आज घोषित हुँदैछन् शिलापत्र वर्षकलाकार-२०७९, तपाईंको विचारमा को होला ?

A+ A A-

शिलापत्रको वर्षान्त अभियानअन्तर्गत 'वर्षकलाकार-२०७९' आज घोषणा गरिँदै छ । साथमा कलाकार विधामा चार समाचार निर्माता पनि घोषित हुने छन् । १७ चैतदेखि १३ दिनको समय राखेर शिलापत्रले विभिन्न विधामा भर्चुअल्ली मत हाल्न पाउने गरी फारम राखेको छ । गए राति १२ बजेसम्म मत हाल्न पाउने समय तोकिएको थियो ।

यो मल्टिमिडिया अन्तर्क्रियामा पाठकले एक वर्षव्यक्ति, एक वर्षकलाकार, एक वर्षखेलाडी, १५ समाचार निर्माता, उत्कृष्ट पाँच सिनेमा, पाँच नाटक, पाँच आख्यान, पाँच गैरआख्यान र पाँच कवितालाई छानेर मत दिन पाउने व्यवस्था मिलाइएको थियो ।

वर्षव्यक्तिमा नेत्र रोग विशेषज्ञ डा. सन्दुक रुइत, राष्ट्रिय स्वतन्त्र पार्टीका सभापति रवि लामिछाने, काठमाडौं महानगरपालिकाका मेयर बालेन्द्र शाह, धरान उपमहानगरपालिकाका मेयर हर्क साम्पाङ, नेपाली राष्ट्रिय क्रिकेट टिमका कप्तान रोहितकुमार पौडेल र अभिनेत्री सुरक्षा पन्तलाई राखिएको छ । वर्षव्यक्तिमा नचुनिएका बाँकी पाँच जना यस वर्षको 'प्रमुख समाचार निर्माता' हुनेछन् ।

यसैगरी, पाठकले वर्षकलाकार पनि छान्न पाउने व्यवस्था मिलाइएको थियो । तिलकसिंह पेला, दीपकराज गिरी, करिश्मा मानन्धर, मिस पबि, मिरुना मगर, अपूर्व क्षितिज, एलिना चौहान, भुवन केसी, प्रदीप खड्का र मल्लिका महतमध्ये एक जना वर्षव्यक्ति चुनिनेछन् । वर्षकलाकार नचुनिएकामध्येबाट बाँकी चार जना समाचार निर्माता हुनेछन् ।

वर्षखेलाडीमा क्रिकेटर आशिफ शेख, फुटबलर अञ्जन विष्ट, भलिबल खेलाडीद्वय प्रतिभा माली र उषा भण्डारी, एथलेटिक्सकी सन्तोषी श्रेष्ठ, पब्जी टिम द रियल सोल्जर्स र पूर्वप्रशिक्षक अब्दुल्लाह अल्मुताइरीको नाम राखिएको छ । यीमध्ये एक वर्षखेलाडी हुनेछन् भने चार जना समाचार निर्माता हुनेछन् ।

सकारात्मक वा नकारात्मक दुवै कोणबाट, रचनात्मक क्षमताले होस् वा शक्तिको प्रभावले, साल २०७९ लाई सर्वाधिक प्रभाव पारेका वा चर्चामा रहेका पात्रहरूलाई समाचार निर्माताको सूचीमा समावेश गरिएको हो ।

यसैगरी, पाठकहरूले उत्कृष्ट पाँच/पाँचवटा सिनेमा, नाटक, आख्यान, गैरआख्यान र कवितालाई पनि मत दिन पाउने व्यवस्था मिलाइएको छ । शिलापत्र वर्षकलाकार आज र वर्षखेलाडी भोलि (सोमबार) घोषणा गरिनेछ । पाँच/पाँच सिनेमा, नाटक र पुस्तक घोषणा गरिएपछि ३० चैतमा वर्षव्यक्ति घोषणा गरिनेछ ।

२०७७ सालयता शिलापत्रले ‘वर्षव्यक्ति र समाचार निर्माता’ घोषणा गर्दै आएको छ । २०७७ मा न्यायाधीशद्वय बमकुमार श्रेष्ठ र कुमार रेग्मी वर्षव्यक्ति घोषित भएका थिए भने २०७८ मा १ सय ४० विद्यालयलाई ‘पढ्दै कमाउँदै’ कार्यक्रम दिने सुर्खेतका शिक्षक नारायण सिग्देल वर्षव्यक्ति चुनिएका थिए ।