सुदूरपश्चिम प्रदेशका मुख्यमन्त्री दीर्घबहादुर सोडारीले शुक्रबार विश्वासको मत लिने तयारी गरे पनि अहिले भने अनिश्चित बनेको छ । नेकपा एमालेले आज विश्वास मत नदिने भएपछि प्रदेशसभा बैठक बस्ने अनिश्चित भएको हो । विश्वासको मत लिनेबारे साेडारीले १८ वैशाखमा प्रदेशसभामा पत्र पठाएका थिए ।
एमालेले मत नदिने अडान लिएपछि मुख्यमन्त्री सोडारीले विश्वासको मत लिने प्रयाेजनका लागि साँझ ५ बजे आह्वान गरिएको बैठक अनिश्चित बनेको छ । प्रदेशसभा बैठकअघि बाेलाइएकाे कार्य व्यवस्था तथा परामर्श समितिको बैठक नै अहिलेसम्म बस्न सकेकाे छैन । प्रदेशसभा सचिव युवराज जैशीले आज ५ बजेका लागि प्रदेशसभाकाे बैठक आह्वान गरिएको बताए । उनले बैठक सार्नेबारे कुनै निर्णय नभएकाे बताए ।
सत्ताधारी दलहरू नै विश्वासकाे मतकाे पक्षमा नउभिने संकेत पाएपछि साेडारी अफ्ठ्याराेमा परेका छन् । नागरिक उन्मुक्ति पार्टी विश्वासकाे मतबारे विभाजित छ । नाउपाकाे रेशम चाैधरी पक्षले सोडारीलाई विश्वासको मत नदिन ह्विप जारी गरेको छ । यता रञ्जिता श्रेष्ठ पक्षका दुई सांसद भने विश्वासको मत दिने तयारीमा छन् । उनीहरू दुवै जना प्रदेश सरकारमा सहभागी छन् ।
तर, सत्तारुढ माओवादी केन्द्रले भने सोडारीको पक्षमा विश्वासको मत दिन ह्विप लगाउने संसदीय दलका नेता मानबहादुर धामीले बताए । नेपाली कांग्रेसले मुख्यमन्त्री सोडारीले विश्वासको मत लिन खोजे अवरोध सिर्जना गर्ने बताएको छ । असंवैधानिक ढंगले सोडारीलाई मुख्यमन्त्रीमा नियुक्त गरेको भन्दै कांग्रेसले विरोध गर्ने निर्णय गरेको हाे ।
आज संसदीय दलको बैठकले सदन अवरोध गर्ने निर्णय गरेको निवर्तमान मुख्यमन्त्रीसमेत रहेका कांग्रेस संसदीय दलका नेता कमलबहादुर शाहले बताए । सोडारी ६ वैशाखमा मुख्यमन्त्री नियुक्त भएका हुन् । विश्वासको मत लिन सोडारीलाई ५ जेठ सम्मकाे समय छ । ५३ सदस्यीय सुदूरपश्चिम प्रदेशसभामा मुख्यमन्त्रीले विश्वासकाे मत आर्जन गर्न २७ सांसद आवश्यक पर्छन् ।
यहाँ एमाले, माओवादी, नेकपा एकीकृत समाजवादी, नाउपा रञ्जिथता पक्षका दुई सांसद र स्वतन्त्र सांसदले विश्वासको मत दिँदा बहुमत पुग्छ । प्रदेशसभामा हाल नेपाली कांग्रेसका १८, माओवादी केन्द्रका सभामुखसहित ११, एमालेका ११, नागरिक उन्मुक्तिका सात, एकीकृत समाजवादीका चार, राप्रपाका एक र एक स्वतन्त्र सांसद छन् ।
प्रकाशित मिति: शुक्रबार, वैशाख २१, २०८१ १५:१०
-1743579183-1743604118.jpg)
