लुम्बिनी : सांसद पदमुक्त जसपाका चार नेता प्रदेशसभा सचिवालयविरुद्ध अदालत जाने

लुम्बिनी : सांसद पदमुक्त जसपाका चार नेता प्रदेशसभा सचिवालयविरुद्ध अदालत जाने

A+ A A-

सांसद पदमुक्त भएका जनता समाजवादी पार्टीका चार नेता लुम्बिनी प्रदेशसभा सचिवालयविरुद्ध अदालत जाने भएका छन् ।

प्रदेससभा सचिवालयले पार्टीले कसैलाई कारबाही नगरेको पत्र दिँदादिँदै आफूमाथि कारबाहीको सूचना निकालेको भन्दै त्यसका विरुद्ध अदालत जाने जसपा नेतासमेत रहेका मन्त्री सन्तोष पाण्डेले बताए । जसपा अध्यक्ष महन्थ ठाकुरले दिउँसो १ बजे इमेलमार्फत पत्र पठाएको भए पनि प्रदेससभा सचिवले बेइमानी गरेको उनको भनाइ छ ।

लुम्बिनी प्रदेशसभा सचिवालयका सचिव दुर्लभ पुन मगरले जसपाको केन्द्रीय कमिटीको माइन्युटसहितको सूचना लुम्बिनी प्रदेशसभा सचिवालयमा पेस भएकोले त्यसैका आधारमा उनीहरूलाई पदमुक्त गरिएको बताए । माइन्युटको प्रतिलिपि सचिवालयमा पेस भएका आधारमा सूचना प्रकाशित गरिएको उनको भनाइ छ । उनले अध्यक्ष ठाकुरको पत्र नपाएको समेत बताए ।

प्रदेशसभा सचिवालयले बिहीबार सूचना प्रकाशित गरी पाण्डे, विजयकुमार यादव, सुमन शर्मा रायमाझी र कल्पना पाण्डे पदमुक्त भएको जानकारी दिएको थियो । जसपा केन्द्रीय कार्यकारिणी समितिले राजनीतिक दलसम्बन्धी ऐन २०७३ को दफा ३२ को उपदफा (५) बमोजिम प्रदेशसभा सदस्य र पार्टी सदस्यबाट निष्काशन गरेको सूचना जसपा लुम्बिनी प्रदेश संसदीय दलले दिएको सूचनामा उल्लेख गरिएको छ ।

तर, जसपाले कुनै पनि प्रदेशसभा सदस्यलाई कारबाही नगरिएको भन्ने पत्र सचिवालयलाई पठाएको दाबी अध्यक्ष ठाकुर पक्षको छ ।

नेपाली कांग्रेस, माओवादी केन्द्रका र जसपाका सांसदले ६ वैशाखमा मुख्यमन्त्री शंकर पोखरेलविरुद्ध अविश्वासको प्रस्ताव दर्ता गरेका थिए । तर, जसपाका सांसदहरू २ घण्टापछि नै मुख्यमन्त्री शंकर पोखरेल नेतृत्वको सरकारमा सहभागी भएका थिए ।

सरकारमा सहभागी भएका पाण्डे रूपन्देही क्षेत्र नम्बर ३ (१) र बाँके क्षेत्र नम्बर २(१) बाट प्रत्यक्ष निर्वाचित हुन् भने रायमाझी र लम्साल समानुपातिक सांसद हुन् ।

प्रकाशित मिति: बिहीबार, वैशाख १६, २०७८ २१:४०