हेटौँडामा बजार डुल्छन् संक्रमित, हेल्थ डेक्स भन्छ- भयावहको खतरा बढ्यो

A+ A A-

कोरोना महामारीको दोस्रो लहरले देश नै संक्रमणको उच्च जोखिममा छ । देशका सात प्रदेशमध्ये कोरोना संक्रमणबाट सबैभन्दा बढी बागमती प्रदेश प्रभावित बनेको छ ।

बागमती प्रदेशकै मुकाम हेटौँडा पनि संक्रमणको जोखिमबाट अछुतो छैन् । हेटौँडाको समुदायस्तरमै कोरोना संक्रमण फैलिएको छ । हेटौँडा उपमहानगरपालिकका १९ वटै वडामा संक्रमित दैनिक बढिरहेका छन् । १९ वैशाखदेखि मकवानपुरभर निषेधाज्ञा भए पनि संक्रमित भने घटेका छैनन् । संक्रमण रोक्न निषेधाज्ञा लगाइएपनि संक्रमितको संख्या दैनिक बढ्नुमा सरकारको दोष भएको निजी क्षेत्रले आरोप लगाएको छ ।

जिल्लामा २० वटा निजी क्षेत्र सम्मिलित कोभिड हेल्थ डेक्स मकवानपुरले संघीय, प्रदेश र स्थानीय सरकारको लापरबाहीको कारण संक्रमण रोक्न नसकिएको निष्कर्ष निकालेको छ । मकवानपुर उद्योग वाणिज्य संघको संयोजकत्वमा पुरानो नारायणी यातायात कम्पनी प्रालि, नारायणी संघ, लायन्सक क्लबहरू, सामुदायिक प्रहरी सेवा केन्द्र, मारवाडी एसोसिएसनलगायतका २० निजी संस्थाले विगत सात दिनदेखि घरदैलो जारी राखेको छ ।

कोभिड हेल्थ डेक्स मकवानपुरले घरदैलो गर्दा संक्रमित घरमा नभेटिने, बजार डुल्न निस्किने गरेको जानकारी दिएको छ । डेक्सका संयोजक मकवानपुर उद्योग वाणिज्य संघका अध्यक्ष कृष्ण कटुवालले हेटौँडा–१ चौकिटोलमा एक संक्रमित महिलालाई भेट्न जाँदा घरमा नभटेको बताए ।

‘संक्रमित भेट्न चौकिटोल गयौं । घरमा पुगेर सोधीखोजी गर्दा उहाँ त राप्ति बगरमा घुम्न जानु भएको थाहा पायौं,’ कटुवालले भने, ‘संक्रमित हामी घरमा पुगेको ४५ मिनेटपछि मात्रै आउनु भयो । सम्झाएर आएका छौं ।,’

कोभिड हेल्थ डेक्सले ७ दिनभित्र तीन सयभन्दा बढी संक्रमितलाई भेटेको जनाएको छ । तीन सय संक्रमितलाई भेटेपछि कोभिड हेल्थ डेक्सले संक्रमितकै व्यवहारका कारण हेटौँडाको समुदायस्तरमा कोरोना फैलिएको निष्कर्श निकालेको हो । कोभिड हेल्थ डेक्सका सदस्य सरोज खनालले हेटौँडा–१ चौकिटोलमा एउटै घरमा ५ जनालाई कोरोना संक्रमण भएपनि मास्क, सेनिटाइजर प्रयोग नगरेको बताए ।

उनले संक्रमित घर वरपर घुम्ने गरेको बताएका छन् । ‘एउटै घरमा २० जना सदस्य रहेछन् । जसमध्ये ५ जनालाई कोरोना लागेको रहेछ । उहाँहरुले मास्क पनि नलगाएको, सेनिटाइजर पनि नलगाउने, भौतिक दुरी पनि पालना नगरेको र घर वरपर घुम्ने गरेको पत्ता लाग्यो,’ खनालले भने ।

हेटौँडा–१ का वडाध्यक्ष सविन न्यौपानेले आफ्नो वडाभित्रका संक्रमित अनुशासनहिन भएको बताएका छन् । ‘संक्रमण पुष्टि भएको सूचना आएपछि वडाको टोली संक्रमितको अवस्था बुझ्न घरघर पुग्ने गरेको छ । तर, कतिपय संक्रमित घरमा भेटिँदैन् । टोलछिमेकमा घुम्दै गरेको भेटिन्छ । सचेत गराउने गरेका छौं । तर, पनि संक्रमितमा अनुशासन देखिएन्’, न्यौपानेले भने । उनले अनुशासनमा नबस्ने संक्रमितलाई आइसोलेसनमा पठाउने तयारी गरिरहेको जानकारी दिए ।

