संसदको लबीमा कांग्रेस सांसद ईश्वरी न्यौपाने र एमाले सांसद नैनकला थापाबीचको विवाद के हो ?

संसदको लबीमा कांग्रेस सांसद ईश्वरी न्यौपाने र एमाले सांसद नैनकला थापाबीचको विवाद के हो ?

A+ A A-

कांग्रेस सांसद ईश्वरीदेवी न्यौपानेले संसद बैठकमा बोलेको विषयलाई लिएर प्रमुख प्रतिपक्षी दल एमाले सांसद नैनकला थापाले अभद्र व्यवहार गरेको आरोप लागेको छ । संसद बैठकमा बोलेको विषयमा आफूमाथि सांसद थापा अमर्यादित रुपमा प्रस्तुत भएको न्यौपानेले बताएकी छिन् ।

७ भदाै‌काे स‌ंसद बैठकमा नक्कली भुटानी शरणार्थी प्रकरणमा पूर्वगृहमन्त्री जेलमा रहेको तर कसैलाई सोधपुछ नगरेको भनी सांसद न्यौपानेले प्रश्न गरेकी थिइन् । बैठकमा सांसद न्यौपानेले भनेकी थिइन्, ‘नक्कली भुटानी शरणार्थी प्रकरणमा फरार अभियुक्त छोरा जसले आमालाई पनि पैसा पठाएको पाउनु भयो कि भएन भनेर भनेको छ, त्यो भिडियो रेकर्ड छ । तर, प्रहरी र सरकारको आँखा त्यहाँ पुग्दैन । आजसम्म पनि खोजविन हुन सकेको छैन । पूर्वगृहमन्त्री त्यही काण्डमा जेलमा हुनुहुन्छ । सरकारले के गर्न खोजेको छ ?’

सांसद न्यौपानले फरर अभियुक्त को भनेर नाम उल्लेख गरेकी थिइनन् । तर उनकाे संकेत भने पूर्वगृहमन्त्री रामबहादुर थापा तथा सांसद नैनकला थापका छोरा प्रतिक थापालाई थियाे । त्यही अभिव्यक्तिपछि सांसद न्यौपाने बाहिर निस्कने क्रममा संसदको लबीमा सांसद थापाले अभद्र व्यवहार गरेको आरोप लागेको छ ।

‘म बोलेर निस्कनेक्रममा लबीमा उहाँ अस्वभाविक रूपमा बोल्न थाल्नुभयो । उच्चस्तरीय समितिले छानबिन गर्ने विषयमा संसदमा किन बोलेको भनेर प्रतिवाद गर्नुभयो । चर्को स्वर गर्न थालेपछि उहाँहरूको पार्टीको सांसद आएर लैजानुभयो,’ न्यौपानले भनिन् । सदनमा बोलेको कुरा सदनमै समय लिएर बोल्न आफूले सुझाउँदा पनि सांसद थापा आक्रोशित बनेको न्यौपानेको दाबी छ ।

यो विषयलाई कांग्रेसका सांसदले संसदमै प्रवेश गराएका छन् । १२ भदौको संसद बैठकमा कांग्रेसकी सांसद शान्ति विकले सांसद थापाको नाम नलिइ प्रतिपक्षी दलकी एक सांसदले आफ्नो पार्टीकी सांसद न्यौपानेमाथि संसद भवनकाे लबीमा अस्वभाविक व्यवहार गरेकाले जवाफ माग गरेकी थिइन् ।

‘माननीय ईश्वरी न्यौपानेले बडो संयम भएर बोलेको विषयमा प्रतिपक्षीकी एक सांसदले संसदको गरिमामा खलल पुग्ने गरी संसदको लबीभित्र अमर्यादित रुपमा प्रस्तुत भई दुर्व्यवहार शैलीमा अभद्र व्यवहार के कारणले गर्नुभयो ?,’ सांसद विकले प्रश्न गरेकी थिइन् ।

१८ भदौको संसद बैठकमा पनि कांग्रेसकी सचेतक सुशीला थिङले विषय प्रवेश गराएकी थिइन् । संविधानको अधिनमा रहेर सांसद न्यौपानले बोलेको विषयमा प्रतिपक्षी दलकी सांसदले धाक धम्की दिएको बताएकी थिइन् । ‘संसदमा उठेको प्रश्न संसदमा प्रतिवाद गर्ने ज्ञान रहेनछ,’ सचेतक थिङले भनेकी थिइन् ।

संसदमा विषय उठे पनि सांसद न्यौपानमाथि को सांसदले अभद्र व्यवहार गरेको भन्नेबारे खुलेको थिएन । यस विषयमा कुरा गर्न खाेज्दा सांसद थापा भने सम्पर्कमा आउन चाहिनन् । तर, एमालेका सचेतक महेश बर्तौला घटनाबारे पार्टीलाई औपचारिक जानकारी नआएको बताउँछन् ।

‘दलमा औपचारिक जानकारी आएको छैन । कहिलेकाहीँ सदनमा बोलेको विषय लबीमा भेट हुँदा अनौपचारिक सवाल जवाफ हुन्छ । यो विषयमा भएको के हो कांग्रेसका सांसदहरूले जानकारी गराउनु भएको छैन,’ बर्तौलाले भने ।

प्रकाशित मिति: बुधबार, भदौ २०, २०८० २२:२८