पत्रकारहरूको खाता निलम्बन गरेपछि फेरि विवादमा एलन मस्क, युएनले गर्‍यो निन्दा

पत्रकारहरूको खाता निलम्बन गरेपछि फेरि विवादमा एलन मस्क, युएनले गर्‍यो निन्दा

A+ A A-

ट्विटर किनेयता एलन मस्क लगातार विवादित निर्णयका कारण चर्चामा छन् । फेरि ट्विटरसम्बन्धी अर्को विवाद सतहमा आएको छ । कही पत्रकारहरूको खाता निलम्बित गरेको घटनापछि मस्क आलोचित बनेका हुन् ।

मस्कको उक्त निर्णयको संयुक्त राष्ट्र संघका महासचिव एन्टोनियो गुतेरेसले निन्दा गरेका छन् । युएन महासचिवका प्रवक्ता स्टिफन दुजारिकले भनेका छन्, ‘ट्विटरबाट पत्रकारहरूको खाता निलम्बित गर्नु आपत्तिजनक छ । यस्तो मनोमानी निलम्बनले युएन निकै दुखी छ ।'

अभिव्यक्ति स्वतन्त्रताको दाबी गर्ने यस्ता मञ्चले मिडियाको आवाजलाई दबाउन नहुने दुजारिकको भनाइ छ । संसारभरका पत्रकारले सेन्सरसिप, ज्यानको जोखिम र अन्य कठिन अवस्थाको सामना गरिरहेका बेला ट्विटरले यस्तो कदम चालेको हो ।

शुक्रबार ट्विटरले करिब आधा दर्जन चर्चित पत्रकारहरूको खाता निलम्बित गरिदिएको छ । खाता निलम्बित हुने पत्रकारहरूमा न्युयोर्क टाइम्सका रेयान म्याक, सीएनएनका डोनी ओसुल्लभन, द वासिंघन पोस्टका ड्रू हारभेल, मेसेबलका म्याट बाइन्डर, द इन्टरसेप्टका मीका ली, राजनीतिक संवाददाता कीथ ओल्बरम्यान एवं स्वतन्त्र पत्रकार हारुन रुपर र टोनी वेबस्टर छन् । यी पत्रकारको खतामा को सूचना देखिन्छ । ट्विटर संसारकै अग्रणी सोसल मिडिया प्लेटफर्ममध्ये पर्छ ।

युएनको नजर

अब के संयुक्त राष्ट्र संघले ट्विटर छोड्ने निर्णय लिन्छ ? जवाफमा महासचिवका प्रवक्ताले भनेका छन्, ‘हामी ट्विटरको हरेक कदमको निगरानी गरिरहेका छौँ । ससोल मिडियाको क्षेत्रमा ट्विटरको राम्रो प्रभाव छ । त्यसैले यो हाम्रा लागि सूचना र तथ्यात्मक जानकारी शेयर गर्ने महत्त्वपूर्ण मञ्च हो । ट्विटरमा घृणा, अभद्र र अश्लील भाषा, जलवायु एवं अन्य विषयमा दुष्प्रचार बढेको देखिन्छ, यो चिन्ताको विषय हो । त्यसैले हामी यसलाई नजिकबाट नियालिरहेका छौँ ।’

निलम्बित खातावाला पत्रकारहरूले ट्विटरको ‘डक्सिङ’ नियम उल्लंघन गरेको एलन मस्कको आरोप छ ।

प्रकाशित मिति: शनिबार, पुस २, २०७९ ०९:२८