प्रतिभा डबली सिजन–३ का लागि उकृष्ट दश सोच छनोट (भिडियो)

A+ A A-

'सुशासनका लागि नवीन सोच' भन्ने नाराका साथ आयोजित 'प्रतिभा डबली कार्यक्रम २०८१' अर्थात् प्रतिभा डबली सिजन– ३ का लागि प्रस्तुत भएका निजामती कर्मचारीका सोचहरूमध्येबाट उकृष्ट १० सोच छनोट भएका छन् ।

छनोट हुनेहरूमा श्रम, रोजगार तथा सामाजिक सुरक्षा मन्त्रालयका विकासकुमार रजक, शिक्षा, विज्ञान तथा प्रविधि मन्त्रालयका नशिब आचार्य, भूमि व्यवस्थापन तालिम केन्द्र, धुलिखेलका सञ्जीवकुमार राउत, नयाँ शहर आयोजना समन्वय कार्यालयका मोनिका महर्जन, गैँडाकोट नगरपालिका कार्यालयका शंकर कँडेल रहेका छन् ।

त्यस्तै, अख्तियार दुरुपयोग अनुसन्धान आयोगका मनोज साह, नापी कार्यालय, बाराका नापी अधिकृत चन्दनप्रसाद दास, जिल्ला निर्वाचन कार्यालय, धादिङका विकास बिक, सिक्टा सिँचाइ आयोजनाका बाँकेका इन्जिनियर तनोज दुलाल, नेपाल लाइभस्टक सेक्टर इनोभेसन आयोजन, विकेन्द्रीकृत आयोजना सहयोग इकाइ, बुटवलका पशु चिकित्सक डा. शिवलाल भुसालले प्रस्तुत गरेका सोच पनि उत्कृट १० मा पर्न सफल भए ।

संघीय मामिला तथा सामान्य प्रशासन मन्त्रालयका उपसचिव हरि तिवारीका अनुसार कर्मचारीले आफूमा भएका प्रतिभालाई प्रस्तुत गर्न नपाउने भएकाले सो प्रतिभा खेर नजाओस् भन्ने हेतुले नेपाल सरकारले यो प्रतिभा डबली कार्यक्रम प्रस्तुत गरेको हो ।

स्पष्टता, मौलिक र पृथकतालगायत गुण भएका सोच उत्कृष्ट दशमा परेको र प्रस्तुति त्यसमा उठेका प्रश्नको जवाफलगायत प्रक्रियाबाट अब उत्कृष्ट तीन सोच छानिने उनको भनाइ छ ।

प्रतिभा डबली कार्यक्रममार्फत नेपाल सरकारसँग सहकार्य गर्न पाउँदा गर्वको महसुस भएको आइडिया स्टुडियो नेपालका कार्यकारी अध्यक्ष डा. छिरिङ लामाले बताए ।

'सुशासनका लागि नवीन सोच' भन्ने नाराका साथ सञ्चालन गरिएको प्रतिभा डबली कार्यक्रम' आइडिया स्टुडियोको सहकार्यमा संघीय मामिला तथा सामान्य प्रशासन मन्त्रालयले आयोजना गरेको हो ।

भिडियो: