उत्तर कोरियाद्वारा जासुसी भूउपग्रहको सफल प्रक्षेपणपछि रुससँगको साँठगाँठबारे यस्तो चर्चा सुरु...

उत्तर कोरियाद्वारा जासुसी भूउपग्रहको सफल प्रक्षेपणपछि रुससँगको साँठगाँठबारे यस्तो चर्चा सुरु...

A+ A A-

उत्तर कोरियाले वर्षौंको प्रयासपछि पहिलो जासुसी भूउपग्रह सफल रूपमा प्रक्षेपण गरेको छ । सर्वोच्च नेता किम जोङ उनले रुसको भ्रमण सकेलदगत्तै उत्तर कोरिया जासुसी भूउपग्रह प्रक्षेपण गर्न सफल भएको हो । यही कारण यतिबेला उत्तर कोरिया र रुसबीचको साँठगाँठबारे चर्चा हुन थालेको छ ।

रुसकै प्राविधिक सहयोगका कारण उत्तर कोरियाको भूउपग्रह कार्यक्रम सफल भएको पनि विश्लेषण हुन थालेको छ । यसै हप्ताको मंलबार राति १० बजेर ४२ मिनेटमा सोहेई स्याटेलाइट लन्चिङ स्टेसनबाट उत्तर कोरियाको मालिङयोङ–१ भूउपग्रह पृथ्वीको कक्षमा पठाइएको छ ।

प्रक्षेपण भएको १२ मिनेटमै रकेटले उक्त जासुसी भूउपग्रहलाई पृथ्वीको कक्षमा तैनाथ गरेको थियो । यस वर्षको मे र अगस्ट महिनामा मात्र पनि उत्तर कोरियाले दुईपटक रकेटबाट जासुसी भूउपग्रह प्रक्षेपण गरेको थियो । दुवैपटक उत्तर कोरिया भूउपग्रह तैनाथ गर्न असफल भएको थियो ।

उत्तर कोरियाका अनुसार उनीहरूको यस जासुसी भूउपग्रहले अमेरिका, दक्षिण कोरिया र जापानबाट उत्पन्न हुने खतरालाई पत्ता लगाउनेछ । उत्तर कोरिया यो सोच्छ कि अमेरिका, दक्षिण कोरिया र जापानले आफ्नो देशमा संयुक्त आक्रमणको योजना बनाएका छन् ।

सीमा क्षेत्रमा हुने उनीहरूको संयुक्त युद्ध अभ्यासले उत्तर कोरियालाई झनै चिढ्याउने गरेको छ, जसका कारण उसले पहिल्यैबाट जासुसी भूउपग्रह तैनाथ गर्न खोजिरहेको थियो । प्योङयाङले परमाणु क्षमताको ड्रोन हतियार साथै अन्तरमहादेशीय क्षेप्यास्त्रको पनि विकास गरेको छ ।

गत सेप्टेम्बर महिनामा उत्तर कोरियाका सर्वोच्च नेता किम जोङ उन हरियो रेल चढेर रुस पुगेका थिए । सो क्रममा रुसी राष्ट्रपति भ्लादिमिर पुटिनले किमलाई भोस्तोच्नी कोस्मोड्रोम स्पेसपोर्टको अवलोकन गराएका थिए । त्यसबेला नै पुटिनले उत्तर कोरियासँग भूउपग्रह कार्यक्रममा सहकार्य हुने बताएका थिए ।

सो भ्रमणको दुई महिनामै उत्तर कोरिया जासुसी भूउपग्रह प्रक्षेपण गर्न सफल भएपछि रुसकै सहयोगमा उत्तर कोरिया सफल भएको अमेरिकासँगै जापान र दक्षिण कोरियाको भनाइ छ ।

रुस र उत्तर कोरियाबीचको भूउपग्रह प्रविधिमा सहकार्यलाई अमेरिकाले रुचाएको छैन । भूउपग्रह कार्यक्रम र परमाणु क्षमताको ब्यालिस्टिक क्षेप्यास्त्रको प्रविधि समान किसिमको भएको हुनाले उनीहरूले शक्तिशाली परमाणु हतियार बनाउनेमा अमेरिकालाई चिन्ता बढेको छ ।

प्रकाशित मिति: शुक्रबार, मंसिर ८, २०८० १३:२५