रुस–युक्रेन युद्धको प्रभाव : कुखुराको मासुको मूल्य घट्यो, दानाको बढ्यो

A+ A A-

जेठ महिनामा मात्र कुखुराको मासुको मूल्य तीनपटक घटेको छ । कुखुराको मासुको मूल्य घटेसँगै कुखुरापालक किसान भने मारमा परेको बताउन थालेका छन् ।

निरन्तर कुखुराको मासुको मूल्य घट्न थालेपछि कुखुरापालक किसान दाना किन्न समस्या भइरहेको गुनासो गर्छन् ।

एक साताको अन्तरालमा दुईपटक कुखुराको मासुको मूल्य घटेको छ । तर, यो अवधिमा दानाको मूल्य भने प्रतिकेजी सात रुपैयाँ बढेको नेपाल कृषक समूह सञ्जालका अध्यक्ष तथा कुखुरापालक किसान गुणराज धितालले जानकारी दिए ।

एकातिर बजारमा कुखुराको मासुको मूल्य घट्दो छ भने अर्कोतिर दानाको मूल्य बढेपछि खरिद गर्न समस्या भइरहको उनले जानकारी दिए ।

गत वैशाख अन्तिम र जेठको पहिलो साता निर्वाचनको मुखमा उच्च विन्दुमा पुगेको कुखुराको मूल्य हाल निरन्तर घटिरहेको छ । स्थानीय तहको निर्वाचनको समयमा जिउँदो कुखुरा किसानहरूले ३ सय १० रुपैयाँ प्रतिकिलोमा बिक्री गरिरहेका थिए भने अहिले त्यो मूल्य घटेर २ सय ७० मा झरेको छ । गत साता कुखुराको मासुको मूल्य २ सय ९० रुपैयाँ थियो ।

यसरी कुखुराको मासुको मूल्य घट्दा उपभोक्तालाई सहज भए पनि किसानले प्रतिकुखुरा १५ रुपैयाँ नोक्सानी व्येहोर्नुपरेको कुखुरापालक संघका अध्यक्ष रविन पुरीले बताए ।

कुखुराको मूल्य हप्तामा दुईपटकसम्म घट्दा पनि दानाको मूल्य घटेको छैन । ४ हजारदेखि ४२ सयसम्ममा प्रतिबोरा दाना किनबेच भइरहेको छ । दुई महिनाअघि ३ हजार ७ सय रुपैयाँ प्रतिबोरा दाना व्यापार भइरहेको उनी बताउँछन् ।

कुखुराको दानाको कच्चा पदार्थको अन्तर्राष्ट्रिय मूल्यमा रसिया–युक्रेन युद्धको असर देखिएको उनको दाबी छ । अन्तर्राष्ट्रिय बजारमा नै कच्चा पदार्थको मूल्य अत्यधिक बढ्दा दानाको मूल्य पनि बढेको हो । सरकारले एकातिर कर छुट पनि नदिँदा दानाको मूल्य अझै बढ्ने दाना व्यवसायीहरूको दाबी छ ।

कुखुराको दाना बनाउन प्रयोग गरिने अधिकांश कच्चापदार्थ नेपाल आयातमै निर्भर भएका कारण दाना बनाउन आवश्यक पर्ने मकै, भटमास, पिनालगायत कच्चा पदार्थको भारतबाटै आर्यात गर्नुपर्ने उनीहरूको भनाइ छ ।

युक्रेन विश्वमै मकैको प्रमुख उत्पादक तथा निर्यातकमध्येमा पर्ने मुलुक हो । भारतले पनि कुखुरालाई आवश्यक पर्ने दाना युक्रेनबाट ठूलो परिमाणमा आयात गर्दै आएका कारण नेपालमा सस्तो मूल्यमा भित्रिने गरेको थियो ।

प्रकाशित मिति: शुक्रबार, जेठ २७, २०७९ १३:४६