हेटौँडा–५ सिचाइँ टोलकी ७८ वर्षीक्ष वृद्धा टोलभरी घुम्ने गरेको पाइएको छ । ‘हामी संक्रमित भेट्न जाँदा सिचाइँटोलमा वृद्धा चोकमै बस्ने, छरछिमेकमा डुल्ने गरेको पाइयो । हामीले सम्झाउन खोज्दा उल्टै गाली गर्नुभयो,’ खनालले भने, ‘घरभित्रै बस्न आग्रह गर्दा उहाँले मसँगैका सबै मरिसके मेरो पनि जाने बेला भइसक्यो, मलाई मतलब छैन् भन्नुहुन्छ ।’ खनाल संक्रमित बिनारोकतोक बजार डुल्ने, चोकमा सबैसँग गफिएर बस्ने गरेको भेटिएकाले स्थानीय सरकारले निगरानी बढाउनु पर्ने बताउँछन् ।

हेटौँडा–४ पारिजातपथमा भाडामा बस्ने एक जनालाई कोरोना संक्रमण भएको जानकारी घरबेटी र छिमेकीलाई पनि नहुँदा संक्रमित बजार डुल्ने गरेको डेक्सले पत्ता लगाएको छ । कोभिड हेल्थ डेक्सले संक्रमित बस्ने घर पत्ता लगाएर पुग्दा घरबेटी र छिमेकीले नै यस क्षेत्रमा कसैलाई कोरोना नलागेको बताएका थिए । ‘संक्रमित भेट्न हामी पुगेपछि घरबेटी नै कसैलाई संक्रमित नभएको भन्दै आउनु भयो र पछि, कोठामा बस्नेलाई नै कोरोना भएको थाहा पाएपछि उहाँ छक्क पर्नुभयो,’ डेक्सका संयोजक कटुवालले भने ।

कोभिड डेक्सले घरदैलोमा हेटौँडा उपमहानगरपालिकाकी उपप्रमुख मिनाकुमारी लामालाई साथमै लिएर हिँड्ने गरेको छ । निजी क्षेत्रले मात्रै निगरानी गरेर नहुने भएपछि उपप्रमुखलाई घरदैलोमा लिएर हिँडेको कटुवाल बताउँछन् । ‘हाम्रो घरदैलो अभियानमा पहिला आग्रह गरेपनि सरकारी निकायमा प्रतिनिधि जान मान्नु भएन् । अहिले उपप्रमुख नै साथमा हिँड्नुहुन्छ ।,’ उनले सुनाए । स्थानीय सरकारले स्वास्थ्यकर्मीको टोली प्रत्येक वडामा परिचाल गरेर निगरानी नबढाए कोरोना संक्रमणको भयावह स्थिति खतरानजिक पुगेको कटुवालको भनाइ छ ।

वडाका स्वास्थ्य इकाई निष्क्रिय

हेटौँडा उपमहानगरपालिकाभित्रका १९ वटै वडामा रहेका स्वास्थ्य इकाई कोरोना संक्रमण रोकथाम र नियन्त्रणमा निष्क्रिय भएको गुनासो आएको छ ।

उपमहानगरपालिकाले कोभिड अस्तापलका रूपमा सञ्चालित हेटौँडा अस्पतालमा मात्रै ध्यान केन्द्रित गरेको र वडामा आवश्यकता अनुसार स्वास्थ्य इकाईलाई सक्रिय नबनाएको गुनासो प्राप्त भएको हो । उपमहानगरका स्वास्थ्यकर्मी अस्पतालमै खटिएका छन् । वडास्थित स्वास्थ्य इकाइबाट सिटामोल वितरण गर्न स्वास्थ्यकर्मी पनि उपलब्ध नभएको हेल्थ डेक्सले जनाएको छ ।

प्रत्येक वडामै स्वास्थ्य इकाइलाई सक्रिय बनाएर कोरोना संक्रमणको रोकथाम गर्नुपर्ने बेलामा उपमहानगरपालिकाले धेरै चासो नदेखाएको हेल्थ डेक्सका संयोजक कटुवालले बताए । उनले वडामा स्वास्थ्यकर्मीदेखि प्रहरी परिचालन गरेर निगरानी बढाउनुपर्ने बताएका छन् । हेटौँडाकी उपप्रमुख मिनाकुमारी लामाले कोरोना महामारी नियन्त्रण गर्न स्वास्थ्यकर्मीको टोली परिचाल गरेर प्रभावकारी काम भइरहेको दावी गरिन् ।

प्रकाशित मिति: शुक्रबार, जेठ १४, २०७८ १७:२५