धरानमा पानीको दु:ख : मेयरको कार्यकक्ष घेर्न पुगे स्थानीय

A+ A A-

आफ्नो वडाको पालोमा खानेपानी नआएपछि स्थानीयहरू धरान उपमहानगरका प्रमुख हर्क साम्पाङको कार्यकक्ष घेराउ गर्न पुगेका छन् । मुख्य रूपमा धरान उपमहानगरपालिकाका १, २ र १२ वडाका स्थानीयहरूले आफ्नो पालोमा खानेपानी नआएको भन्दै आइतबार मेयर साम्पाङको कार्यकक्ष घेराउ गरेका हुन् ।

स्थानीयहरू मेयर साम्पाङको कार्यकक्ष आउने जानकारी पाएपछि नगरसहित जनपथ प्रहरी तैनाथ गरिएको थियो । खानेपानी बोर्डमा समेत रहेका साम्पाङको कार्यकक्षमा वडाध्यक्षहरूसहित स्थानीयहरू खानेपानी माग्न पुगेका थिए । कार्यकक्षमा गुनासो राख्न पुगेका स्थानीयहरूले कतिपय ठाउँमा ४ महिनाभन्दा बढी समयदेखि पानी नआएको गुनासो गरेका थिए ।

गुनासो गर्न पुगेका धरान– १ का वडाध्यक्ष यज्ञमणि आचार्यले २ महिनाभन्दा बढी समयदेखि आफ्नो वडा क्षेत्रमा पनि नआएको बताए । 'दिन बिराएर आउनुपर्ने हो, तर पालोमै पानी नआएपछि खानेपानी बोर्डमा गयौँ, त्यहाँ विभिन्न बहानाबाजी गरेपछि मेयरलाई नै भेट्न गएका हौ,’ आचार्यले भने ।

खानेपानीको समस्या लिएर आएका स्थानीयहरूमध्येबाट प्रतिनिधिले मेयर साम्पाङ छलफलसँग गरेका थिए । वडाका जनप्रतिनिधि र सीमित अगुवाहरूलाई मात्र कार्यकक्षमा छिराएर अन्यलाई बाहिरै रोकेपछि भिड केही आक्रोशितसमेत भएको थियो ।

लगातारको खडेरीले पछिल्लो साता धरानमा खानेपानीको चरम अभाव छ । धरानवासीहरूले निजी ट्याङ्करबाट पिउने पानी खरिद गर्नु बाध्यता रहेको धरानस्थित होटल सेछका सञ्चालक वासुदेव बरालले बताए । 'नियमित ट्याङ्करबाट पानी नकिन्ने हो भने त व्यवसाय चलाउन सकिँदैन । होटेलमा पानी झन् धेरै चाहिन्छ, अहिले हामीले नियमित बाहिरबाटै पानी किनेर चलाइरहेका छौँ,' बरालले भने । उनका अनुसार धरानमा अहिले ट्याङ्करबाट पानी खरिद गर्दा ७५ पैसा प्रतिलिटरको हिसाब पर्छ । 'एक ट्याङ्करमा ७ हजार लिटर हुन्छ, जसको मूल्य ४५ सय रुपैयाँ हो,' उनले भने ।

खानेपानीलाई मूल चुनावी एजेन्डा बनाएर मेयरमा निर्वाचित हर्क साम्पाङले श्रमदानबाट विभिन्न खोलाको स्रोत थपे पनि पानीको समस्या हल गर्न पर्याप्त बनेको छैन । बर्खायाममा पानीको उत्रो अभाव नदेखिने धरानमा सुक्खायाम सुरु भएसँगै पानीको हाहाकार मच्चिने गरेको छ । साम्पाङको नेतृत्वमा श्रमदानबाट थपेका स्रोतहरूमध्ये कोकाहा खोलामा मात्र अहिले पानी छ । उक्त खोलाको पानी करिब ४२ किलोमिटर पाइप विस्तार गरिएको र डढेलोले क्षति पुगेका कारण बेलाबेलामा अवरुद्ध हुने गरेको छ ।

प्रकाशित मिति: आइतबार, वैशाख २३, २०८१ २१:०६