भागेर उत्तर कोरिया पुगेका अमेरिकी सैनिकलाई अमेरिकाको जिम्मा लगाइयो

A+ A A-

दक्षिण कोरिया हुँदै उत्तर कोरिया भागेका अमेरिकी सेना ट्र्याभिस किङलाई उत्तर कोरियाले अमेरिकी अधिकारीहरूको जिम्मा लगाएको छ । २३ वर्षे ट्र्याभिसलाई चीनस्थित अमेरिकी अधिकारीहरूको जिम्मा लगाइएको हो ।

गत जुलाई १८ मा उनी दक्षिण कोरियाको असैनिकिकृत क्षेत्रबाट उत्तर कोरिया भागेका थिए । संयुक्त राष्ट्रसंघको भ्रमण टोलीमा समावेश भएर उनी त्यहाँसम्म गएका थिए ।

उत्तर कोरिया भागेको एक हप्तापछि मात्र प्योङयाङले ट्र्याभिस आफ्नो हिरासतमा भएको पुष्टि गरेको थियो । अमेरिकीहरूले रंगभेदी र अमानवीय व्यवहार देखाएका कारण उनी उत्तर कोरिया भागेको प्योङयाङको टिप्पणी थियो ।

ट्र्याभिसलाई अब चीनबाटै अमेरिका पठाइनेछ । महिनौँको कूटनीतिक प्रयासपछि उत्तर कोरियाले ट्र्याभिसलाई अमेरिकाको जिम्मा लगाएको अमेरिकी अधिकारीहरूको भनाइ छ । ट्र्याभिस आफ्नो घर जान पाउँदा धेरै खुसी भएको र उनी आफ्नो परिवारसँग पुनर्मिलनका लागि उत्साहित भएको पनि अमेरिकाले जनाएको छ ।

यसअघि उत्तर कोरिया भागेसँगै ट्र्याभिसको ज्यान जोखिममा भएको अनुमान गरिएको थियो । अमेरिका र उत्तर कोरियाबीच हतियारको विषयमा चर्को विवाद छ, अमेरिकाले कठोर प्रतिबन्धहरू उत्तर कोरियामाथि लगाएको छ । उत्तर कोरियामा पक्राउ परेका अमेरिकीहरूलाई यातना दिने गरेको इतिहास छ, जसकारण ट्र्याभिसलाई पनि पीडा दिइने अनुमान थियो ।

तर दुई महिनाको अवधिमै उत्तर कोरियाले उनलाई छाडिदिएको हो । अमेरिकाले उनको रिहाइका लागि हरसम्भव प्रयास गरेको बताएको छ । बुधबार मात्र उत्तर कोरियाको सरकारी समाचार संस्था केसीएनएले ट्र्याभिसलाई निर्वासित गर्ने निर्णय भएको बताएको थियो ।

ट्र्याभिस सन् २०२१ जनवरीदेखि अमेरिकी सेनामा आवद्ध छन् । उनी यूएन कमाण्ड अन्तर्गत दक्षिण कोरियामा तैनाथ थिए । उत्तर कोरिया प्रवेश गर्नुअघि उनले दुई जना दक्षिण कोरियाली नागरिकलाई कुटपिट गरेको र प्रहरीको कारमा लात्ता हानेको विषय प्रहरीमा पुगेको थियो । त्यसपछि उनलाई दक्षिण कोरियामा दुई महिना हिरासतमा राखिएको थियो ।

उनलाई अमेरिकी सेनाले अनुशासन कारबाही गर्दै अमेरिका नै फर्काउने प्रक्रिया चलिरहेको थियो । तर उनी उत्तर कोरिया भागेका थिए ।

प्रकाशित मिति: बिहीबार, असोज ११, २०८० ११:५२