चोलेन्द्रलाई रामचन्द्र पौडेलको सुझाव– राजीनामा दिन तयार हो भने सम्मानजनक बहिर्गमन भनेर नपर्खिनुस्

चोलेन्द्रलाई रामचन्द्र पौडेलको सुझाव– राजीनामा दिन तयार हो भने सम्मानजनक बहिर्गमन भनेर नपर्खिनुस्

A+ A A-

नेपाली कांग्रेसका वरिष्ठ नेता रामचन्द्र पौडेलले प्रधानन्यायाधीश चोलेन्द्र शमशेर राणालाई राजीनामा दिन सुझाव दिएका छन् ।

सोमबार सिराहाको विष्णुपरमा कांग्रेसले आयोजना गरेको कार्यक्रमलाई सम्बोधन गर्दै पौडेलले यथाशक्य चाँडो राजीनामा दिन प्रधानन्यायाधीश राणालाई सुझाव दिएका हुन् ।

‘प्रधानन्यायाधीश राणाजीले म छोड्न तयार छु तर सम्मानजनक बहिर्गमन चाहन्छु भन्नुभएको रहेछ,’ उनले भने, ‘राजीनामा गर्न तयार हो भने अब सम्मानजनक बहिर्गमन भनेर पर्खिने अवस्था छैन । तपाईंले जति छिटो छोड्नुहुन्छ, त्यति नै तपाईंको सम्मान हुन्छ ।’

वरिष्ठ नेता पौडेलले राजीनामा दिन ढिलो गरे प्रधानन्यायाधीश राणाको कद घट्दै जाने बताए । ‘उहाँलाई मेरो सुझाव छ– राजीनामा दिने नै हो भने अब ढिला नगर्नुस्, अझै ढिला गर्नुभयो भने तपाईंको कद घट्दै जान्छ ।’

पौडेलले सम्पूर्ण लोकतान्त्रिक संस्थाहरू एक पछि अर्को गर्दै संकटमा पर्दै गएको पनि बताए । ‘संसद चल्नै नपाई बन्द गर्ने अवस्था एमालेले बनादियो,’ उनले भने, ‘उसले आफूले दुई–दुई पटक गरेको भंग ठीक थियो भन्ने पुष्टि गर्न चाहन्छ । त्यसैले अवरोध गरेर संसद चल्न दिएन ।’

उनले सर्वोच्च अदालतमा अहिले देखिएको परिस्थिति चिन्ताजनक भएको बताए । ‘अदालतमा अहिले जे अवस्था उत्पन्न भएको छ, त्यो चिन्ताजनक छ,’ उनले भने ,‘अदालत जनताको न्यायका लागि अन्तिम मन्दिर हो । तर, अहिले त्यही मन्दिरमा जनताका मुद्दा हेरिएको छैन ।’

उनले सर्वोच्चकै न्यायाधीशहरू, सर्वोच्च बार, बार एसोसिएसन र वकिलहरू विरोधमा उत्रिनु पर्ने अवस्था किन आयो भन्नेबारे सोच्नु पर्ने बताए । ‘न्यायाधीशहरू बेन्चमा गएका छैनन् । उनीहरूले बन्दी प्रत्यक्षीकरणबाहेक अरु मुद्दा नहेर्ने भनेका छन् । सर्वोच्च बार, बार एसोसिएसन र वकिलहरू सर्वोच्चमै धर्ना बस्न परेको छ,’ उनले भने, ‘अदालत सम्पूर्ण रुपमा अवरुद्ध अवस्थामा पुगेको छ । यो किन भयो ? सबैले सोच्नुपर्छ ।’

प्रकाशित मिति: सोमबार, कात्तिक १५, २०७८ १८:२२