मधेस प्रदेशमा जनमत पार्टीलाई कांग्रेसले गर्‍यो मुख्यमन्त्रीको अफर

A+ A A-

प्रतिनिधिसभामा प्रमुख प्रतिपक्षीको भूमिकामा पुगेको कांग्रेसले मधेस प्रदेशको मुख्यमन्त्रीका लागि जनमत पार्टीलाई अफर गरेको छ । कांग्रेसले पहिलो दुई वर्षका लागि माओवादी केन्द्रका अध्यक्ष पुष्पकमल दाहाल प्रचण्डलाई प्रधानमन्त्री दिन नसकिने बताएपछि माओवादी सत्ता गठबन्धनबाट बाहिरिएको हो ।

पाँच दलीय गठबन्धनबाट बाहिरिएर माओवादी केन्द्रका अध्यक्ष प्रचण्ड एमालेसहित सात दलको समर्थनमा आइतबार साँझ प्रधानमन्त्रीमा नियुक्त भइसकेको छन् । सात दलीय गठबन्धन भएपछि केन्द्रसँगै सातै प्रदेशमा सत्ताको नेतृत्व गर्ने मौका गुमाएको कांग्रेसले मधेस प्रदेशमा डा. सीके राउत नेतृत्वको पार्टीलाई मुख्यमन्त्रीको अफर गरेको हो ।

केन्द्रको गठबन्धन मधेस प्रदेशमा भत्काउन कांग्रेसले जनमत पार्टीलाई मुख्यमन्त्रीको कार्ड फ्याकेको हो । जनमतले मधेस प्रदेश सरकारको नेतृत्व पाउने कम सम्भावना रहेकाले कांग्रेसले गठबन्धन फुटाउन जनमतलाई मुख्यमन्त्रीको अफर गरेको कांग्रेसका एक नेताले बताए ।

जनमत पार्टीका प्रवक्ता बीपी साहले पनि कांग्रेसले मधेस प्रदेशको मुख्यमन्त्री दिने अफर गरेको बताए । तर, यो विषयमा पार्टीले कुनै निर्णय नगरेको र तत्काल सात दलीय गठबन्धनमै बस्ने विषयमा पार्टीभित्र छलफल भइरहेको उनले बताए ।

स्रोतका अनुसार जनमतले केन्द्रमा २ मन्त्री र एक राज्यमन्त्री, मधेस प्रदेशमा मुख्यमन्त्री वा दुई मन्त्री र २ राज्यमन्त्री तथा लुम्बिनीमा १ मन्त्री र १ राज्यमन्त्री मागेको छ । तर, प्रधानमन्त्री प्रचण्डले केन्द्रमा एक मन्त्री र एक राज्यमन्त्री, मधेस प्रदेशमा एक वा दुई मन्त्री मात्र दिने बताएको स्रोतको दाबी छ ।

जनमतले कांग्रेसको अफर स्वीकार गरे मधेसमा जनमतलाई सरकार बनाउन ३ सिट अपुग हुन्छ । त्यसका लागि दुई स्वतन्त्र सांसदको समर्थन आवश्यक पर्छ । कांग्रेसको २२, जनमतको १३, लोसपा ९ र नेकपा एस ७ गरी ५१ सिट पुग्छ । मधेसमा सरकार बनाउन ५४ सिट आवश्यक हुन्छ ।

मधेस प्रदेशसभामा जनमतसहितको सात दलीय गठबन्धनको ६२ सिट छ । तर, मुख्यमन्त्री नपाएपछि गठबन्धनबाट जनमत बाहिरिँदा पनि माओवादी, एमालेसहित गठबन्धनमा आवद्ध ६ दलको ४९ सिट पुग्छ । यस्तो अवस्थामा सरकार बनाउन एक सिट रहेको नेपाल संघीय समाजवादी र ५ जना स्वतन्त्र सांसदको समर्थन आवश्यक हुन्छ ।

प्रकाशित मिति: सोमबार, पुस ११, २०७९ १३:२६