औँला ठड्याइरहने चित्रबहादुर केसी र प्रेम सुवाल (भिडियो)

A+ A A-

चित्रबहादुर केसी र प्रेम सुवाल वामपन्थी धारका दुई चर्चित नेता हुन् । उनीहरू जनताको पक्षबाट खरोगरी संसद्‌मा बोल्छन् । उनीहरू पुष्पकमल दाहाल ‘प्रचण्ड’ नेतृत्वको वर्तमान सरकारविरुद्ध औँला ठड्याउने भूमिकामा उनीहरू छन् । अर्थात्, प्रतिपक्षीमा छन् । प्रतिपक्षमा बस्छु भनेको कांग्रेसले पनि सरकारलाई विश्वासको मत दिँदा यी दुई सांसदले भने त्यसको विपक्षमा मत हाले ।

यी दुई नेतामा केही समानता र केही भिन्नता छ ।

नेपाल मजदुर किसान पार्टीका सांसद सुवाल कहिल्यै सत्तामा गएका छैनन् । जान मरिहत्ते पनि गरेका छैनन् । उनलाई सत्ताको भोक पटक्कै छैन । भए त जान सक्थे उनी । तर, निरन्तर जनताको तर्फबाट प्रतिनिधिको रूपमा रहेर सरकारलाई खबरदारी गर्दै आएका छन् । त्यही भएर उनी सरकारको स्थायी प्रतिपक्षीको रूपमा चिनिएका छन् ।

संविधानविद् डा. भीमार्जुन आचार्यका अनुसार संसदीय व्यवस्थामा प्रतिपक्षीको भूमिका संसद्‌मा निकै महत्त्वपूर्ण हुन्छ ।

दोस्रो संविधानसभा २०७० मा समानुपातिक, २०७४ र यसपटक प्रत्यक्षतर्फबाट निर्वाचित सांसद सुवालले प्रचण्ड नेतृत्वको सरकारलाई खबरदारी गर्नैका लागि विश्वासको मत दिएनन् । सरकारलाई समर्थन गरेनन् ।

उनीजस्तै प्रतिपक्षमै हुनेछन्– राष्ट्रिय जनमोर्चाका सांसद चित्रबहादुर केसी । संसदीय राजनीतिमा निष्ठा र आदर्शमा अडिग नेता भनेर चिनिने केसी पनि सरकारलाई बारम्बार खबरदारी गर्नेगरी प्रतिपक्षमा बसेका हुन् ।

एमाले अध्यक्ष केपी शर्मा ओलीले दुईपटक संसद् विघटन गर्दा केसीले त्यसको चर्को विरोध गरे । एकपटक सरकारमा गएका उनले गत वर्षको माघमा देउवा नेतृत्वको सरकारले अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) संसद्‌बाट पारित गराउँदा सरकारको विरोध मात्रै गरेनन्, दलले दिएको समर्थन नै फिर्ता गराए । सरकारको आलोचना गरे । जसरी प्रेम सुवाले पनि गरेका थिए, गरिरहेका छन् ।

कांग्रेस सभापति शेरबहादुर देउवा नेतृत्वको तत्कालीन सत्ता गठबन्धन १० पुसमा भत्कियो । माओवादी एमाले नेतृत्वको नयाँ गठबन्धनमा गयो । कांग्रेसलाई प्रमुख प्रतिपक्षी दलको भूमिकामा बस्ने हैसियतमा पुर्‍याएको थियो तर सत्तास्वार्थले गर्दा प्रधानमन्त्रीलाई विश्वासको मत दिएर संसद्लाई प्रमुख प्रतिपक्षीविहीन बनायो कांग्रेसले । जसले गर्दा प्रतिपक्षमा रहेर केसी र सुवाल संसद्‌मा चर्को सुनिने सम्भावना भएको छ ।

तर, प्रतिपक्षी दलको नेताको हैसियत भने दुवै नेताले पाउने सम्भावना कानुनतः छैन । किनभने दलको नेता हुन प्रतिनिधिसभा वा राष्ट्रियसभामा १० प्रतिशत बढी सदस्यहरू भएका दलमध्ये सबैभन्दा बढी सदस्य भएको दलका नेता बन्ने हुन्छ । यो संवैधानिक प्रावधानले विपक्षी दलको नेताको हैसियत केसी र सुवालको नहुने भएको हो ।

प्रकाशित मिति: बिहीबार, पुस २८, २०७९ १८:२६