ताजा जनादेशमा जानु बाध्यकारी विकल्प हो : विष्णु पौडेल

A+ A A-

उपप्रधानमन्त्री विष्णु पौडेलले ताजा जनादेशमा जानु बाध्यकारी विकल्प भएको दाबी गरेका छन् । प्रधानमन्त्री केपी ओलीले विश्वासको मत प्राप्त नगरेको र संसदले नयाँ सरकार गठन गर्न नसकेकाले प्रतिनिधिसभा विघटन गरी बाध्यकारी विकल्पको रूपमा ताजा जनादेशमा जानु परेको उनको जिकिर थियो ।

शनिबार बुटवलमा कालीगण्डकी-तिनाउ डाइभर्सन बहुउद्देस्यीय आयोजना कार्यालयको उद्घाटन गर्दै पौडेलले संवैधानिक व्यवस्थाअनुसार नै संसद विघटन गरी निर्वाचनको मिति तोकिएको बताए । उनले सबैलाई निर्वाचनमा आउन आह्वान पनि गरे ।

सरकारले नागरिकको जीवन रक्षालाई पहिलो प्राथमिकतामा राखेको उल्लेख गर्दै पौडेलले निर्वाचनअगावै सबैलाई खोप लगाइने दाबी गरे ।

‘विभिन्न देशका खोप उत्पादकहरूसँग सम्वाद, समन्वय गरेर खोप ल्याउँछौँ र निर्वाचनअघि सबै जनतालाई खोप लगाएर निर्वाचनमा जाँदा मास्क खोलेर मतदान गर्ने वातावरण मिलाउँछौँ,’ उनले भने ।

आयोजनालाई बजेट अभाव हुन नदिइने

पौडेलले कालीगण्डकी–तिनाउ डाइभर्सन आयोजनालाई बजेट अभाव हुन नदिने बताए । प्रारम्भिक लागत अनुमान ४० अर्ब भए पनि आयोजनाको हाइड्रोपावर निर्माण तर्फ ६४ अर्ब र सिँचाइ आयोजनाका लागि ७४ अर्ब गरी १ खर्ब ३८ अर्ब लागत अनुमान गरिएको पौडेलको भनाइ थियो ।

कालीगण्डकी–तिनाउ डाइभर्सन आयोजना : ४० अर्ब लागत अनुमान, एक वर्षभित्र डीपीआर बनाइने

आयोजनाको बाँध राम्दी पुलबाट २ दशमलव ३ किलोमिटर तल रम्भा गाउँपालिका ३ पाल्पामा निर्माण गरिने र तिनाउ नदिमा कालिगण्डकीको पानीलाई २ वटा सुरुङ मार्फत खसालिने पौडेलको भनाइ थियो ।

पाल्पाको रम्भा गाउँपालिका–३, पीपलडाँडा क्षेत्रमा ड्याम बनाएर २७ किलोमिटर लामो सुरूङ मार्फत पाल्पाको तिनाउस्थित दोभानमा पानी खसालिने गरी डीपीआर तयार गरिने बताइएको छ । त्यस्तै तिनाउ गाउँपालिका ३ दोभानदेखि बुटवल १३ बेलबाससम्म करिब ७ कि.मि.को अर्को सुरुङ बनाइनेछ ।

दोभानमा पहिलो पावर हाउस निर्माण गरी ५४ मेगावाट विद्युत् उत्पादन गरिने र बेलबासमा ७२ मेगावाट गरी कुल १ सय २६ मेगावाट विद्युत् उत्पादन गर्न सकिने प्रारम्भिक अध्यायनले देखाएको सिँचाइ विभागका महानिर्देशक मधुकरराज भण्डारीले बताए । त्यस्तै करिब ९ मिटर चौडा सुरूङ मार्गबाट ८२ घनलिटर प्रतिसेकेन्ड पानी तिनाउ नदीमा आउने भण्डारीले बताए ।

प्रकाशित मिति: शनिबार, असार १२, २०७८ १४:०३