गण्डकीका दुई समितिमा नयाँ सभापति : लेखामा रोशन, विधायनमा विष्णु

A+ A A-

गण्डकी प्रदेशसभाका दुई विषयगत समितिमा नयाँ सभापति चयन भएका छन् । सार्वजनिक लेखा समितिको सभापतिमा एमाले सांसद रोशन गाहाथापा र विधायन समितिमा कांग्रेस सांसद विष्णु लामिछाने बिहीबार सर्वसम्मत निर्वाचित भएका हुन् । सभापति बनेका दुवै सांसद नवलपुरका हुन् ।

लेखा समितिको प्रतिपक्षी र विधायन समितिको सत्तापक्षले नेतृत्व गर्ने प्रचलन छ । यसअघि लेखा समितिको सभापति रहेका कांग्रेसका कुमार खड्का नयाँ सरकार गठनपछि प्रदेशको मन्त्री बनेका थिए । त्यस्तै, विधायन समिति सत्तापक्षले पाउने प्रचलनअनुसार नै कांग्रेसबाट नयाँ सभापति निर्वाचित गरिएको हो ।

गण्डकीमा कांग्रेसको नेतृत्वमा गत २९ जेठमा माओवादी, जसपा, राष्ट्रिय जनमोर्चा र एक स्वतन्त्र सांसद संलग्न गठबन्धन सरकार बनेको थियो । सत्ता र प्रतिपक्षीबीच सहमतिअनुसार नै सभापति बनेका थापा र लामिछानेले बिहीबार सभामुख नेत्रनाथ अधिकारीसमक्ष शपथ लिएका छन् ।

सार्वजनिक लेखा समितिको सभापतिका लागि थापाको प्रस्तावक कांग्रेस प्रमुख सचेतक ओमकला गौतम र समर्थक माओवादी सचेतक गायत्री गुरूङ रहेको संसद सचिवालयले जनाएको छ ।

विधायन समितिको सभापतिका लागि लामिछानेको प्रस्तावक राजीव पहारी र समर्थक पियारी थापा थिए । प्रदेश मामिला समिति सदस्य रहेका थापालाई सभापति बनाउनकै लागि दुई दिनअघि लेखा समिति सदस्य बनाइएको थियो । लामिछाने भने यसअघि नै विधायन समितिको सदस्य थिए ।

विधायन समितिले सभाले समितिमा पठाएको विधेयकको दफावार छलफल गर्ने र सहमति भएअनुसार विधेयकमा संसोधनको सिफारिस गर्ने काम गर्छ । प्रदेशसभाले बनाएको नियम संविधान, सम्बन्धित ऐन, प्रचलित कानुनबमोजिम बने/नबनेको मूल्यांकन पनि विधायन समितिको कार्य जिम्मेवारीमा पर्छ ।

सरकारी निकायको सार्वजनिक सम्पत्तिको हिनामिना भए नभएको अध्ययन, अनुगमन, मूल्यांकन गरी निर्देशन दिने र बैठकमा प्रतिवेदन पेश गर्ने लेखा समितिको काम हो । मन्त्रालय, निर्देशनालय र अन्य निकायबाट सम्पादन भएका कामको अनुगमन तथा मूल्यांकन गरी त्यसबारे आवश्यक निर्देशन दिने काम पनि लेखा समितिले गर्छ ।

प्रकाशित मिति: बिहीबार, भदौ ३१, २०७८ १७:४६