कर्मचारीसँग विष्णु पौडेल : अहिले परिस्थिति निकै फरक छ, किन्तु परन्‍तु सुन्‍न नपरोस्

कर्मचारीसँग विष्णु पौडेल : अहिले परिस्थिति निकै फरक छ, किन्तु परन्‍तु सुन्‍न नपरोस्

A+ A A-

चौथोपटक अर्थमन्त्री बनेर सोमबारबाट कार्यभार सम्हालेका नवनियुक्त उपप्रधानमन्त्री तथा अर्थमन्त्री विष्णु पौडेल कर्मचारीसँग फरक रूपमा प्रस्तुत भए ।

अर्थ मन्त्रालयको सुवर्णहलमा कर्मचारीलाई निर्देशन दिँदै पाडेलले भने, 'किन्तु परन्तु सुन्न नपरोस्, गम्भीर हुन अनुरोध छ ।' उनले यसअघि पत्रकारहरूलाई प्रतिक्रिया दिने क्रममा भनेका थिए, 'अर्थतन्त्र संकटको डिलमा पुगिसकेको छ ।'

प्राय: हँसिलो मुहारमा प्रस्तुत हुने पौडेल अहिले देखिएका समस्या समाधान गर्ने/नगर्ने विषयमा पनि आफैँ शंकालु बनेका छन् । 'यसअघिका कार्यकालमा म सिङ्गो राष्ट्रको आत्मविश्वास बढाएर निस्केको थिएँ', पौडेलले भने, 'अहिलेको समस्याको दायरा फरक छ र गम्भीर छ, समाधान गर्न सक्नेछौँ भन्ने विश्वास पनि । तर, यो समस्याको समाधान गर्न सक्छु कि सक्दिनँ भन्ने शंका बोकेर आएको छु ।'

अहिलेको अर्थतन्त्रको विषयमा स्वयम् पौडेलले धेरै आलोचना गरेका छन् । अर्थ मन्त्रालयका ४ घण्टाको बीचमा बिदाइ हुँदै गर्दाको अर्थमन्त्री र स्वागत पाउँदै गरेका अर्थमन्त्रीको भनाइ निकै फरक थियो । भलै, सरकारमा उनै पार्टी रहेका छन् । बिदाइ वक्तव्यमा निवर्तमान अर्थमन्त्री जनार्दन शर्माले भनेका थिए, 'अर्थतन्त्रलाई सुरक्षित राखेका छौँ ।' तर, ठीक ४ घण्टापछि नवनियुक्त अर्थमन्त्री पौडेलले संकटकै डिलमा पुगेको मात्रै नभई सम्हाल्न निकै चुनौती रहेको प्रतिक्रिया दिएका छन् ।

पौडेलले दिएका ५ सन्देश

समस्याको चाङमा बसेका छौँ

उनले अहिले सहज परिस्थिति नरहेको र समधानमा चुनौती रहेको सन्देश दिएका छन् । 'हामी समस्याको चाङमाथि बसिरहेका छौँ । समस्या ठूलो हुँदै आएको अनुभूति गरिरहेका छौँ । समाधानमा कसरी अघि बढ्छौँ भन्ने सबैले हेरेका छन्', पौडेलले भने ।

यसअघि राम्रो काम गरेको, अहिले चुनौती बढेको

अहिलेको समस्या समधान गर्नु आफ्ना लागि निकै चुनौती रहेको उनले स्वीकारेका छन् । तर, यसअघि आफू अर्थमन्त्रीको रूपमा सफल भएको दाबी पनि उनको छ । 'यसअघिका कार्यकालमा सिङ्गो राष्ट्रको आत्मविश्वास बढाएर निस्केको थिएँ, अहिलेको समस्याको दायरा फरक छ र गम्भीर छ, तर समाधान गर्न सक्नेछौँ भन्ने विश्वास पनि । यो समस्याको समाधान गर्न सक्छु कि सक्दिनँ भन्ने शंका बोकेर आएको छु ।'

कर्मचारीसँग कडा रूपमा प्रस्तुत

उनी कर्मचारीसँग कडा रूपमा प्रस्तुत भएका छन् । सुशासनमा सम्झौता नगर्ने दाबी गरेका छन् । 'अर्थ मन्त्रालयले आफ्नो सामर्थ्य प्रस्तुत गर्न सकेन भने सिङ्गो राष्ट्रको सामर्थ्यमा प्रश्न उठ्छ', पौडेलले भने, 'किन्तु परन्तु सुन्न नपरोस्, त्यसमा गम्भीर हुन अनुरोध छ, सुशासनमा कुनै सम्झौता हुने छैन ।'

पारदर्शी बन्‍ने वाचा

पौडेलले आफू पारदर्शी बन्ने वाचा पनि गरेका छन् भने कर्मचारीलाई पनि पारदर्शी बन्न निर्देशन दिएका छन् । संयोग अर्थमन्त्रीको पहिलो निर्णय पनि पारदर्शी बनाउन भन्दै अर्थ मन्त्रालय र मातहतका नियकायमा सबै सेवा डिजिटल रूपमा उपलब्ध गराउने भएको छ । 'हामीले गर्ने सबै निर्णय टुँडिखेलमा बसेर गर्ने खालका होऊन् । पारदर्शितालाई केन्द्रमा राखौँ ।'

राजनीतिक अस्थिरता कायम रहन सक्‍ने संकेत

पौडेलले राजनीतिक अस्थिरता अझै कायम हुन सक्‍ने संकेत गरेका छन् । 'अस्थिरताका बाछिटाले हामीलाई असर गर्दैन । राजनीतिक अस्थिरताका नहोला कि भनेर सोचेर काम गरिदिन अनुरोध गर्दछु', पौडेलले कर्मचारीलाई भने ।

आम्दानी बढाउने, खर्च घटाउने चुनौती

अहिले सरकारको दायित्व बढ्दै गएको छ तर राजस्व भने लक्ष्यअनुसार संकलन भएकाे छैन । पौडेलले वितरणका सवालमा उदार देखिन्छन् । तर, गत मंसिर १५ गते नेपाल आर्थिक पत्रकार समाज सेजनले राखेको कार्यक्रममा उनले भनेका थिए, 'अब वितरण होइन, स्रोत बढाउनेतर्फ केन्द्रित हुने समय आएको छ ।' राजस्वले प्रशासनिक खर्चसमेत धान्‍न नसकेको अवस्थामा मितव्ययिताको नीति अवलम्बन गर्नु उनका लागि चुनौती देखिएको छ ।

प्रकाशित मिति: सोमबार, पुस ११, २०७९ १९:२६