बढ्यो धारा नेपालगञ्ज म्याराथनको पुरस्कार, पहिलो हुनेलाई दुई लाख

A+ A A-

यही मंसिर ९ गते नेपालगञ्जमा आयोजना हुने नवौँ धारा नेपालगञ्ज म्याराथनको पुरस्कार राशिमा वृद्धि गरिएको छ । नेपाल सरकार र तत्कालीन विद्रोही नेकपा माओवादीबीच दशक लामो सशस्त्र द्वन्द्व विधिवत अन्त्य गर्नेगरी भएको विस्तृत शान्ति सम्झौता (५ मंसिर २०६३) स्मरणमा नाै वर्षदेखि आयोजना हुँदै आएको धारा नेपालगञ्ज म्याराथनमा यस वर्ष पुरस्कार राशिमा वृद्धि गरिएको हो ।

आयोजक क्रियटिभ ह्याण्डसका अनुसार यस वर्षको नवौँ धारा नेपालगञ्ज म्याराथनको विजेताले नगद दुई लाख पाउने छन् । दोस्रो स्थान हासिल गर्नेले एक लाख, तेस्रोले ५० हजार, चौथोले २५ हजार, पाँचौँले १५ हजार, छैटौँले १० हजार, सातौँ र आठौँले समान ५/५ हजारबाट पुरस्कृत गरिने छ । यसमा ४५ वर्षमाथिको धावकलाई पनि स्थान निर्धारणगरी प्रोत्साहन गरिने आयोजकले जनाएको छ ।

हाफ म्याराथन(महिला)मा प्रथम हुनेले ७५ हजार, दोस्रोले ५० हजार, तेस्रोले २५ हजार, चौथोले १५ हजार, पाँचौँले १० हजार, छैटौँ, सातौँ र आठौँलाई समान ५/५ हजार नगदले पुरस्कृत हुने आयोजक संस्थाका संस्थापक ट‍ीएस ठकुरीले बताए ।

त्यस्तै १० किलोमिटर महिला र पुरुषतर्फ शीर्ष तीन जनालाई ३० हजार, १५ हजार र १० हजार नगदले पुरस्कृत गरिनेछ । स्कुलस्तरीय पाँच किलोमिटर दौडमा शीर्ष तीनलाई पाँच हजार, तीन हजार र दुई हजार प्रदान गरिनेछ । यसमा बाँके जिल्ला बाहिर र जिल्लाभित्रका विद्यार्थीलाई समेटिएको छ । यसमा पनि कक्षा ६ देखि ८ तथा ९ देखि १२ को अलग अलग स्थान निकालिनेछ । ह्वीलचेयर दौडमा पनि पुरुष तथा महिलातर्फ अलगअलग शीर्ष तीनलाई पाँच हजार, तीन हजार र दुई हजारबाट पुरस्कृत गरिनेछ । किड्स रनतर्फका विजेतालाई शैक्षिक उपहारबाट प्रोत्साहन गरिनेछ । कर्पोरेट पाँच किलोमिटर दौडमा विजेतालाई पदक र विभिन्न आकर्षक प्याकेजबाट सम्मानित गरिने ठकुरीले बताए ।

‘अझै केही सरप्राइज प्याकेजबारे निर्णय हुँदैछ, त्यो चाँडै घोषणा गरिनेछ’, उनले भने । ठकुरीका अनुसार नेपालगञ्ज म्याराथनका क्रममा कार्यक्रमलाई भव्य बनाउन सहभागिता जनाउने विभिन्न व्यक्ति तथा संस्थालाई पनि पुरस्कृत गरिनेछ । ‘सबै जाति, सबै भाषा एक ठाउँः सबै मिलि देश बनाउँ’ भन्ने हेतुले म्याराथन रुटमा खेलाडीको हौसलाका लागि उपस्थित हुने सहभागीमध्येबाट एक जनालाई बेष्ट ड्रेस अवार्ड, बेस्ट सहभागिता अवार्ड, बेस्ट भोलेन्टियर अवार्डलगायत विविध विधामा सम्मान गर्ने क्रियटिभ ह्याण्डसका अध्यक्ष ठकुरीले जानकारी दिए ।