नेप्स पीसीआईएसएससीको सल्लाहकार समितिमा चयन

A+ A A-

नेप्स पेमेन्ट कार्ड इन्डस्ट्री सेक्युरिटी स्ट्यान्डर्ड्स काउन्सिल (पीसीआईएसएससी) को सल्लाहकार समितिमा चयन भएको छ । नेप्स सन् २०२३/२०२५ को कार्यकालका लागि वित्तीय संस्था श्रेणीबाट सल्लाहकार समितिमा चयन भएको हो ।

सल्लाहकार समितिको २० सिटका लागि ६४ मनोनयन दर्ता भएको र सन् २०२३ मार्च १३ देखि २४ सम्म चुनाव भएको र त्यसको नतिजा जून १ मा प्रकाशित गरिएको हो ।

सल्लाहकार समितिमा चयन भएका सदस्य संस्थाहरूले कार्डमार्फत हुने कारोबारमा डाटा सुरक्षासम्बन्धी मापदण्डहरूको विकासमा उल्लेख्य भूमिका निर्वाह गर्छन् । साथै, आ(आफ्नो बजार, भूगोल र प्राविधिक अनुभवहरू मापदण्डको विकास क्रममा प्रस्तुत गरी मापदण्डहरूलाई समयसापेक्ष बनाउन नेतृत्व पनि गर्छन् ।

मनोनीत भएसँगै अब नेप्सले अमेजन, बैंक अफ अमेरिका, बर्क्लेज बैंक, युरोपियन पेमेन्ट काउन्सिल, एचडीएफसी बैंक, आईबीएम, जेपी मोर्गान, एनपीसीआई, एस बैंक, पेपल, माइक्रोसफ्टजस्ता अन्तराष्ट्रिय रुपमा ख्यातिप्राप्त संस्थाहरूसँग मापदण्ड निर्धारण तथा कार्डमार्फत हुने कारोबारमा डाटा सुरक्षाका विषयमा छलफल तथा ज्ञान आदान–प्रदान गर्नेछ ।

नेप्सका प्रमुख कार्यकारीय अधिकृत सञ्जीव सुब्बा भन्छन्, 'यो हाम्रो लागि गौरवको विषय हो । यसले नेप्स नयाँ उचाइतर्फ बढिरहेको संकेत पनि गर्छ । साथै, पीसीआईएसएससीको लक्ष्य प्राप्तिका लागि ज्ञान, सीप र अनुभवको योगदान गर्न नेप्स तयार र आतुर छ । हामीले यो अवसरलाई कार्डमार्फत हुने कारोबारको सुरक्षालाई अझ चुस्त र समयसापेक्ष बनाउन भुक्तानी क्षेत्रमा नवीन र सुरक्षित डिजिटल परिदृश्यको कल्पना साकार पार्ने चुनौतीको रूपमा पनि लिएका छौँ ।'

यसअघि नै नेप्स नेपालबाट पीसीआईएसएससीको एसोसिएट पार्टिसिपेटिङ अर्गनाइजेसनको सदस्यता प्राप्त गर्ने पहिलो संस्था बनेको थियो । अहिले सल्लाहकार समितिमै चयन भएर सिङ्गो नेपाललाई नै कार्डमार्फत हुने कारोबारमा डाटा सुरक्षासम्बन्धी मापदण्डहरू निर्धारण गर्ने अन्तर्राष्टिय समितिमा नेपालकै प्रतिनिधित्व गर्ने अवसर पाएको छ ।

नेप्स आईएसओ २७००१स्२०१३ र पीसीआईडीएसएस भर्सन ३।२।१ प्रमाणित संस्था पनि भएको हुँदा पीसीआईएसएससी सल्लाहकार समितिको सदस्यताले सरोकारवालाहरूको नेप्सप्रतिको विश्वासलाई अझ प्रगाढ बनाउने कम्पनीले विश्वास लिएको छ ।

प्रकाशित मिति: बुधबार, जेठ २४, २०८० २०:२०