जनकपुरमा ई-रिक्साको अत्यधिक चाप, बढ्दै पार्किङको समस्या

फाइल तस्वीर ।

A+ A A-

धनुषाको जनकपुरधाममा ई-रिक्साको अत्यधिक चापका कारण पार्किङको समस्या बढ्दै गएको छ ।

जनकपुरधाम उपमहानगरपालिकाले ई-रिक्सा व्यवस्थापन गर्न ध्यान नदिँदा नगर क्षेत्र नै अस्तव्यस्त बनेको हो । नगरमा दर्ता नगरिएका रिक्सा पनि सञ्चालन भइरहेको स्थानीयहरू बताउँछन् । नगरमा अत्यधिक ई-रिक्सा गुड्ने गरेको कारण कतिपय ठाउँमा घण्टौसम्म जाम लाग्ने गरेको छ । विशेषगरी रामामन्द चोक र बसपार्क क्षेत्रमा सर्वसाधारणहरूलाई निकै समस्या हुने गरेको छ ।

नगर क्षेत्रमा गुड्ने गरेको ई-रिक्साको कुनै भाडा समेत तोकिएको छैन । जसकारण मनपरी भाडा लिने गरेको स्थानीयहरूको गुनासो छ । जनकपुरधाम उपमहानगरपालिकामा दर्ता भए पनि रिक्साका लागि रुट परमिट भने यातायात व्यवस्था कार्यालयले दिने गरेको छ । तर, रुट परमिटको आधारमा कुनै पनि ई-रिक्सा सञ्चालनमा नआएको स्थानीयहरूको गुनासो छ ।

जनकपुरधाम उपमहानगरपालिकाका उपमेयर रिताकुमारी मिश्रले आफूहरू ई-रिक्सा पार्किङको व्यवस्थापनलगायतका कार्य गर्न लाग्दा कुनै न कुनै पर्व आउने गरेकै कारण समस्या पैदा भएको बताइन् । उनले छठ पर्वपछि पार्किङ र भाडालगायतको व्यवस्थापनका लागि सर्वपक्षीय छलफल गरेर अगाडि बढाउने बताइन् ।

उपमेयर मिश्रले भनिन्, ‘हामी ट्राफिक त व्यवस्थापन गरिरहेका छौँ । तर, हामी पार्किङको व्यवस्थापनलगायतका कार्य गर्न लाग्दा कुनै न कुनै पर्व आउने गरेको छ, जसकारण काम समयमै हुन सकेको छैन । अब चाँडै नै पार्किङ र भाडालगायतको व्यवस्थापनका लागि सर्वपक्षीय छलफल गरेर अगाडि बढाउनेछौँ । अब बस्ने बैठकमा पार्किङका लागि जग्गा छुट्याउने भनिएको छ, हामी चाँडै कहाँ पार्किङका लागि स्थल बनाउने भन्नेमा लागि परेका छौँ ।’

उपमेयर मिश्रले ट्राफिक व्यवस्थापन, पार्किङ, वान-वे लगायतका विषयहरूको चाँडै टुङ्गो लगाउने बताइन् । पछिल्लो समय बिना कुनै मापदण्ड नगरक्षेत्रमा थपिँदै गएका ई-रिक्साका कारण जनकपुरको आवागमनसमेत असहज बन्दै गएको छ । चालकहरूले अत्यधिक गतिमा रिक्सा चलाउने र जुनसुकै ठाउँमा पनि रोकिदिने गर्दा नगरक्षेत्रमा अस्तव्यस्तता बढेको देख्न सकिन्छ । अहिलेसम्म यसको व्यवस्थापनका विषयमा सरोकारवाला निकाय नै मौन रहेको स्थानीयहरू बताउँछन् ।

प्रकाशित मिति: सोमबार, कात्तिक २२, २०७८ १३:४८