चरम भ्रष्टाचार भएको भन्दै अभिभावकले विद्यालयमा ताला लगाए

A+ A A-

विद्यालयका व्यवस्थापन समिति र प्रधानाध्यापकको मिलोमतोमा अनियमितता भएको भन्दै सर्लाहीकाे एक विद्यालयमा अभिभावकले तालाबन्दी गरेका छन् । हरिपूर्वा नगरपालिका-५ मा रहेकोे केश्वर गरिब जनता माविमा तालाबन्दी गरिएको हो ।

विद्यालयमा तालाबन्दी भएपछि विद्यालयका विद्यार्थी हरिपूर्वा बजार चौकमा टायर बाली प्रदर्शन गरिरहेका छन । आन्दोलनका कारण विद्यार्थीहरुको परीक्षा समेत भएको छैन ।

विद्यालयको प्रधानाध्यापक फेकुकुमार राय यादव भ्रष्ट र असक्षम भएको हुँदा तुरुन्त सरुवा हुनुपर्ने, विद्यालयमा नयाँ भर्ना भएको शिक्षकहरुलाई खारेजी गर्नुपर्ने, व्यवस्थापन समिति खारेज हुनुपर्ने, विद्यालयको सम्पूर्ण आयव्यय अबिलम्ब प्रस्तुत हुनुपर्नेलगायतका ७ बुँदे माग पूरा नहुन्जेलसम्म तालाबन्दी नखोलिने स्थानीय बिनोद साहले बताए ।

विगत केही दिनअघि भएको पाँच जना शिक्षक भर्नामा व्यापक अनियमितता, प्रधानाध्यापक फेकुकुमार राय यादव निमाविका शिक्षक भएकोले मावि शिक्षक आए प्रअ पदबाट स्वतः हट्ने भएको हुँदा विद्यालयमा आएको शिक्षकको सरुवा गराइ रिक्त दरबन्दी राखी विद्यालयको शिक्षा सखाप पार्ने भएको हुँदा तालाबन्दी गरिएको अभिभावकहरुले बताए ।

विद्यालयमा सबै शिक्षकको दरबन्दी पूरा भएकोले भदौ १५ गते चक्रघाटा गाउँपालिकास्थित अध्यापन गराइरहेका माविका शिक्षक धनेश्वर साहलाई सरुवा सहमति पत्र नदिएकोले आफूमाथि यस्तो आरोप लगाइको प्रअ यादवले दाबी गरे ।

दरबन्दीनै खाली नभएको ठाउँमा कसरी सरुवा पत्र दिने, सरुवा पत्र नदिएकोले विभिन्न बहाना बनाइ विद्यालयमा तालाबन्दी र विद्यार्थीलाई उक्साइ आन्दोलन गराएको प्रअ यादवले बताए ।

प्रधानाध्यापकले व्यापक भ्रष्टाचार गरेको भन्दै सोमबार विद्यालय व्यवस्थापन समितिको बैठकमा दिउँसो दुई पक्षबीच झडप पनि भएको थियो । झडपमा परी स्थानीय गणेश यादव, सुरेन्द्र यादव, खगेन्द्र यादव र मनोज राय गम्भीर घाइते भएका छन् । घाइते चारै जनाको स्थानीय स्वास्थ्य केन्द्रमा उपचार भइरहेको छ ।

प्रकाशित मिति: बुधबार, भदौ ११, २०७६ ०२:२२