशान्त बन्ने संकेत देखिएकाे छ । भारत र पाकिस्तानसँगै टी–२० एसियाकप खेल्ने नेपालको सपना चकनाचुर भएकाे छ । खराब ब्याटिङका कारण नेपाल एसीसी प्रिमियर कपको सेमिफाइनलमा युएईसँग ६ विकेटले पराजित भयाे ।

भिडियाे :

प्रकाशित मिति: शुक्रबार, वैशाख ७, २०८१ १९:४४