नेपाल लाइफ इन्स्योरेन्सले ल्यायो ‘नौलो केटाकेटी जीवन बीमा योजना’

A+ A A-

नेपाल लाइफ इन्स्योरेन्स कम्पनीले ‘नौलो केटाकेटी जीवन बीमा योजना’ सार्वजनिक गरेको छ ।

यो योजनामा १ वर्षदेखि १७ वर्षसम्म उमेर समूहका बालबालिकाको ५ वर्षदेखि ३० वर्षसम्म समय अवधिको न्यूनतम १ लाखदेखि आम्दानीका आधारमा अधिकतम बीमाङ्क छनोट गर्न सकिने कम्पनीले जनाएको छ ।

जीवन बीमालेखमा १ वर्षदेखि ७ वर्षसम्म उमेरका बिमितको बीमा प्रारम्भ मितिबाट २ वर्ष पूरा भएपश्चात वा ७ वर्ष उमेर पूरा भएपश्चात मात्र बीमालेख अन्तर्गतको जोखिम प्रारम्भ हुनेछ । त्यसैगरी बिमितको उमेर ८-९ वर्ष भएमा १० वर्ष पूरा भएपछि र बिमितको उमेर १०-११ वर्ष भएमा बीमाको वार्षिकोत्सव मितिदेखि बीमालेखअन्तर्गतको जोखिम प्रारम्भ हुनेछ।

बीमालेख परिपक्व अवधिसम्म बिमित जीवित रहेमा बीमांक रकम र आर्जित बोनस एकमुष्ठ प्रदान हुनेछ । कथमकदाचित बीमाको जोखिम प्रारम्भ हुनुअगावै बिमितको मृत्यु भएको खण्डमा सम्पूर्ण बीमा शुल्क प्रस्तावकलाई भुक्तान गरिनेछ ।

त्यसैगरी बीमा जोखिम प्रारम्भपश्चात बिमितको मृत्यु भएमा तत्काल बीमांक रकमको २५ प्रतिशत भुक्तान दिइनेछ भने बाँकी ७५ प्रतिशत बीमांक रकम र आर्जित बोनस रकम ब्याजसहित एकमुष्ठ बीमा अवधि समाप्तिमा प्रस्तावकलाई भुक्तान गरिनेछ ।

वार्षिक ३ किस्ता बीमाशुल्क भुक्तानी गरी जोखिम प्रारम्भ भएको बीमालेखमा ३ वर्ष पूरा भएपश्चात समर्पण मूल्य प्राप्त हुनेछ भने समर्पण मूल्यको ९० प्रतिशतसम्म कर्जा प्राप्त गर्न सकिनेछ ।

यदि बीमा शुल्क छुट सुविधा लिएको छ भने यस बीमालेखले प्रस्तावकको जोखिमसमेत बहन गर्नेछ । बीमालेख चालु रही बीमा अवधिभित्र प्रस्तावकको दुर्घटनाबाट अंगभंग भई अशक्तता भएमा बाँकी बीमा शुल्क भुक्तानीमा पूर्ण छुट दिइनुका साथै अपांग अशक्त सुविधाबराबर रकम मासिक १२० समान किस्तामा अपांग अशक्त सुविधा उपलब्ध गराइने कम्पनीले जनाएको छ ।

प्रकाशित मिति: आइतबार, साउन १०, २०७८ १८:०५