कर्णालीमा मुख्यमन्त्री शाहीले मात्रै शपथ लिने, मन्त्रिपरिषद् विस्तारमा जुटेन सहमति

कर्णालीमा मुख्यमन्त्री शाहीले मात्रै शपथ लिने, मन्त्रिपरिषद् विस्तारमा जुटेन सहमति

A+ A A-

कर्णाली प्रदेशका मुख्यमन्त्री जीवनबहादुर शाहीले साढे ८ बजे शपथ लिँदैछन् । मुख्यमन्त्री शाहीले आजै सानो आकारको मन्त्रिपरिषद्समेत बनाउने प्रयास गरेका थिए ।

तर, सत्ता गठबन्धनका दलहरूबीच मन्त्रालय भागबण्डाका विषयमा सहमति नजुटेका कारण शाही एक्लैले शपथ ग्रहण गर्ने कांग्रेसका एक सांसदले जानकारी दिए । मुख्यमन्त्री शाहीले माओवादी केन्दका संसदीय दलका नेता महेन्द्रबहादुर शाहीसँग मन्त्रिपरिषद् विस्तारबारे छलफल भएको थियो ।

माओवादी केन्द्रका नेता शाहीले दलभित्र छलफल भइनसकेकाले मन्त्रीको नाम पठाउन नसक्ने जवाफ दिएका थिए । कांग्रेसका एक सांसदका अनुसार कांग्रेस, माओवादी केन्द्र र एकीकृत समाजवादीले कति वटा मन्त्रालय लिने भन्नेबारेमा टुंगो लागेको छैन ।

कांग्रेसका ती सांसदले भने, ‘मन्त्रालयको संख्या र नाम नै टुंगो नलागेका कारण पनि मन्त्री पठाउने कुरामा समस्या देखिएको छ ।’ कांग्रेसले मुख्यमन्त्री र एक मन्त्रीमात्रै पाउने सम्भावना छ । पहिला दुईवटा मन्त्रालय लिएको कांग्रेसले अहिले मुख्यमन्त्री पाइसकेकाले अब एक मन्त्रालयमात्रै पाउनेछ ।

यद्यपि कांग्रेसले थप दुई मन्त्रालयको दाबी गरेको छ । अर्कातिर माओवादी केन्द्रले ४ वटा मन्त्रालय दाबी गरेको छ । भौतिक पूर्वाधार र आर्थिक मामिला मन्त्रालयमा समेत माओवादीको दाबी छ । त्यसैले पनि कुरा मिलिसकेको छैन । माओवादी केन्द्रमा भने जनार्दन शर्मा र शक्ति बस्नेत समूहबीच समीकरण मिलाउनै समस्या छ । अहिले बस्नेत समूहका नेता विन्दमान विष्टको नेतृत्वमा सरकारमा जाने सम्भावना छ । जनार्दन शर्मा गोपाल शर्माको नेतृत्वमै पठाउने पक्षमा देखिएका छन् ।

त्यसैले पनि आन्तरिक समीकरण मिलाउन समस्या भएकाले माओवादी केन्द्रले तत्काल मन्त्रिपरिषद् विस्तार हुने देखेको छैन । एकीकृत समाजवादीले २ वटा मन्त्रालय पाउनेछ र उसका लागि पनि पहिलाकै मन्त्रालय दिने वा अरु भन्नेमा टुंगो लागेको छैन ।

भौतिक पूर्वाधार मन्त्रालयमा एकीकृत समाजवादीका सांसद चन्द्रबहादुर शाहीको पुरानै चाहना हो । एमाले र माओवादीको गठबन्धन सरकारको समयमा पनि शाहीले भौतिक पूर्वाधार मन्त्रालयमा दाबी गरेका थिए ।

प्रकाशित मिति: मंगलबार, कात्तिक १६, २०७८ १८:३६