काे हाेला शिलापत्र वर्षव्यक्ति- २०७९ ? दिनुहाेस् मत (सर्वेक्षण फारमसहित)

A+ A A-

प्रिय पाठक,

२०७९ हाम्रा लागि चुनावी वर्ष रह्याे । स्थानीय, प्रदेश र संघ गरी तीन तहका चुनावमा मतदाताले पुराना दलप्रति असन्तुष्टि र नयाँ अनुहारप्रतिकाे आशा मतपत्रमार्फत आंशिक जाहेर गरे । यही आशा र आक्रोशले राजनीतिक नेतृत्वलाई कोभिड महामारीबाट थला परेको अर्थतन्त्र अनि जनजीविका उकास्ने गरी काम गर्न निर्देश गर्ला भन्ने हाम्राे अपेक्षा थियो । तर, सत्ताकाे जाेडघटाउमै दलहरूले चुनावपछिकाे तीन महिना गुजारिदिए । नयाँहरू पनि पुरानै दलकाे सत्ता आशक्तिमा लतारिएका छन् ।

संसारभर मन्दीकाे त्रास छ । अर्थतन्त्र सुस्त बन्दाकाे असर देशकाे ढुकुटीदेखि नागरिककाे भान्सासम्मै परेकाे छ । यी सबै समस्या समाधानसँगै स्थिर सरकार खोजिरहेका नेपालीलाई साल २०७९ मा दलहरूले झिनाे विश्वाससमेत दिलाउन सकेनन् । राजनीति बिर्सिने हाे भने याे वर्षले हामीलाई केही गर्व गर्नलायक उपलब्धि पनि छाडेर गएको छ । जस्ताे कि, हाम्राे नेपाली क्रिकेट टिमले ऐतिहासिक रूपमा विश्वकप छनोट खेल्ने अवसर पाएको छ ।

नयाँ पाठकलाई थाहा नहुन सक्छ, २०७७ सालयता हामीले वर्षकाे अन्तिममा शिलापत्र वर्षव्यक्ति घोषणा गर्दै आएका छाैँ । साथमा समाचार निर्माता, उत्कृष्ट खेलाडी, पुस्तक, नाटक र सिनेमाहरू पनि समावेश छन् । २०८० साललाई स्वागत गर्नुअघि फेरि हामी तपाईंसँगै मिलेर २०७८ सालकाे डायरी खाेल्न खाेज्दैछाैँ । यसलाई तपाईं मल्टिमिडिया अन्तर्क्रिया मान्न सक्नुहुन्छ ।

विगतले जहिले पनि वर्तमानलाई कुनै न कुनै दिशानिर्देश गरिरहेको हुन्छ । बितेकाे वर्ष भएका घटना, परिघटना अनि कारक पात्रहरूकाे समीक्षाले आउने वर्ष सुझबुझपूर्ण निर्णय गर्न देशलाई सघाउ पुर्‍याओस् भन्ने हाम्राे उद्देश्य हाे ।

यो समाचारकाे तल एउटा गुगल फारम राखिएकाे छ, जसमा हामीले वर्ष २०७९ मा विभिन्न कारणले चर्चामा रहेका व्यक्तिहरूकाे नाम राखेका छाैँ । यो वर्षलाई सकारात्मक, नकारात्मक प्रभाव पार्ने, आशा जगाउने वा कुनै पनि रचनात्मक काममार्फत आफ्नो सक्रिय भूमिका स्थापित गरेका पात्रहरू नै याे सूचीमा छन् । तपाईंलाई कुनै नाम छुटेको जस्तो लाग्यो भने हामीलाई सुझाइदिनुहाेला, तपाईंका सुझावलाई हामी सम्मान गर्नेछौँ । वर्षव्यक्ति र समाचार निर्माता छनाेटमा पाठकहरूकाे पनि सहभागिता रहाेस् भनेर हामीले याे फारम राखेका हाैँ ।

२०७८ मा हामीले सिफारिस गरेका नामहरू

हामीले सिफारिस गर्‍याैँ वर्षव्यक्ति ०७८, टुंगो लगाउने जिम्मा तपाईंको (फारमसहित)

फारममा 'शिलापत्र वर्षपुस्तक'का तीन विधा पनि छन्: आख्यान, गैरआख्यान र कविता । यसमा समेत उत्कृष्ट पुस्तकलाई मत दिन सक्नुहुन्छ । १६ चैत २०७८ देखि १५ चैत २०७९ भित्र सार्वजनिक पुस्तक मात्रै हामीले सामेल गरेका छाैँ । १५ चैतयताका पुस्तकलाई अर्को साल समावेश गर्ने नै छाैँ ।

(२०७८ सालका वर्षका वर्षव्यक्ति, समाचार निर्माताहरू)

अघिल्लाे वर्ष हामीले नाटक विधामा मत दिन पाउने व्यवस्था मिलाएका थियाैँ भने यस वर्ष सिनेमा पनि थपेका छाैँ । हामीले सिफारिस गरेकामध्ये पाँच उत्कृष्ट नाटक र पाँच उत्कृष्ट सिनेमाका लागि तपाईंले आफ्नो मत जाहेर गर्न सक्नुहुनेछ ।

Loading…

प्रकाशित मिति: शुक्रबार, चैत १७, २०७९ १८:२०